Yihowwa Cubbaaleeyyetee Afeexxa Uushsho Gubaꞌenna Leellishshaaki Hittate?

1. Yihowwa duuchchiinge manjiꞌaa gaabbaꞌneexxi yaane maachcho?

YIHOWWA noꞌoo dadeeki eenennexxa yaane melledhatixxa dandeette anfannoshsha asseeten. Atinna tennee uwwa murte murteessexxatto wodda duuchcha laꞌoonfattaaten. Mitti manji murteessedhaaxxe murte giddiiꞌni lumoxxa laꞌo affeexxi, ifi Yihowwa mudhdhateenna isoo mageneeffataꞌneeke mani hadixxe una kadateꞌe, murteessedhaaxxe murten. Yihowwa duuchchiingi manji iitta hexxeexxa murte murteessedhaashsha hasaꞌneen. Mayee? Buutotinna isi manjo eeyyammaxxeenna manjokee eloxxi yaane kaddaashsha hasaammaxxeeten. Yihowwa manji isinni jaalo kadaashshanna baro baro hedhoꞌaa hasaꞌneen.—Zedag. 30:19, 20; Gela. 6:7, 8.

2. Yihowwa jabaxxa cubbo hujeꞌe aadde aagabaki manji maa kadoꞌa hasaꞌne? (1 Yohaannisi 2:1)

² Yihowwa ayyinna isiꞌa ergatemaashsha gaddachchabaan. Isi duuchchiingi manji haseexxa yaane murteessedhaashsha eeti uwween. Mitti cuuphemeeki Kirsitaani, Mageniinka seera saꞌe jabaxxa cubbo hujoole maa kada? Aadde aaga gophoole gubaꞌe giddiiꞌni fulcha hasissaan. (1 Qoro. 5:13) Kaddomaleꞌe, Yihowwa iitta hedheeki manji aadde aageexxi higgeenni isike jaalo kadaashsha hasaꞌneen. Isi wodo qophpheesseexxi taakkaxxi buuto, aadde aagaake manjixxi cubbo gattowwaal hiyyendaashshaten. (1 Yohaannisi 2:1 yaansis) Jaalalatiki Mageni noꞌoki, cubbo hujeeki manji aadde aagaashsha magannisaꞌneen, ittan jajjabbeessaꞌneen.—Zekka. 1:3; Roome 2:4; Yaꞌiqo. 4:8.

3. Tenne qoꞌneꞌni mariꞌantaannexxi yaane maachcho?

³ Yihowwa cubboteenna cubbo hujeeke manjiꞌaa, afeexxa hedino noꞌonna anfonnaa hasaꞌneen. Tenne qoꞌniꞌni iitta assinannoka oruwwa uundannon. Tenne qoꞌnexxa barachcho yaansissatto wodda, (1) Taakkake dhibbeesso baroꞌni Qorontoosixxe gubaꞌe giddo jabaxxi cubbo hujendee wodda, yaane ettene hitta abindeexxa, (2) Phawuloosi cubbo hujeemmaki manjichchi aadde aageexxa yanna maa akeette uwweexxa, (3) Kunni Maxaafi Qullichchiink raagi, jabaxxa cubbo hujeeke Kirsitaaniꞌa, Yihowwa maa uushsho afeexxa leellishaaki hittate kaddeexxa hubat.

TAAKKAKE DHIBBEESSO BAROꞌNI JABAXXI CUBBO HUJEENDEEMMA WODDA YAANE ETTENEꞌE ABINDEEKI HITTATE?

4. Taakkake dhibbeesso baroꞌni Qorontoosixxe gubaꞌe giddo kaddeemmaxxi yaane maachcho? (1 Qorontoosi 5:1, 2)

⁴ 1 Qorontoosi 5:1, 2 yaansis. Sakkake miisoonetike mari wodda, Phawuloosi Qorontoosike bogaꞌni reefi orgeessendeexxe gubaꞌe giddo, kaddeexxa gammachchiissabaaxxa odo laqeemman. Ettene gubaꞌe giddo hedheeki mitti dayyi, langaxxe amanni diiphaamman. Iitta hexxeexxi yaane shookissaaxxemman, matanga “azaabetixxe oddoꞌni midde uunde egeneexxebaan”! Gubaꞌe kunni manji asseexxa yaane bashshi hiyye waala calla kaddeebaangi eloxxa yaane asseeshsha assiteꞌe heda gophpheebaan. Dedha insaꞌne tennee yaane sammi hineꞌe uudeeki, cubbichchi manjiꞌa Yihowwa hittee qico marartetike Mageno kadeexxa leellishshaaxxe yaaneshsha assineꞌe hedeete kada gonpheebaan. Kaddomaleꞌe, Yihowwa ardi isikixxe oddoꞌni seeri beloxxi yaane kaddoꞌaa hasaꞌnebaan. Kunni manjichchi tenne battitte yaanenni, gubaꞌetika summa balleessaaxxi egeꞌnendeexxen. Ittan isinni welti jaaloomaaka wele manjonna daafa dandeꞌaan. Phawuloosi gubaꞌe maa assitaashsha akeette uwweemmaꞌa?

5. Phawuloosi gubaꞌe maa assitaashsha kuleemmaꞌa? Iitta hiyyeeki maa hiyyatee haseete? (1 Qorontoosi. 5:13) (Fakke uudi.)

⁵ 1 Qorontoosi 5:13 yaansis. Phawuloosi manfasi qullichchiki akeekemeꞌe, cubbo hujeꞌe aadde aagabaaka manjo, gubaꞌetenaaꞌni fulchinaashsha daddaabbe borreesseemman. Addatemeeki Kirsitaani maa assa hasissaammaꞌa? Phawuloosi konne manjinni ‘jaalooma uurrinsaashsha’ kuleemman. Iitta hiyyo maa hiyyote? Kunni Phawuloosiki ajaji iitta hedheeke ‘manjinni welti sagalenda midde indabaashsha’ ifisaaken. (1 Qoro. 5:11) Mitte manjinni sagale ofoꞌle ita jaalunte jabaattaꞌni meꞌitaashsha assitaan. Phawuloosi iitta hiyyeeki gubaꞌe konne manjinni jaaloondabaashsha kulatee haseete kaddeexxi egeꞌnendeexxen. Kunni ajaji gubaꞌe konne manjixxe fuggoxxe yaanenni miidhendabaashsha gargaaraan. (1 Qoro. 5:5-7) Ittin lebendaaxxa, konne manjinni jaalooma gopha insaꞌneexxi, isi Yihowwake oranaaꞌni hittee qico bayyateexxa hubataashshanna, hujeexxe yaaneꞌa aadde aagaashsha tirtirsitoꞌa dandeettaan.

6. Phawuloosi ergeemmaxxi daddaabbe gelteechchi uduma, gubaꞌe maa assiteemmaꞌa? Cubbo hujeemmaki manjichchi maa asseemmata?

⁶ Phawuloosi, Qorontoosi hedhemmake Kirsitaaniꞌa daddaabbe ergeechchi uduma, gubaꞌe maa hitee hiissitaaxxa heda safeen. Udumiiꞌn Tiito isoo gammachchiissaaxxa odo aadhe dageen. Gubaꞌetinna Phawuloosi ergeemmaxxe ergaꞌa eloka hiissichcho hiissiteemman. (2 Qoro. 7:6, 7) Insaꞌnenna akeette uwweexxa hordonfeemman. Tenne calla kaddeebaangi, Phawuloosi daddaabbe ergeeke heenoke agenji uduma, cubbo hujeemmaki manjichchi aadde aageen! Kunni cubbo hujeemmak manjichchi elobaaka meꞌichcho isika waalemman, adabikinna jijjiiremeemman, ittan qullummatika Yihowwaka seera hordofa safeemman. (2 Qoro. 7:8-11) Phawuloosi higgeenni gubaꞌe maa assitaashsha ajajeemmaꞌa?

AADDE AAGEEKA MANJO GUBAꞌE ABIDDAAMMA QICO

7. Cubbo hujeemmaka manjo gubaꞌetenaaꞌni fulcha heene eloxxa laꞌo afisseemmaꞌa? (2 Qorontoosi 2:5-8)

⁷ 2 Qorontoosi 2:5-8 yaansis. Phawuloosi “haꞌno giddiiꞌni heddi uutineeki xixichchi geyaan” hiyyeemman. Wele darrenaaꞌni, xixichchi kunni cubbo hujeeki manjichchi herregakeꞌni geyaashsha asseen. Herregi kunni maachcho? Cubbo hujeeka manjo aadde aagaashsha gargaaraten.—Ibra. 12:11.

8. Phawuloosi itti aana gubaꞌe assitoꞌa qoreemmaxxi yaane maachcho?

⁸ Tenneꞌa Phawuloosi gubaꞌe konne cubbo hujeeke manjiꞌaa: ‘baꞌlunteti gattowwaal hitaashshanna jajjabeessitaashsha’ ittan ‘isoo eetaꞌneexxa kokeessitaashsha’ ajajeemman. Phawuloosi, cubbo hujeeka manjichcho, gubaꞌe Yihowwake ardi giddiꞌaa higaashsha assa calla kaddebaangi, wele yaanenna assitaashsha hasaammaxxa hubatte. Phawuloosi konne aadde aageeke manjichchiꞌa, qalbet gattowwaal hineexxanna isoo eenaꞌneexxa, haasoonnaꞌneexxenna assinaꞌneexxe yaanenni kokeesinoꞌaa haseemman. Tenneꞌa insaꞌnenna gubaꞌe giddiꞌa higa isixxeꞌni gammandeexxa caꞌa hiyyee garinni leellisha hasissaamman.

9. Mitti mitti cubbo hujeꞌe aadde aageeke manjiꞌa gattowwaal hiyya hoodaaki mayeete kada dandeetta?

⁹ Cubbo hujeemmaki manjichchi aadde aagee gubaꞌetibaa higeexxa yanna isoo adhdhatee hoodeemmaki mitti mitti manni hedhemmaꞌa? Maxaafi Qullichchi haasoꞌeexxi yaane hexxebaan. Kaddomaleꞌe hedhanna dandeꞌaan. Tinni isixxi elobaaxxi huje gubaꞌe duuchchaꞌni rakko idaggeen, mitti mitti miidhemeeki manji hedha dandeꞌaan. Adabiki battoomebaangi hedhatee jabaxxa woꞌlaancho assaammaki manni, konnee manjo dayyiinsha asseꞌe adhdha seeribeloxxe yaaneshsha asse hedaakinna hedha dandeꞌaan. (Luqa. 15:28-30 welti hokkokissiis) Gubaꞌe aadde aageeke dayyiꞌa dhugaatixxa jaalala leellisha hasisseeki mayeete?

10-11. Geedhe aadde aageeke manjiꞌa gattowwaal hiyya gopha, affeexxi rakko maachcho?

¹⁰ Geedhe dhugaati aadde aageeka manjo, gubaꞌe giddiꞌa higaashsha assa gophphoole yookiin higeechchi uduma gubaꞌe dhugaatixxa jaalala isiꞌa leellisha gophphoole, dadendaaxxa rakko hedde. Kunni manji ‘miketi iimi darre yaaddot liqiinsema’ dandeꞌ aan. Tasfa afebaashsha asse hedaaxxinna hedha dandeettaan. Mageniki welti afeexxa firunte higgeenni jabeessedhatee assaꞌneexxe woꞌlanchoꞌninna adde woxaaxxi hedha dandeettaan.

¹¹ Matanga, gubaꞌe giddo hedheeki dayyuwwinna dayyuwwa aadde aageeke manjiꞌaa gattowwaal hiyya gonphoole, Yihowwanni welti anfeenxi insaꞌneexxi firunte miidhema dandeettan. Maaye? Buutotinna konne aadde aageeke manjiꞌa, leellinsheeki gattowwaaliitike Yihowwake adaba kaddeebangi, fuggichchanna mararte beloke kadeeke Seexaniinke adaba kademmaxxeeten. Daabiloosi manjiinxa manfasiinxa hedho balleessatee laꞌoonfataꞌneeke miya kandaxxinna hexxaan.—2 Qoro. 2:10, 11; Effe. 4:27.

12. Gubaꞌe Yihowwaa fakkaatta dandeettaaki hittate?

¹² Qorontoosi bogaꞌni hexxemmaxxi gubaꞌe, Seexanna kadeebangi, Yihowwaa fakkaata dandeettaammaki hittate? Aadde aagaaka manjo abindaane garinni Yihowwaa fakkaatatiten. Mitti mitti Maxaafi Qullichchiinki borreessalluwwi Yihowwaa maa hiyyeexxa uundo. Daawiti “ati eloken, gattowwaal hiyyateenna qophphooteetteken” hiyyeen. (Faaro 86:5) Mikiyaasi: “Cubbo gattowwaal hiyyaaki, balleessa insaꞌneexxa waale saꞌaaki atishsha hedheeki Mageni ayyete?” hiyye borreesseen. (Miki. 7:18) Isayaasinna: “Fuggichchi manji ora isika, elobaki manjinna yaada isika waalowwaal; mararte leellishaake Mageno noꞌoke Yihowwabaaꞌa higowwaal, gattowwaal isixxi bira saxxeexxen” hiyyeen.”—Isa. 55:7.

13. Aadde aageeka manjo gubaꞌe giddiꞌa hiissa hasisseeki mayeete? (“Qorontoosi Hedhemmaki Manjichchi Gubaꞌe Giddiꞌa Higeemmaki Haanote?” hitaꞌneexxa kollo uudi)

¹³ Qorontoosixxi gubaꞌe, cubbo hujeemmaki manjichchi aadde aage hige dagaaxxa yanna adhdhatinna isoo eenaꞌneexxa leellishati Yihowwaa fakkaatta hasissaamman. Phawuloosi, cubbo hujeexxee aadde aageeka manjichcho, gammashshoti adhdhinaashsha uwweexxa akeette hordofat gubaꞌe, ‘duuchchiinxe yaanenni ajajendaꞌneexxe kaddeexxa leellishsheen.’ (2 Qoro. 2:9) Cubbo hujeemmaki manjichchi gubaꞌetenaaꞌni fulchemeeke heeno agenjuwwi uduma, uwwemeeki xixichchi kunni manjichchi aadde aagaasha gargaareen. Tenneꞌa gubaꞌtibaa higebaangi turaashsha assitaaxxi buuto hexxebaan.

YIHOWWAKA ILLE UUSHSHO BELOKANNA MARARTETIKA ADABA LEELLISHA

14-15. Qorontoosixxe gubaꞌeꞌni cubbo hujeemmake manjichchixxa yaane abindeeke oranaaꞌni maa barantano? (2 Pheexiroosi 3:9) (Fakke uudi.)

¹⁴ Qorontoosixxe gubaꞌeꞌni cubbo hujeemmake manjixxa yaane abindee gari, borreessemeekinna taꞌi qicoꞌni tureeki noꞌaa “barachcho” kadaaten. (Roome 15:4) Konne raaganaaꞌni, Yihowwa ardi isiki giddo jabaxxa cubbo hujeeka manjo bashshi hiyye uudabaaxxa barantannon. Isi cubbo huje aadde aagabaaki manji, addatendeexxe isixxe mageneeffatooleeyyenni welti mittummati hedha ittin sufaashsha “mararteti” sammi hiyye waalabaan. Yihowwa marartetike Mageno kadoolenna bashshi hiyyaakeban; yookiin seera fulcheeka jijiirabaan. (Yihu. 4) Matanga iitta hexxeexxi yaane gubaꞌe duuchcha miitaammaxxeꞌe tinni marartete hiyyendabaan.—Fakke. 13:20; 1 Qoro. 15:33

¹⁵ Kaddoolenna Yihowwa ayyinna baꞌoꞌaa hasaꞌnebaaxxa barantannon. Isi dandeesissee qicoꞌni manjo baꞌnetenaaꞌni gargaaraate hasaꞌneen. Isi meꞌinjo ifika jijjiidhdhe isinni welti afeexxa firunte haaroonsedhatee hasaꞌ neeke manjiꞌaa mararte leellishaan. (Hizi. 33:11; 2 Pheexiroosi 3:9 yaansis) Tenneꞌa Qorontoosixxe gubaꞌe giddo cubbo hujeemmaki manjichchi cubbotike oranaaꞌni higeexxa yanna, Yihowwa Phawuloosi darrenaaꞌni gubaꞌe konne manjichchiꞌaa gattowwaal hitaashshanna gammashshoti adhdhitaashsha ifiseemman.

16. Qorontoosixxe gubaꞌe giddo kaddeemmaxxa yaane abindeeka ora uuddaaxxa ateꞌni maachchi laqemaꞌne?

¹⁶ Qorontoosixxe gubaꞌe giddo kaddeemmaxxa yaane qoꞌnisa, Yihowwaxxa jaalala, qullummanna ille uushsho beloxxa huje isixxa egennannoshsha gargaarteen. (Faaro 33:5) Tinni yaane Mageno irran caala jajjattoshsha tirtirsiteebaa? Ittan noꞌo duuchchiingi cubbaaleeyye kandeennaxxee isixxi gattowwaali noꞌaa hasissaan. Noꞌo duuchchiingi cubbo noꞌoxxi gattowwaali hiyyendaashsha ora bandeexxe wodoꞌa Yihowwa galateeffantannoshsha assitaaxxi buuto hexxeen. Yihowwa arda isika qalbeti eeyyaꞌneexxanna arda isikee eloxxi yaane kaddoꞌa hasaꞌneexxa egeꞌna hittatta dayyeesitaaxxenna jajjabeessitaaxxe yaane!

17. Itti aana hexxeexxe qoꞌnuwwaꞌni mariꞌantaannexxi yaane maachcho?

¹⁷ Cubbo hujeendaaxxa abindaaka gara uuddaaxxa maa hiyya dandeesissa? Gubaꞌetixxi geedhe cubbo hujeeki manji aadde aagaashsha gargaarati Yihowwaka fakkeenna hordofa dandeettaaki hittate? Geedhe mitte manjo gubaꞌetenaaꞌni fulchitaa wodda yookiin higaashsha assita wodda gubaꞌe maa assa hasissa? Konne qortumuwwa itti aandaaxxe qoꞌneꞌni mariꞌantannon.