Dayyuwwi—Gubaꞌetike Ergatanjuwwa Kadatee Hiixattinaꞌnee?

1. Hawaarya Phawuloosi, gubaꞌetike ergatanjuwwiꞌa maa uushsho afeemmaꞌa?

GUBAꞌETIKI ergatanjuwwi gubaꞌe giddo heddo laꞌo affeexxa huje hujaan. Hawaarya Phawuloosi konnee addatemeeka manna qalbe mittenni saadaamman. Fakkeennakeꞌe, Filphisiyuusi hedhemmake Kirsitaanaa daddaabbe borreesseemma wodda ergatanjuwwakeenna geedhetee gargariti assee nageꞌa dhaameemman.—Filph. 1:1.

2. Dayyi Liꞌusi gubaꞌetike ergatanjo kadatixxa maganne uudaammaki hittate?

² Dargaggeeyyenna kaddo heddi cimeeki cuuphemeeki dayyuwwi gubaꞌetike ergatenjo kadati yoꞌoxxa gammashsho alfeen. Fakkeennakeꞌe, Devini gubaꞌetike ergatanjo kade baalloonsemeeki 18 woggaꞌniten. Wele darrenaaꞌni kinni, Liꞌusi hiyyemaaki dayyi baalloonsemeeki 50 wogganaaꞌni saꞌeeten. Isi heddi manjixxa hedino iitta hiyyee ifiseen, “Giddiiꞌninni gubaꞌe giddo hedheeki duuchchiingi aneꞌe eeyyaꞌneexxa leellishaa wodda konne orinni gubaꞌetike ergatanjo kadeꞌe, dayyuwwa anxeꞌe ergatema yoꞌoshsha gammadannoshsha assiteen!”

3. Hooneꞌe qortumuwwa uundano?

³ Cuuphendeetteke dayyo kaddeꞌe gubaꞌetike ergatanjo kada gophphoottole, konne herregaꞌni geya dandeettatto? Konne herregaꞌni geya gophphoottole, konne herregaꞌni geltattoshsha ateꞌe tirtirsitaaxxi yaane maachcho? Ittan wonsha atenaaꞌni heqqendaaxxi Qullitte borroxxi dandeettuwwa heente? Tenne qoꞌneꞌni konne qortumuwwika hiissichcho uundannon. Edinsennexxi gubaꞌetike ergatanjuwwixxi huje maachcho kaddeexxa uundo.

GUBAꞌETIKE ERGATANJUWWIXXI HUJE MAACHCHO?

4. Gubaꞌetike ergatanjuwwixxi huje maachcho? (Fakke uudi.)

⁴ Gubaꞌetiki ergatanjuwwi, gubaꞌe giddo hujendaaxxa heddo huje hujati geedhe gargaaraashsha, manfasi qullichchiki baalloonsemeeke cuuphemeeke dayyuwwan. Mitti mitti gubaꞌetiki ergatanjuwwi, gubaꞌe giddo geltaaxxi lassatixxi killilenna ergachchotee kaddaaxxi borreessiluwwa hexxeexxa kokaan. Weli kinni Bukkiitika Galma caꞌa assatixxanna karkarsatixxa huje gargaaraan. Ittan lebendaaxxa, gubaꞌetiki ergatanjuwwi bukkiitixxa yanna dagaaka manna keesunsaan. Hafuuriinkanna viidiyotika miyuwwa bannaan. Gubaꞌetiki ergatanjuwwi hujaꞌneexxi heddo huje haranga laꞌo affeexxen. Kaddoolenna, duuchchiinxi iimi darre laꞌo affeexxi gubaꞌetiki ergatanjuwwi, Yihowwaa eeyyatenna isike qullummatike seerishsha hedhaten. Ittan Kirsitaana kaddeexxe dayyuwwa insaꞌnexxee jabaxxa jaalala anfeen. (Mat. 22:37-39) Mitti cuuphemeeki dayyi gubaꞌetike ergatanjo kadateꞌe hiixata dandeꞌaaki hittate?

5. Mitti manji gubaꞌetike ergatanjo kadatike herregaꞌni geyatee hiixata dandeꞌaaki hittate?

⁵ Maxaafi Qullichchi mitti manji gubaꞌetike ergatanjo kadeꞌe baalloonsematee wonsha hasissaaxxa dandeettuwwa ifisaan. (1 Ximo. 3:8-10, 12, 13) Atinna tenneꞌe Qullitte Borroxxa dandeettuwwa qoꞌnisatinna dandeettuwwa tennee wonshatee jabaxxa woꞌlaancho assati, bakka tenneꞌni geyatee hiixata dandeetatton. Kaddomaleꞌe, mitti manji gubaꞌetike ergatanjo kadateꞌe hasaꞌneeki mayeete kaddeexxa ifi qora hasissaan.

GUBAꞌETIKE ERGATANJO KADDATTOSHSHA ATEꞌE TIRTIRSITAAXXI YAANE MAACHCHO?

6. Dayyuwwa atikeennna dayyuwwa atixxeꞌe hoone garinninna ergatendattoshsha ateꞌe tirtirsitaaxxi yaane maachcho kada hasissa? (Matwoosi 20:28; gogakeꞌni hexxeexxa fakke uudi.)

⁶ Lumoke fakkeenna noꞌoke kadeeka Yesuusii tirtirsitaammaxxi jaalalaten. Tinni jaalalanna anna isikeenna manjokeꞌe afeexxe jaalalamman. Tinni jaalala jabaate hujaashshanna welekeꞌe hiyyaa wodda ifi heeshshi assa hasissaaxxa huje hujaashsha assiteen. (Matwoosi 20:28 yaansis; Yoha. 13:5, 14, 15) Ateenna tirtirsitaꞌneexxi jaalalate kaddoole, Yihowwa ateꞌe eebbisaan, ittan hasissaaxxa dandeette wonshiteꞌe gubaꞌetike ergatanjo kadatike herregaꞌni geltattoshsha gargaaraan.—1 Qoro. 16:14; 1 Pheexi. 5:5.

7. Ifika umo calla eeyyatixxe halchanaaꞌni bayyata hasisseeki mayeete?

⁷ Buttateꞌni heddo yanna, aneꞌe uudde uudde hiyyaaki manji saademaan. Yihowwaxxe orga giddo kinni iittatebaan. Yesuusishsha welekeꞌe jaalala afeeki mitti dayyi, wele moꞌateꞌe hasabaan, ittan wele manji irra laꞌo afeeshsha asseꞌe ifi uudabaan. Wele moꞌatee yookiin welekeꞌni leellateꞌe hasaaki manji gubaꞌe giddo baalloonsemeexxe kaddoole, Yihowwaka gedhebo karkarsateꞌe ifi heeshshi asse huja hasissaaxxa yaanuwwa huja gibaaxxi hexxaan. Dedha tennee hujuwwa tuffataaxxi hexxaan. (Yoha. 10:12) Yihowwa ayyinna hollatinna umo ifika calla eeyyati assaꞌneexxa woꞌlaancho eebbisabaan.—1 Qoro. 10:24, 33; 13:4, 5.

8. Yesuusi hordofooleeyye isixxa maa hiyyee gorseemmaꞌa?

⁸ Matanga Yesuusiki shiqiki jaaluwwi midde toggichcha kadebaake orinni baalle alfatee yoreemmaxxi yanna hexxemman. Lame Yesuusixxi hawaaryaate, Yaꞌiqoobinna Yohaannisi assineexxa yaane uundo. Insaꞌnenna Yesuusi Mootumma isixxeꞌni gargariti hexxeexxa bakka insaꞌnaa uwwaashsha qorreemman. Yesuusi yorte insaꞌnexxeꞌni gammadeemmabaan. Tenne irra duuchchiinxa 12 hawaaryaate isixxa iitta hiyye gorseemman: “Haꞌno giddiiꞌni lumoke kadoꞌa hasaꞌneeki duuchchi, ergatanjo haꞌnooke kada hasissaan. Ittan haꞌno giddiiꞌni edo hedhoꞌa hasaꞌneeki duuchchi, duuchchingike garba kada hasissaan.” (Marqo. 10:35-37, 43, 44) Toggitte halchanni keꞌe welekee ergatematee woꞌlaancho assaꞌneeki dayyuwwi gubaꞌetee eebbate kadaan.—1 Tese. 2:8.

WELEKEꞌE ERGATEMATIXXA HALCHA ATIXXA JABEESITAAXXI YAANE MAACHCHO?

9. Welekeꞌe ergatematixxa halcha atixxa jabeessedha dandeettattoki hittate?

⁹ Yihowwa eetaattexxinna welekeꞌe ergatematee hassaattexxi egeꞌnendeexxen. Kaddoolenna, gubaꞌetike ergatanjuwwinaaꞌni heqqendaaxxa huje hujatixxi halcha heenoꞌma dandeettaan. Welekeꞌe ergatematixxa halcha jabeessedha dandeettattoki hittate? Dayyuuwwa atixxeꞌe ergatemati alfitattoxxa gammashsho heddettelenaꞌa? Yesuusinna: “Adhdhati irra uwwa caaldeexxa gammashsho affeen” hiyyeen. (Huje 20:35) Isinna iittanni assaamman. Isi welekeꞌe ergatemati gammashsho alfemmashshanni atinna alfa dandeettatton.

10. Yesuusi welekeꞌe ergatemati gamadaꞌneexxa leellisheeki hittate? (Marqoosi 6:31-34)

¹⁰ Yesuusii welekeꞌe ergatema gammachchiissaammaxxa leellishaaka fakkeenna uudi. (Marqoosi 6:31-34 yaansis.) Mitte yanna Yesuusinna isixxi hordofooleeyye yoꞌoshsha gonpheemman. Insaꞌnenna hafuura adhdhatee manji hedhebaaxxe bakkabaꞌa meꞌateꞌni heꞌnemman. Kaddomaleꞌe, ardi Yesuusinaaꞌni barachcho alfatee hiyyeexxi ettene bakkaꞌni insaꞌnaa edisee geyeemman. Yesuusi barsiisa giba dandeꞌamman. Wele waalinni, isinna hordofooleeyye isixxi “sagale itandee yanna [anfeemmabaan].” Yookiin, Yesuusi mitte lame yaane calla barsiiseexxi arda geegeessa dandeꞌamman. Kaddomaleꞌe, isoo tirtirsitaꞌneexxi jaalalate kaddemmaxxeꞌe “heddo yaane insaꞌnee barsiisa safeen.” Ittan “bogi hashsha shiqaa qicoꞌni” insaꞌnee barsiisa ittin sufeen. (Marqo. 6:35) Isi tenne yaane asseeki, assa hasissammanxee calla kaddebaangi “insaꞌnaa [yaadaammaxxeeten].” Isi insaꞌnee barsiisatee haseeki insaꞌnaa jaalala afemmaxxeeten. Welekeꞌe ergatema Yesuusii yoꞌoshsha gammachchiissaamman.

11. Yesuusi isoo caqasaammaka manna hasissaaxxe yaanenni gargaareeki hittate? (Fakke uudi.)

¹¹ Yesuusi arda barsiisee wodda barsiisa calla kaddebaangi wele yaanenna asseemman. Maalakee hasissaaxxa yaanenna insaꞌnaa qophpheesseemman. Isinna masoti sagale qophpheesseen, okkooꞌni hordofooleeyye isixxinna ardakee qooddeen. (Marqo. 6:41) Isi tenne yaane assati, hordofooleeyye isixxi welekeꞌe ergatendaa qico barsiiseen. Yesuusi manjo hasisaa garinni gargaara hasissaaxxa leellisheeki ori, gubaꞌetike ergatanjuwwiꞌaanna laꞌo afeeke kada dandeꞌaan. Yesuusi masoti qophpheesseexxa tennee sagale ‘duuchchiingi ite goddaa’ qicoꞌni qoodati isinni hujjaammaxxi hordofooleeyye hittee qico gammaddaaxxa hedi! (Marqo. 6:42) Dhugaaten, Yesuusi ifixxe halcha irra weliinxa ediseeki tennee yannna callabaan. Hedho isixxa duuchcha buttateꞌni saꞌisseeki manjo gargaarateꞌniten. (Mat. 4:23; 8:16) Yesuusi wele barsiisatinna ifi heeshshi assati welekeꞌe hasissaaxxa yaane wonshat gammadaamman. Atinna umo ifika calla eeyyabelo, gubaꞌetike ergatanjo kadateꞌe woꞌlaancho assati caaldeexxa gammashsho alfitattoxxi mama affeexxe yaanebaan.

12. Noꞌo giddiiꞌni ayyinna gubaꞌe gargaaratixxa dandeette anfebeꞌnoni hineꞌe heda hasissaꞌnebaaki mayeete?

¹² Gargariti hexxeexxa dandeette affebexxochcho fakkaattaꞌnoole adde woxxoxxeꞌe. Gubaꞌete laꞌo affeexxa yaane assitattoxxa dandeette affattoxxa mandoxxeꞌe. Phawuloosi 1 Qorontoosi 12:12-30 qicoꞌni borreesseeka yaada yaansis, ittan konne yaadanaaꞌni laꞌo alfa dandeettattoshsha Yihowwa gargaaroꞌa kadhat. Kunni Phawuloosi haasoꞌeeki yaadi, atinna heene Yihowwaxxe ergantooleeyyeshshanni, gubaꞌetee hasissaaxxanna laꞌo affeexxa yaane assa dandeettattoxxa ifisaan. Taꞌa gubaꞌetike ergatanjo kadde ergatematixxa dandeette wonsha gophphoottole adde woxxoxxeꞌe. Tenne irra Yihowwaa ergatemateenna dayyuwwa atikeꞌe laꞌo affeexxa yaane assateꞌe dandeettettexxa yaane duuchcha assiteettelenaꞌa? Gubaꞌetixxi geedhe heene hujenna atiꞌa uutaa wodda dandeette atixxi iimi darre hexxeexxa yaane hujjottaa uutabaaxxa addat.—Roome 12:4-8.

13. Baalloonsemeeke dayyuwwixxa dandeette uuddaaxxa egeꞌna hasissaaxxi yaane maachcho?

¹³ Gubaꞌetike ergatanjo kadatee hasissaaxxa dandeette wonshedhate woꞌlaancho assa, hasisseeki mayeete kaddeexxa leellishshaaxxa heenooxxa buutuwwa uundo: Heddo dandeettuwwa duuchchiingi Kirsitaani afa hasissaaxxen. Duuchchiingi Kirsitaani Yihowwabaa shiqa, uwwati gammashsho alfanna Kirsitaanummatixxe hedhonni eloke fakkeenna kada hasissaan. Mitti dayyi herrega konneꞌni geyatee maa assa dandeꞌa?

HERREGA KONNEꞌNI GELTATTO QICO

14. “Sigga” hiyyo maa hiyyote? (1 Ximootwosi 3:8-10)

¹⁴ 1 Ximootwosi 3:8-10, 12, keꞌni mitte mitte kulendeexxa dandeettuwwa uundo. (Xiqse yaansis) Mitti gubaꞌetiki ergatanji “sigga” manjo kada hasissaan. Kunni yaadi “ulfinni hasisaake,” “gaachchanna afeeke,” yookiin “ulfeessemeeke” hiyyemeꞌe tikema dandeꞌaan. Iitta hiyyo kinni ijjenda osoldabexxo yookiin manjiki geebbabexxon hiyyotebaan. (Meki. 3:1, 4) Kaddomaleꞌe, duuchchiinxa maganne lummisseꞌe uuda hasissaan. Addatendeetteke manjo kaddoottole gubaꞌe giddo ulfeessendatton.

15. “Lame afoꞌo haasoꞌa gopha” nna “seeri beloxxa laꞌo alfatee haafata gopha” hiyyo maa hiyyote?

¹⁵ “Lame afoꞌo haasoꞌa gopha” hiyyo qajeela, dhugichchanna addatemeeke kadate hiyyoten. Atinna haasoottettexxa yaane heqqedha hasissaan, ittan welenna soba hasissabaan. (Fakke. 3:32) ‘Seeribeloxxa laꞌo alfatee haafata gophate’ hiyyo manjiki welti hujjaattexxe hujeꞌninna maallaqa abiddaatteke garaꞌni dhugichcha kada hasissaan hiyyoten. Seeribeloke orinni maallaqa alfatee addetika jaaluwwa laꞌoonfata hasissabaan.

16. (a) “Yoꞌoxxa woyinetixxa xajje haꞌwa [gophate]” hiyyo maa hiyyote? (b) “Caꞌichcha wodana” hiyyo maa hiyyote?

¹⁶ “Yoꞌoxxa woyinetixxa xajje haꞌwa [gophate]” hiyyo miketi iimi darre alkoole haꞌwa gopha yookiin haꞌwallo hiyyaaka summa afa gophate hiyyoten. “Caꞌichcha wodana” afate hiyyo Yihowwake qullummatike seerishsha hedhate hiyyoten. Qullichchanna kada gophphottole Mageniki affeettexxe firuntenaaꞌni kexxeexxa nageꞌa alfa dandeettatton.

17. Mitti dayyi ‘dandeette afeesha hega uudemaa’ wodda addatemeeke kadeexxa leellisha dandeꞌaaki hittate? (1 Ximootwosi 3:10; fakke uudi.)

¹⁷ ‘Dandeette afeexxa hega uudemate’ hiyyo uwwendeexxe maganneꞌa addatendeetteke kaddeettexxa leellishsheetten hiyyoten. Tenneꞌa geedhe huje uutaa wodda, gorsa insaꞌnekanna orgati darrenaaꞌni uwwendaꞌneexxa akeette xexxeꞌachchoti hordof. Mitte huje atiꞌa uwwendaa wodda ati maa assa hasissaaxxanna haano muuxa hasissaaxxa koki. Huje uwwendeexxa duuchcha jabaatte hujjaattexxe kaddoole, gubaꞌe giddo hedheeki weli manni ati assitaattexxa yaane hubataan, ittan eloka nophphinjo atika saadaan. Geedhe, cuuphemeeka dayyuwwa leenjisatee dammaqqineeke kadde. (1 Ximootwosi 3:10 yaansis.) Gubaꞌe haꞌnooxxi giddo tomme wogganni iimiꞌaa hedheeki yookiin dargagge kadeeki cuuphemeeki dayyuwwi hedhee? Ifixxa Maxaafi Qullichchiinxe qoꞌnexxa aada anfee? Yookiin gubaꞌetee elo qicinni qophpheeffantaꞌnee? Gubaꞌe giddo duuchchinii wodda yaada uunaꞌnee? Ittan ergachcho fullaꞌnee? Iittate kaddoole, wogga insaꞌnexxinninna jeeji insaꞌnekinni metaaxxa huje insaꞌnaa uwwe. Konne orinni tinni dargaggeeyye ‘dandeette affeexxe kaddeexxa hega uudendaan.’ Okkooꞌni tomme woggake muuxamibaa gubaꞌetike ergatanjo kadatixxa dandeettuwwa wonsha dandeennaan.

18. ‘Kuꞌlemaaxxa yaane afa gophate’ hiyyo maa hiyyote?

¹⁸ ‘Kuꞌlemaaxxa yaane afa gopha’ dharikite kaddebaaki dhugaati ateꞌe kuꞌlinaaxxi yaane hexxabaan hiyyoten. Dhugaaten, Kirsitaani dhariki kuꞌlemaaxxi hexxaan. Yesuusi dhariki kuꞌlemeemman, ittan hordofooleeyye isixxeꞌninna iitta hexxeexxi yaane geltaaxxa haasoꞌeemman. (Yoha. 15:20) Kaddomaleꞌe meꞌichchi atikinna Yesuusikishsha eloke kadoole, gubaꞌe giddo eloka summa affatton.—Mat. 11:19.

19. “Mitte miniinxa ama afeeke” hiyyo maa hiyyote?

¹⁹ “Mitte miniinxa ama afeeke.” Aaxxeetteke kaddoottole, Yihowwa mitti labbaki mitte meyyaxxa—hiyye bultetee fulcheeka keꞌitiinka seera heqqedha hasissaan. (Mat. 19:3-9) Mitti Kirsitaana kadeeki manji ijjenda yabaabula yookiin saaliinxa baalagunte muuxa hasissabaan. (Ibra. 13:4) Assitabexxoxxi wele yaanenna hexxeen. Miniinxe ama atixxee addatendeeteke kada hasissaan, ittan wele dubarteꞌa seeri beloxxa miꞌlachcho uwwa ijjenda hasissabaan.—Iyyo. 31:1.

20. Mitti dayyi maate ifixxa “elo garinni” galchaaki hittate?

²⁰ “Oose ifixxanna maate elo garinni galchaaki.” Ati maatetike umo kaddoottole, tenneꞌe maganne lummise uuda hasissaan. Duuchchinii wodda mini hadixxa mageneeffachcho akeeki. Dandeesissee qicoꞌni duuchchiinxe mini hadixxe unanni higge-higgeen ergachcho fuli. Oose atixxi ifixxa Yihowwanni welti affeexxa firunte jabeessexxaashsha gargaar. (Effe. 6:4) Mini hado ifika karkarsaaki manji gubaꞌetanna karkarsa dandeꞌaaxxa leellishaan.—1 Ximootwosi 3:5 welti hokkokisiis.

21. Taꞌi qicoꞌni gubaꞌetike ergatanjo kada gophphoottole maa assa dandeettatto?

²¹ Dayyuwwi taꞌi qicoꞌni gubaꞌetike ergatanjuwwa kada gophphinoole, tenne qoꞌneꞌni hexxeexxa barachcho ballo kadhati hedde. Gubaꞌetike ergatanjo kadatee hasissaaxxa dandeettuwwa qoꞌnisse, ittani tenne dandeettuwwa hujeteꞌni hosisatee jabaxxa woꞌlaancho asse. Yihowwaanna dayyuwwa haꞌnooxxa hittee qico eetinaꞌneexxa hedde. Insaꞌnaa ergatematixxa halcha jabeessedhe. (1 Pheexi. 4:8, 10) Manfasiinxe maateꞌa ergatemati afendaaxxa gammashsho uudde. Gubaꞌetike ergatanjo kadatee assitinaꞌneexxa woꞌlaancho Yihowwa bira saꞌisse eebbisowwaal!—Filph. 2:13.