Dayyuwwi—Gubaꞌetike Geercho Kadeꞌe Ergatematee Hiixattinaꞌnee?

1-2. Mitti geerchi hujaaxxi “eloxxi huje” heente?

TAꞌA gubaꞌetike ergatanjo kaddeꞌe ergatemateꞌni hexxottole, gubaꞌetike geercho kaddeꞌe ergatematee hasissaaxxa dandeettuwwa afatee, jabaxxa yaane assitattoxxi hexxaan. Tenne ‘eloxxe hujeꞌaa’ hiixata dandeettato?—1 Ximo. 3:1.

² Mitti geerchi hujaaxxi hujuwwa heente? Mitti geerchi lassatixxa, allalatixxanna barsiisatixxa huje hujaan, ittan haasoꞌikinna fakkeenniki gubaꞌe jajjabeessaan. Maxaafi Qullichchi jabaatteꞌe hujjaꞌneexxa geedhe ‘uwwate kadeeke manna’ hiyyaꞌneexxi heddo buutuwwa hexxeen.—Effe. 4:8

3. Mitti dayyi gubaꞌetike geercho kadeꞌe ergatematixxa dandeette afa dandeꞌaaki hittate? (1 Ximootwos 3:1-7; Tiito 1:5-9)

³ Gubaꞌetike geercho kaddeꞌe ergatematixxa dandeette afa dandeettattoki hittate? Geercho kadatixxi dandeette, mitte huje hujatee anfannoxxe dandeettenaaꞌni gargariti hexxeexxen. Heddo yanna buttateꞌni, mitti hujetiki akeekisanji hasaꞌneexxa hundaayye kaddeexxa hujetixxa dandeettuwwa mitti manji afeexxe kaddoole, huje alfa dandeꞌaan. Konnenaaꞌni gargariti hedheeke orinni, gubaꞌetike geercho kaddeꞌe baalloonsematee halchitaattole, lassatixxenna barsiisatixxe dandeettenaaꞌni caaldeexxa yaane assa hasissaan. 1 Ximootwosi 3:1-7 nna Tiito 1:5-9 qicoꞌni geedhetee kulendeexxa Qullitte Borroxxa dandeettuwwa wonsha hasissaan. (Xiqse yaansis.) Tenne qoꞌneꞌni sase umo kadeeke tooruwwinni geedhetenaaꞌn heqqendaaxxi yaane maachcho kaddeexxa mariꞌantannon: Tinniirinna gubaꞌeti giddonna gubaꞌeti gadho hedheeke mannaꞌni eloka summa afa, eloke maatetike umo kadannaa gubaꞌetee ergatematee fedhiitike kadaten.

ELOKA SUMMA AFA

4. “Ceeꞌminaachcho afebaake” hiyyo maa hiyyote?

⁴ Gubaꞌetike geercho kadeꞌe ergatematee ‘ceeꞌminaachcho affebexxo’ manjo kada hasissaan, tinninna meꞌichchi atiki ceeꞌminaaxxa yaane afeeke kada gophemmaxxeꞌe, gubaꞌe giddo eloka summa affatton. Ittin lebendaaxxa “gadho hedheeke mannaꞌni eloke summinni [egeꞌnendeeteke]” kada hasissaan. Addatabaaki manni Kirsitaanummatixxa adde atixxa busheessaaxxinna hedha dandeettaan. Kaddomaleꞌe, insaꞌne addatensha atixxa yookiin adaba atika busheessa dandeennaaxxi buuto hexxabaan. (Dani. 6:4, 5) Tenneꞌaa ‘gubaꞌe giddo yookiin gubaꞌeti gadho hedheeke mannaꞌni eloka summa afeenne?’ hitee ifi qori.

5. ‘Eloxxa yaane eetaatteke’ manjo kaddeettexxa leellisha dandeettattoki hittate?

⁵ Ati ‘eloxxa yaane eetaatteke’ manjo kaddoottole, welekeꞌninna eloxxa yaane uuddottaꞌa hassatton, ittan eloke adaba insaꞌnekeꞌe, insaꞌnee galateeffatatton. Matanga atenaaꞌni heqqendaaxxi iimi darre kaddoolenna welekee eloxxa yaane assa ateꞌe gammachchiissaan. (1 Tese. 2:8) Iitta hedheeki adabuwwi geedhetee haranga hasisaaken hinaanneki mayeete? Buutotinna insaꞌne baꞌlaxxa yanna gubaꞌe allalateenna uwwendeexxa huje hujatee laꞌoonfantaammaxxeeten. (1 Pheexi. 5:1-3) Kaddoolenna, insaꞌne welekee ergatematenaaꞌni alfinaaxxi gammashsho eloonnaaxxe elonaaꞌni caaldaaxxen.—Huje 20:35

6. ‘Keesumma adhdhitaatteke kaddeettexxa’ leellishshattoki mitti mitti oruwwi hoonte? (Ibraawiyaane 13:2, 16; fakke uudi.)

⁶ ‘Keesumma adhdhitaattexxa’ leellishshattoki, shiqike jaaluwwa atike kadebaake manniꞌaanna eloxxa yaane assitatto woddan. (1 Pheexi. 4:9) Mitte dhugeessatixxi borro, keesumma adhdhaaka manjo: “Mini isikixxinna qalbe isixxixxi hula, keesummatee banendeexxe kada hasissaan” hiteen. Ifi iitta hiteꞌe qori, ‘keesumma adhdhat egeꞌnemeennekee?’ (Ibraawiyaane 13:2, 16 yaansis.) Mitti keesumma adhdhaaki manji, keesumma daggeexxee afeexxa yaane uwwaaken. Fakkeennakeꞌe, manjokee uwwaaxxa yaane afebake manjo, gubaꞌe giddo jabaxxa yaane assaꞌneeka dayyuwwa, kunniirinna rogiinke iimike toꞌatalluwwanna ardiinka haasoꞌa shiqisatee dagaaka dayyuwwa mine keesunsaan.—Dada. 18:2-8; Fakke. 3:27; Luqa. 14:13, 14; Huje 16:15; Roome 12:13.

7. Mitti geerchi ‘maallaqa jaalalfataꞌnebaake’ kadeexxa leellishaaki hittate?

⁷ “Maallaqa jaalalfataꞌnebaaki.” Iitta hiyyo maalakee hasissaaxxe yaane callaꞌni miꞌlachcho assitabexxon hiyyoten. Dureessa yookiin hiyyeessa kaddoottolenna hedho atixxe duuchchaꞌni Mageniinxa mootumma edissatton. (Mat. 6:33) Yanna atixxa, hunnanna wele affeettexxa karra, Yihowwaa mageneeffatatee, mini hado atika karkarsateenna gubaꞌetee ergatematee laꞌoonfattatton. (Mat. 6:24; 1 Yoha. 2:15-17) Ifi Iitta hiteꞌe qori: ‘Maallaqakee afeennexxi uushsho hitta hexxeexxe? Hedhotee hasissaaxxe yaaneꞌni ititee hedhaane? Yookiin miꞌlachcho anxi maallaqakeꞌninna baca karra alfannoke oraꞌn calla?’—1 Ximo. 6:6, 17-19.

8. ‘Galduma atikenni miketike kaddeettexxanna ifi hirtaatteke’ kaddeettexxa leellishshattoki mitti mitti oruwwi hoonte?

⁸ ‘Galdumiki miketikennaa ifi hirtaatteke kaddottole’ hedho atixxeꞌni assitaattexxe yaane duuchchinni, miketike kaddatton hiyyoten. Iittanna hiyyo, mike belo itta, haꞌwa, oddoꞌwa, seefatannaa dayyeeffata gophate hiyyoten. Ati buttatixxe halchake garbabaan. (Luqa. 21:34; Yaꞌiqo. 4:4) Weli manji ateꞌe hifachchiissaaxxa, seeri beloxxa yaane haasoꞌa wodda miira manjo kaddeettexxa leellishshatton. “Machchoꞌallo” haꞌwe goddabaake hiyyaaka summa afa hasissabaan. Ifi iitta hiteꞌe qori: ‘Hedhaanneki galdumiki miketike kadeennexxannaa ifi hiraanneke kadeennexxa leellishaake garinnitee?’

9. ‘Eloxxa hedino afeekennaa seeriki meꞌaake’ manjo hiyyo maa hiyyote?

⁹ ‘Eloxxa hedino afoottole’ mitte yaane Maxaafi Qullichchiinke hundayyetike seeraꞌni hundeessende xexxeꞌachchoti firfirsitatton. Konnee Maxaafi Qullichchiinka gorsa hujeteꞌni hosinsaaki hittate kaddeexxa egendeetten, tinninna qalbeeffachchonna beekkuma affattoshsha ateꞌe assiteꞌeen. Murteteꞌe muddandabexxon. Tenne irra hasisaaka tarja duuchcha affeettexxa kokkeessitatton. (Fakke. 18:13) Tennenaaꞌn kexxeexxa, Yihowwaxxa hedino affeettexxa leellishshaaxxa miketixxa murte murteessexxatton. ‘Seerik meꞌitaatteke’ manjo kaddootole ifi seeriki akeekkattokenna saate ulfeessitaatteke manjo hiyyoten. Addatenshatinna akeette hordofati egeꞌnendeetten. Iitta hedheeki adabuwwi, manji edo eloka summa affattoshsha gargaaraan. Eloke maatetike umo kadati, Qullitte Borroxxa dandeette wonshitattoki hittate kaddeexxa mariꞌanto.

ELOKE MAATETIKE UMO KADA

10. Mitti manji ‘maate ifixxa elo garinni galchaꞌneexxa’ leellishaaki hittate?

¹⁰ Miniinke anna kaddotolenna geercho kadatee hassaattole, maate atixxi affeeki summi geercho kadatixxa dandeette atixxa tuqaan. Tenneꞌaa ‘maate atixxa elo garinni galchitaatteke’ manjo kada hasissaan. Jaalalatikenna magannetee lumoxxa bakka uutaatteke, maatetike umo kadati eloka summa afa hasissaan. Tenneꞌaa duuchchiinxe mageneeffachchotixxe kutaꞌni afemati fakkeenna kaddatton. Tinni haranga hasisseeki mayeete? Hawaarya Phawuloosi iitta hiyyee qoreeni: “Mitti manji maate ifixxa galchaa qico egeꞌna gophoole, Mageniinxa gubaꞌeta hitta karkarsa dandeꞌa?”—1 Ximo. 3:5.

11-12. Mitti manjike mini hadixxe unaki adabi, geercho kadatixxa dandeette isixxa tuqaaki hittate? (Fakke uudi.)

¹¹ Anna kaddoottole, shiixxaramma atixxi “oose ajajeendaaxxenna siggiteexxe” kada hasissaan. Insaꞌnee jaalalati barsiisanna leenjisa hasissaan. Dhugaaten, insaꞌneenna wele ooseshshanni osoꞌlanna geeba gammachchiissaan. Kaddomaleꞌe atixxe eloxxe leenjonaaꞌni kexxeexxa, oose atixxi ajajeendaaxxe, wele ulfeessitaaxxennaa eloka adaba affeexxe kaddaan. Ittan Yihowwan welti affeexxa firunte jabeessexxaashsha, Maxaafi Qullichchiinke hundaayyetike seerishsha hexxaashshanna cuuphendaashsha gargaarateꞌe dandeettettexxa duuchcha assa hasissaan.

¹² “Adaba baꞌnetinna jalloti kuꞌlendabaaxxa addattaaxxa oose afeeki.” Mitti addataꞌneeki belti jabaxxa cubbo hujaa wodda, tinni yaane anna isika tuqqaaki hittate? Konne beltiki anni, belto isika leenjisateenna xixatee balalli hiyyeexxe kaddoole, gubaꞌetike geercho kadeꞌe ergatematee dandeette wonshabaaxxi hexxaan.—Onkoleessa 15, 1996, keꞌni fuldeexxa Heqqecatixxa Xellepho, qoola 21, deero 6-7 uudi.

GUBAꞌETEE ERGATEMA

13. ‘Yaane baꞌlisse uuddaattekennaa,’ ‘ifike yaadinni calla meꞌitaabexxoke kaddeettexxa’ leellishsha dandeettattoki hittate?

¹³ Kirsitaaniinka eloka adabuwwa afeeki dayyuwwi gubaꞌetee laꞌo afeen. ‘Yaane baꞌlise uudaaki’ manji nageellichchaken. Yaane baꞌlise uudatee hasaake manjo kadatee hassaattole, weli manji haasoꞌaaxxa yaane caqasi, ittan weliinka yaada adhdhi. Fakkeennakeꞌe, geercho kaddeꞌe mitte yaadiꞌa geedheti bukki hiteete hino. Bukkii tenneꞌni Maxaafi Qullichchiinke seeranaaꞌn yookiin hundaayyetike seeranaaꞌn saxxebaa qicoꞌni, heddo geedhe weli aaggeexxa murte kiphatee fedhiitike kaddato? ‘Ifike yaadinni meꞌa gophate’ hiyyo, mitte yaane ati hassaatteke ori callinni hujendaashsha nunnussa gophate hiyyoten. Heddi manjika gorsa laqa laꞌo affeexxa egendeetten. (Dada. 13:8, 9; Fakke. 15:22) Ati “loolendattoke” yookiin “hiffattichcha” kada hasissabaan. Wele jibbaakenna weliinka yaada adhdhabaake manjo kadati irra shaqqakenna maliinke manjo kadi. Nageellichcha manjo kaddeettaxxeꞌe, haꞌuraange jeeji giddo nageꞌa dadat fakkeenna kadi. (Yaꞌiqo. 3:17, 18) Eloki atiki haasoꞌi weli manjixxa qalbe, ittan noꞌo addantaannexxa yaane moromaꞌneeke mannixxa qalbenna shaqqisa dandeꞌaan.—Mesa. 8:1-3; Fakke. 20:3; 25:15; Mat. 5:23, 24.

14. “Haarooke Kirsitaana kadoqqe” nna “addatemeeke” hiyyo maa hiyyote?

¹⁴ Mitti geercho kadaaki dayyi “Haarooke Kirsitaana” kada hasissabaan. Cuuphendettexxenni qeerraaxxi wogga saꞌa hasissaani hiyyatenna kada gophphoole, galfatee Kirsitaana kadatee yanna hasissaan. Geercho kaddeꞌe baalloonsendebexxochchi edi darre, Yesuusishsha ifi heeshshi assitaattexxanna gubaꞌe giddo hujjottaa hassattexxe hujeꞌaa, ossitettexxi Yihowwaa heqqexxaattexxa leellishsha hasissaan. (Mat. 20:23; Filph. 2:5-8) Yihowwaa “addatendeꞌe” hedhat, qullichcha seera isikanna orga isixxi darreeꞌni uwwendaꞌneexxa akeette hordofati, addatendeetteke kaddeettexxa kokeessa dandeettatton.—1 Ximo. 4:15.

15. Mitti geerchi ardiinka haasoꞌa shiqisat haranga saademeeke kada hasissaa? Mayee?

¹⁵ Maxaafi Qullichchi iimiki toꞌatalluwwi “barsiisatixxa dandeette” afa hasissaaxxa haasoꞌaan. Iitta hiyyo ardiinka haasoꞌa shiqisat haranga worba kada hasissaani hiyyotee? Waawwot. Heddo geedhe saadisaaka ardiinka haasoꞌa shiqisatixxa dandeette afa gophphoolenna ergachchoteꞌninna allalatixxe hujeꞌni, elo qico barsiisatixxa dandeette affeen. (1 Ximootwosi 3:2; 1 Qorontoosi 12:28, 29 nna Effesooni 4:11 welti hokkokisiis.) Kaddoolenna, barsiisanjo kaddettaxxeꞌe, dandeette atixxa nossedhatee kuta belo woꞌlaancho assa hasissaan. Tennee yaane assa dandeettattoki hittate?

16. Eloke barsiisanjo kada dandeettattoki hittate? (Fakke uudi.)

¹⁶ “Addatendeexxa hiyya xexxeꞌachchot hordofa.” Eloke barsiisanjo kadatee, barsiissaattexxi yaanenna gorsi uutaatteki Mageniinxe Qaaleꞌni hundeessemeeke kada hasissaan. Tennee assatee Maxaafa Qullichchanna Maxaafa Qullichchakeꞌn hundeessendeexxa borreessiluwwa noꞌoxxa qoꞌnisa atenaaꞌni heqqendaan. (Fakke. 15:28; 16:23.) Qoꞌnissatto wodda borroteꞌni xiqse ifisendee garinni, hujeteꞌni hosisa dandeettattoki hittate kaddeexxa xexxeꞌachchoti hedi. Ittan barsiissatto wodda barsiissaattexxi yaane caqasaa mannixxa qalbe tuqqaashsha jabaxxa woꞌlaancho assi. (1 Ximo. 5:17) Eloxxa dandeette affeexxe geedhenaaꞌni gorsa qodhdhitaattolenna hujeteꞌni hosissaattole, barsiisatixxa dandeette atixxa nossedha dandeettatton. Geedhe gubaꞌeteꞌni hexxeexxa dayyuwwa insaꞌnexxa “jajjabeessa dandeettaaxxe” kada hasissaan. Kaddomaleꞌe, geedhe mitte mitte wodda gorsa yookiin “xixichcho” uwwa hasissaan. Yaane iittate kaddoolenna, insaꞌne duuchchinii wodda dayyuwwa elo garinni abida hasissaan. Shaqquntet, jaalalat, ittan barsiissaattexxi yaane Mageniinxe Qaaleꞌni hundeessendeexxe kaddoole, Lumoke barsiisanjika Yesuusika fakkeenna hordoffaattaxxeꞌe gumma gummissatton.—Mat. 11:28-30; 2 Ximo. 2:24.

HIIXATA ITTIN EDIꞌAA SUF

17. (a) Gubaꞌetiki ergatanjuwwi hiixata ittin ediꞌaa sufaashsha gargaartaaxxi yaane maachcho? (b) Gubaꞌetixxi geedhe dayyuwwi geedhe kadeꞌe baalloonsemaashsha shiqisatee memmekissaa wodda, qalli hiyya hasissaaxxi yaane maachcho? (“Wele Memmekissatto Wodda Miketike Kadi” hitaꞌneexxa kollo uudi.)

¹⁷ Mitti mitti gubaꞌetiki ergatanjuwwi, geedhe kadatee afeexxa dandeette ifixxa hedeechchi uduma, hasissaaxxa dandeette afebaachcho fakkaattaaxxi yanna hexxaan. Kaddomaleꞌe, Yihowwanna orga isixxi adabuwwa konnee mittinna gatebaangi, leellishshottaaꞌa atenaaꞌni heqqitaꞌnebaaxxa qalli hiyyi. (1 Pheexi. 2:21) Ittan Yihowwaki qullichchi manfasi, tennee dandeettuwwa nossexxattoshsha gargaaraan. (Filph. 2:13) Jijjiiratee hassaatteki mitti adabi hedhee? Tennee yaane uuddaaxxa Yihowwabaa kadhat. Adaba okkoneꞌni qoꞌne assi, ittan geedheti giddiiꞌni mitti manji konnee adaba jijjiirtattoki hittate kaddeexxa yaada uwwaashsha qori.

18. Duuchchiingi gubaꞌetiki ergatanjuwwi maa assa hasissa?

¹⁸ Noꞌo duuchchiing, ittan gubaꞌetike geercho kadeꞌe ergatemaꞌneeki, tenne qoꞌneꞌni mariꞌantenneka adabuwwa nossedha ittin ediꞌaa sunfo. (Filph. 3:16) Ati gubaꞌetike ergatanjo? Nophphichcho assa ittin ediꞌaa sufi! Isiꞌaa ergatemateꞌninna gubaꞌetee laꞌo affeetteke manjo kaddattoshsha, Yihowwa ateꞌe leenjisaashshanna qarsaashsha kadhat. (Isa. 64:8) Gubaꞌetike geercho kadatee assitinnaꞌneexxa woꞌlaancho Yihowwa dinbiliqqi asse eebbisowwaal.