Gargaarsa Hassattoxxa Yanna Geedhe Yeꞌedhi

1. Yihowwa ardi isiki isiꞌaa fiixake kadeexxa leellisheeki hittate?

YIHOWWAAꞌA duuchchiingi ardi isiki fiixaken. Isi arda isika Yesuusixxe mundenni wodeꞌeen, ittan gubaꞌetixxi geedhe karkarsitaashshanna baalloonseꞌeen. (Huj. 20:28) Yihowwa, geedhe arda isika mararteti karkarsitoꞌaa hasaꞌneen. Geedhe, Kirsitoosixxe akeette hunda hexxeꞌe, arda isika jajjabeessitaan, ittan manfasiinxa hedho miitaaxxe yaanenaaꞌni heqqitaan.—Isa. 32:1, 2.

2. Yihowwa giddiiꞌninni miꞌlachcho assaaki ayyeꞌnite? (Hiziqeeli 34:15, 16)

² Yihowwa arda isike duuchchiingee hedaani, Giddiiꞌninni miꞌlachcho assaꞌneeki kinni rakko gelteeke manjoꞌniten. Isi manfasiinxe hedhonni miidhemeeka manna geedheti darreeꞌni gargaaraan. (Hiziqeeli 34:15, 16 yaansis.) Kaddomaleꞌe, gargaarsi noꞌaa hasisaaxxa yanna, noꞌo gargaarsa halsinonnaa hasaꞌneen. Rakko geltaa wodda, Mageni gargaaraashsha kadhata calla kaddebaaki, ‘allalsannotikanna barsiissannotika’ kipha halsinonnaa hasaꞌneen.—Eff. 4:11, 12.

3. Geedhe hujjaꞌneexxa huje qoꞌnisa noꞌaa duuchchiingi maa laꞌo affee?

³ Tenne qoꞌneꞌni, Yihowwa manfasiinxe hedhonni miidhemeeka manna, geedheti darrenaaꞌni gargaaratee qophpheesseexxa qophphe qoꞌninsannon. Ittan geedhetika gargaarsa qodhdha hasissaaki haanote? Gargaarsa insaꞌneeka qodhdhinaanneki mayeete? Ittan insaꞌne noꞌoo gargaarraaki hittate? hiyyaake qortumuwwiꞌaa hiissichcho alfinannon. Matanga taꞌa rakko geyanna gophphoole, konne qortummuwwiki hiissichchi, Yihowwa qophpheesseexxe qophpheꞌa anfennexxi saadino lebbaashsha assaan. Ittan mitte barra hedho noꞌoxxa gargaaraaxxi hexxaan.

‘GEEDHE YEꞌEDHA’ HASISSAAKI HAANOTE?

4. Yaꞌiqoobi 5:14-16, 19, 20 keꞌni hedheeki yaadi manfasiinxe hedhonni dhibemeeka manjo ifisaaken hinaanneki mayeete? (Fakkuwwatanna uudi.)

⁴ Hordofeesi Yaꞌiqoobi, Yihowwa geedheti darreeꞌni noꞌoo gargaaraꞌneeki hittate kaddeexxa haasoꞌeen. Isinna: “Haꞌnoo giddiiꞌni ela-gopheeki manji hedhee? Gubaꞌetixxa geedhe isibaa yeꞌedhowwaal” hiyyeen. (Yaꞌiqoobi 5:14-16, 19, 20 yaansis.) Qarqarakeꞌni hedheeki yaadi, Yaꞌiqoobi haasoꞌeeki manfasiinxe dhibo kaddeexxa leellishaan. Fakkeennakeꞌe, Yaꞌiqoobi dhibemeeki manji yeꞌedhuni hiyyeeki, gubaꞌetixxe geedhe maleꞌe ciꞌleeyyetebaan. Ittan, manfasiinxe hedhonni dhibemeeki manji cubbo isixxi gattowwaali hiyyendaa wodda fayyaaxxa haasoꞌeen. Mitti additte dhibonni dhibemeeki manjinna manfasiinxe hedhonni dhibemeeki manji, fayyatee assaaxxi yaane weli fakkaattaaxxen. Dhibemmannoxxa yanna ciꞌloti miniba mareꞌe, noꞌoo dhibaꞌnee qico ciꞌleessichchokeꞌni haasoonnannon, ittan ciꞌleessichchiinxa akeettenna hordonfannon. Weli fakkaattanxa, manfasiinxe hedhonni dhibemmanno wodda, geedhetiba marreꞌe heꞌnenneka jeeja kullannon, ittan insaꞌne qullitte borroꞌni hundeessemeeka gorsinaaka gorsa hujeteꞌni hosinsannon.

5. Yihowwani welti anfeennexxi firunte qiiddaꞌneexxa egennannoki hittate?

⁵ Yaꞌiqoobii, hufuura adhdha 5 keꞌni, manfasiinxi fayyunte noꞌoxxi hoone garinninna rakkoteꞌni hexxeeshsha noꞌoꞌni fakkaattaaxxa yanna, geedhetika gargaarsa qodhdhinannoshsha jajjabeesseen. Mageniki welti anfeennexxi firunte baxxaashsha assitaaxxe rakko giddo inbebeꞌno edi darre gargaarsa qodhdha beekkumaken! Hexxebaaxe yaanenni ifi addachchiisa eloxxebaan. Maxaafi Qullichchi Yihowwani welti jabaxxa firunte anfebeꞌnongi, isi edo eeyyemmaanneshsha assine ifi hendabeꞌnoshsha xexxeꞌachchiisaan. (Yaq. 1:22) Mitti mitti Serdese hedhemmaki qarriki Kirsitaani iitta hedheeka dedha hujeemmaxxeꞌe, Yesuusi manfasiinxe hedhonni heꞌneeka jeeja uuddaaxxa xexxeꞌachchiseen. (Lel. 3:1, 2) Noꞌoxxa manfasiinxe hedhoxxa fayyunte egennannoki mitti ori, taꞌa mageneeffachchoteꞌe anfeennexxa hinaaffe edo anfeennaxxinni hokkokisatiten. (Lel. 2:4, 5) Tenne egeꞌnatee ifi iitta hine qora dandeennannon: ‘Maxaafa Qullichcha yaansisateenna alalchatee afeennaxxi halcha qiiddee? Gubaꞌetee qophpheeffataannekinna maraanneki aadandeette? Ergatenshatee afeennaxxi hinaaffe qiiddee moo edishshanni hexxe? Ifi gammachchiissateꞌe assaannexxi yaanenna huje anenaaꞌni qeerraaxxa yanna adhdhitaꞌnee? Yookiin hedino anxa saamattaꞌnee?’ Konne qortumuwwi giddiiꞌni hiissichchi atiki mittekeenna eeti hiyyaake kaddoole, yannateꞌni ifi ciꞌlooꞌma gophphottole manfasiinxi hedho atixxi rakkoteꞌn ibbaashsha assitaaxxa gonphe affeettexxa leellishshaaxxe kada dandeettaan. Gonphe ifixxa injifata dandeꞌa gonphonnole, yookiin gonphe tinni Mageni gammadabaaxxa yaane hunjannoshsha assitoole, rankeꞌe geedhetika gargaarsa qodhdha hasissaan.

6. Jabaxxa cubbo hujeeki manji maa assa hasissa?

⁶ Dhugaaten, gubaꞌetenaaꞌni fulchinaashsha assitaaxxa mitte jabaxxa cubbo hujeeki manji hujeexxa cubbo gubaꞌetixxe geedheꞌni kula hasissaan. (1 Qo. 5:11-13) Mitti jabaxxa cubbo hujeeki manji Yihowwan welti afeexxa firunte higgeeni haaroonsedhateꞌe gargaarsi hasisaan. Yihowwa wodoti darrenaaꞌni gattowwaal hiyyaashsha “aadde aagatee kaddaaxxa huje” leellishsha hasissaan. (Huj. 26:20) Aadde aagatee kaddaaxxa huje hunjaannexxa leellinshshannoki, jabaxxa cubbo hunjanno wodda geedheteꞌni kulatiten.

7. Weli geedhetiki gargaarsi hasisaaki ayee manna?

⁷ Geedhe gargaartaꞌneeki jabaxxa cubbo hujeeke mana callabaan; manfasinxe hedhoni gopheeka mannanna gargaartaan. (Huj. 20:35) Fakkeennakeꞌe, elobaaxxa yorte injifata dandeettabexxochcho fakkatteeꞌnaa sodaattattoxxi hexxaan. Giddiiꞌninni elobaaxxa yorte injifata haꞌurtaaki, dhugaa barattebexxo edi darre hashiishuwwa fakkaattaaxxa yaanuwwa suuxatikanna pornogiraafe uuddaatike araada yookiin yabaabulle fakkaattaaxxe yaanuwwa kada dandeettaan. Tenneꞌaa weliinka gargaarsa qodhdha hasissaan. Atee yaadissaaxxa yaane caqasaaka, elo garinni gorsaakanna elobaaxxa yorte injifatteꞌe, Yihowwaa gammachchiisa dandeettattoxxa kokeessaaka mitte geercho haasoossa dandeettatton. (Mek. 4:12) Elobaaxxa yorte injifata dandeettabexxochcho ateꞌni fakkattaꞌnoole, iitta heda atinxi Yihowwan welti affeettexxa firunte lummisseꞌe uuddaattexxanna miketi iimi darre ifike jabeennaꞌni addattaabexxoxxa leellishaaxxa geedhe qalli hitattoshsha assitaan.—1 Qo. 10:12.

8. Hunjjannoxxe balleessaa duuchchiꞌaa geedhe haasoossa hasissa? Ifsi.

⁸ Hunjjannoxxe balleessa duuchchiꞌaa geedhe haasoossa hasissabaan. Fakkeennakeꞌe, hifattettexxi mitte dayyo mitaaxxa yaane haasottetten hino. Tennee yaane geedheteꞌni mare kulati irra, Yesuusi dayyuwwikinna dayyuwwa nageꞌiki hedhateꞌe uwweeka gorsa hujeteꞌni hosisa danddeettatton. (Mat. 5:23, 24) Ittan ossunte, shaqquntenna ifi hira irraan caala leellishshattoki hittate kaddeexxa egeꞌnateꞌe borreessiluwwa noꞌoxxa qoꞌnis. Dhugaaten, taꞌanna rakko atixxa tika dandeꞌa gophphottole, mitti geerchi atee gargaaroꞌaa qora dandeettatton. Phawuloosi Filphisiyuusike Kirsitaaniꞌaa borreseexxe daddaabbeꞌni Ewoodiyaanixxenna Sinxeekixxe oddoꞌni hexxeexxa weli aaggo gonphe, mitti summiki kulemeebaaki dayyi yaane tikaashsha ergeen.—Flp. 4:2, 3.

GEEDHE YEꞌEDHA HASISSEEKI MAYEETE?

9. Geedhe yeꞌedhatee shooka hasissaꞌnebaaki mayeete? (Fakkeenna 28:13)

⁹ Jabaxxa cubbo hunjanno wodda yookiin gonphe ifixxa injifata dandeꞌa gonphannoxxa yanna, geedhe noꞌoo gargaartaashsha qorateꞌe addenna jabeenni hasisaan. Shooki geedhe yeꞌeꞌnabeꞌnoshsha noꞌoo udumaa hiissoꞌaa waala hasissabaan. Mayee? Butotinna Yihowwa gubaꞌe giddo geedhe hexxaashsha asseeki manfasiinxe hedhonni dhibemmabeꞌnoshshanna jabaxxa adde anfannoshshaaten. Tenneꞌaa rakko noꞌoꞌni gelteexxa insaꞌneꞌni haasonnanno wodda isoonna akeette isixxa addantaannexxa leellinshannon. Toggitte kaddeexxa yaane assateꞌe gargaarsi isiki hasissaaxxa egenneennen. (Far. 94:18) Cubbo hunjennexxeꞌe aadde aangonnolenna cubbotike oranaaꞌni hingonnole Mageni noꞌaa gattoowwaali hiyyaan.—Fakkeenna 28:13 yaansis.

10. Cubbo hunjennexxa shoꞌa maa rakko affee?

¹⁰ Cubbo hunjennexxa geedheteꞌni kullonnole, Yihowwa noꞌaa gattowwaali hiyyaani ittan higgeeni isinni welti jaaloommannon. Cubbo hunje shoꞌnaannole kinni yaane yoxxaꞌni meꞌitaashsha assinannon. Mootichchi Daawiti, cubbo hujeexxa shoꞌatee woꞌlaaneexxa yanna, manfasiinxe hedhonninna yaadiki miidhemeemman, ittan ela-gopheemman. (Far. 32:3-5) Bisiinxe dhibo yookiin miidhdhama yannateꞌni ciꞌlooma gonphoole dhibo jabaattaꞌni metammashshanni, manfasiinxe hedhoxxi dhibonna yannateꞌni ciꞌlooma gonphoole iittan kaddaan. Yihowwa tennee egeꞌneemmaxxeꞌe, manfasiinxe hedhonni fayyinannoshsha assitaaxxe qophpheexxe sultonni isinni welti ‘mariꞌante rakko tinkannoshsha’ qoreen.—Isa. 1:5, 6, 18.

11. Jabaxxa cubbo huje shoꞌa welenna miidha dandeettaaki hittate?

¹¹ Jabaxxa cubbo hunje shoꞌnaannole, wele manjonna miinannoxxi hexxaan. Mageniinki manfasi gubaꞌe giddo hujabaashshanna mittunte dayyuwwatixxi laffaꞌni metaashsha assinannoxxi hexxaan. (Eff. 4:30) Gubaꞌe giddo hedheeki mitti manji jabaxxa cubbo hujeexxa egennonnole, ikki manji hujeexxa yaane gubaꞌetixxe geedheꞌni mare haasoꞌaashsha jajjabeessa hasissaan.a Weli manji hujeexxa jabaxxa cubbo shoꞌa, noꞌonna balleessanjo kandannoshsha assitaan. (Zel. 5:1) Yihowwaa anfeennexxi jaalala, mitti manji jabaxxa cubbo huje shoꞌaa wodda geedheteꞌni haasoonnannoshsha tirtirsitaan. Konne orinni gubaꞌetika caꞌinne heqqanna cubbo hujeeki manji Yihowwanni welti higgeenni jaaloomaashsha gargaarrannon.

GEEDHE NOꞌOO GARGAARTAAKI HITTATE?

12. Geedhe manfasiinxe hedhonni gopheeka manjo gargaartaaki hittate?

¹² Yihowwa manfasiinxe hedhonni gopheeka manjo geedhe gargaartaashsha ajajeen. (1 Te. 5:14) Balleessa hujjottole, geedhe qalbe atixxi giddo hexxeexxa yaane fulchite haasoottattoshsha assaaka qortuma qortaaxxi hexxaan. (Fak. 20:5) Nophphitettexxe aadanaaꞌninna ayyunte atixxenaaꞌni kexxeexxa yookiin hujjettexxa balleessa haasoꞌa shookissaꞌnoolenna, hexxeexxa yaane haasoꞌati geedhe kipha dandeettatton. Seeri beloxxa yaane haasoꞌannoni hite sodaattoxxeꞌe. (Iyo. 6:3) Geedhe mitte yaane iittateni hitteꞌe murteessati irra, xexxeꞌachchoti atee caqassaan ittan atee gorsitebaa edi darre duuchchiinxa yaane egeꞌnatee woꞌlaandaan. (Fak. 18:13) Insaꞌne hasisaaka gargaarsa mitte manjiꞌaa assa, yanna adhdhitaaxxe yaane kaddeexxa egenneꞌeen, tenneꞌaa mittendeꞌni yaane jijjiirendaani hine hendabaan.

13. Geedhe kadhatinna Maxaafa Qullichchakeꞌni hundeessemeeke gorsinni noꞌoo gargaartaaki hittate? (Fakketanna uudi.)

¹³ Gargaarsakee geedhe yexxatto wodda insaꞌne ifi balleessanjiinsha assiteꞌe heddattoshsha assitaaxxa yaane ateꞌni lebatee woꞌlaannabaan. Tenne irra insaꞌne atiꞌaa kadhantaan. Kadha insaꞌnexxi “lumoxxa hunna” affeexxa egendatto wodda manbeꞌa hitatton. Geedhe ateꞌni “Yihowwake summinni zayite issite” gargaartaan. (Yaq. 5:14-16) “Zayite” hiyyendeexxi yaane Mageniinxe dhugaatixxa Qaalen. Geedhe Maxaafa Qullichcha elo qicinni laꞌoonfateꞌe, miirtattoshsha, jabaatattoshshanna Yihowwani welti higgeeni jaaloondattoshsha gargaartaan. (Isa. 57:18) Maxaafa Qullichchakeꞌni hundeessemeeki gorsi insaꞌneki, toggitte kaddeexxa yaane assatee affeettexxa atixxa shenunte jabeessaan. Insaꞌne darreeꞌni Yihowwa hafuuri isikinni “Ori konneten. Isoꞌni meꞌi” hiyyaaꞌnaa laqa dandeettatton.—Isa. 30:21.

14. Gelaatiya 6:1 xxe hundaayyeshsha geedhe “fuggoke oraꞌni” meꞌaaka manjo gargaartaaki hittate? (Fakkuwwatanna uudi.)

¹⁴ Gelaatiya 6:1 yaansis. “Fuggoke oraꞌni” meꞌaaki Kirsitaani Mageniinke qullummatike seerixxe hundaayyeshsha meꞌabaan. Fuggoka ora hiyyaꞌneeki yaadi, seeri beloxxa murte yookiin Mageniinka seera saꞌne hunjaaxxa jabaxxa cubbo ifisaake kada dandeꞌaan. Kirsitaaniinxe gubaꞌexxi geedhe jaalala affeexxe kaddemmaxxeꞌe, “iitta hedheeka manjo shaqqeke manfasinni toggi assateꞌe” woꞌlaandaan. Giriketike laagadinni “toggi assa” hiyyende tikendeexxi hiyya, micci miliqeeki manji goge gatabaashsha miliqeeka micco bakkateꞌni hiissa hiyyaaka yaada ifissaaxxe kada dandeettaan. Mitti eloxxa dandeette afeeki ciꞌleessichchi adda qarasiisebaangi miliqeeka micco bakkateꞌni hiissateꞌe woꞌlaanammashsha, gubaꞌetixxi geedhenna lebbe qarassiissebaangi manfasiinxe hedhoxxe dhibonaaꞌni noꞌoo fayyisateꞌni miꞌlachcho assitaan. Ittan Maxaafi Qullichchi geedhe “ifi [heqqexxaashsha]” haasoꞌaan. Insaꞌne noꞌo dhugaatike oraꞌni jabaantannoshsha jajjabeessinaa wodda insaꞌne ifiꞌaanni qulliyye kandebaaxxanna dedha hunjaaxxa egenneꞌeen. Tenneꞌa gargaarraꞌneeke manji irra ifi qulliyye asine okkone manjoꞌni murteessinabaan. Tenne irra okkone manjiꞌaa mararte anfeexxa leellinshaan.—1 Ph. 3:8.

15. Rakko noꞌoꞌni geltaa wodda maa assa dandeennanno?

¹⁵ Gubaꞌetixxa Geedhe addata dandeennannon. Geedhe shasha noꞌoka welekeꞌni haasoottabaashsha, ifike yaadinni gorsati irra Maxaafi Qullichchiki gorsitaashshanna baꞌo noꞌoxxa baꞌeꞌxxeꞌe noꞌo gargaartaashsha leenjo insaꞌnaa uwwendeꞌeen. (Fak. 11:13; Gel. 6:2) Ayyunte insaꞌnexxinna hedhotixxi baranno gargariti hexxeexxe kaddoolenna, hoone geerchibaana shinqe noꞌoꞌni gelteexxa rakko haasoꞌa dandeennannon. Kaddomaleꞌe, noꞌo laqatee hansaannexxa yaane haasoꞌaaka geercho halsinaꞌni, mitte geercho gorsa qorrennechchi uduma wele geedhe qorraꞌni meꞌinaaꞌnon. Iitta assinaannexxe kaddoole, Mageniinxe Qaalexxa “toggitte barachcho” baratati irra ‘mansha isixxa qotaaka’ manjo halsammake manjishsha kandaannen hiyyoten. (2 Xi. 4:3) Noꞌoꞌni gelteexxa rakko mitte geerchoꞌni haasoonnannoxxa yanna, tennee yaane wele geedheꞌni haasoonnennexxanna ikki geerchi maa hiyyeexxa noꞌoo qoraaxxi hexxaan. Isi if heeshshi assaꞌneeka kademmaxxeꞌe wele geercho mare gorsa qora dandeꞌaan.—Fak. 13:10.

NOꞌO MITTI MITTINGI HEENEE MAGANNE ANFEENNE?

16. Noꞌo mitti mitting heenee maganne anfeenne?

¹⁶ Geedhe Mageniinka arda allalatixxa maganne affoolenna, noꞌaa murteessitabaan. Noꞌo duuchchiingi Magenokee jaalala anfeennexxa leellishaake oraꞌni hedhatixxa ifi ifinxa maganne anfeennen. Haasoonnennexxenna assinennexxe yaaneꞌaa Magenokee hissichcho uunannon. Isi eloxxa murte murteesseꞌnannoshshanna isiꞌa addatemmenneke kandannoshsha gargaaraan. (Rom. 14:12) Tenneꞌaa geedhe maa assinannoxxa noꞌaa kulati irra, Mageni mitte yaaneꞌaa afeexxa uushsho Qaale isixxenaaꞌni hubantannoshsha gargaartaan. Maxaafa Qullichchakeꞌni hundeessemeeka gorsa insaꞌneka hordofati, eloxxa murte murtessedhateꞌe “qalbeeffachchotixxa dandeette” noꞌoxxa leenjinsannon.—Ibr. 5:14.

17. Murte noꞌoxxi maachcho kada hasissa?

¹⁷ Noꞌo Yihowwake arda kadatixxa gargariti hexxeexxa mabite anfeennen! Yihowwa noꞌaa ergeeki “eloki allalsanji” Yesuusi, wodo noꞌaa kaffaleemmaxxeꞌe bari bariinxe hedhoka tasfa anfeennen. (Yoh. 10:11) Ittan Yihowwa: “Qalbe anxishsha hexxeexxa allalsano haꞌnoꞌaa uwwannon, insaꞌnenna egeꞌnatinna jabaxxe qalbeeffachchonni haꞌnoꞌo areerraan” hiyyeꞌe, aageexxa kako muuxaꞌneeki gubaꞌetixxe geedhe darreeꞌniten. (Er. 3:15) Manfasiinxe hedhonni gonphanno wodda yookiin dhibemmanno wodda gargaarsakee geedhe yeꞌedhatenaaꞌni udumaa hingonnoqqeꞌe. Yihowwa gubaꞌetixxe geedhe gamiiꞌni qophpheesseexxa qophphe woꞌma kadeeke orinni laꞌoonfanto.