Bari Bariinxa Hedho Alfitatton—Hitta?

1. Mitti mitti manni baro barokee hedha uuddaaxxa maa hiyye hedaaxxi hexxa?

HEDDI manni fayyunteti hedhatee hiyyaa wodda eloxxa sagale itaan, ittan duuchchinii wodda ispoorte hujatee woꞌlaanaan. Iitta assinaꞌneexxe kaddoolenna tinni yaane baro baro heꞌnaashsha assitabaaxxa egenneꞌeen. Cimoti daggaaxxe rakkonaaꞌni kexxeexxa baro baro hedha fakkaattabaaxxe yaaneshsha assiꞌne hendaaxxinna hedha dandeettaan. Kaddomaleꞌe, Yesuusi Yohaannisi 3:16 nna 5:24 keꞌni “bari bariinxa hedho” dhugaandinni manji alfaaxxe yaane kaddeexxa haasoꞌeen.

2. Bari bariinxa hedho uuddaaxxa Yohaannisi hafuura adhdha 6 maa hiyya? (Yohaannisi 6:39, 40)

² Mitte barra Yesuusi kumiki laakkoꞌemaake manniꞌaa daabbonna qulxuꞌme masot itiseen.a Tinni manbeꞌa assitaaxxemman. Kaddomaleꞌe, langa baro haasoꞌeexxi yaane kinni, haranga manbeꞌa assitaaxxemman. Yesuusi Geliilixxe abbaayya qarqara, Qifirinahoomi qicoꞌn isoo hordofeemmake manniꞌaa, reyeeki manji reyotenaaꞌni keꞌaaxxanna baro baro hedhaaxxa haasoꞌeemman. (Yohaannisi 6:39, 40 yaansis.) Tinni reyoti gophpheetteke jaaluwwa atikeenna eetaatteke manjiꞌaa maa laꞌo affeexxa hedi. Kunni Yesuusiki haasoꞌi heddi reyeeki manji reyotenaaꞌni keꞌaaxxanna atinna ati eetaatteki manji bari bariinxa hedho alfitinaaxxa leellishaan! Kaddomaleꞌe, Yesuusi Yohaannisi hafuura adhdha 6 keꞌni itti-aana haasoꞌeeka yaada qalbeeffata haꞌurteemman. Tennee yaane miꞌlachchoti hordonfo.

3. Yesuusi Yohaannisi 6:51 keꞌni ifi maa hiyyeemmaꞌa?

³ Qifirinahoomi hedhemmaki ardi, Yesuusi insaꞌnee itisemmaxxe daabboxxeꞌninnaa Yihowwa annuwwa insaꞌnekee uwweemmake mennaxxe oddoꞌni hexxeexxa mittunte uudeemman. Maxaafi Qullichchi menna ‘iimiiꞌni uwwendeexxe sagale’ kaddeexxa haasoꞌaan. (Faaro 105:40; Yoha. 6:31) Yesuusi haasoꞌakeꞌni menna laꞌoonfateeki, itti-aana barsiisaꞌneexxe yaaneꞌaa hundaayye kaddaashshaten. Menna Mageni masoti qophpheessemmaxxe sagalen, tennee sagale iteemmaki manni hose galoolenna reyeꞌeen. (Yoha. 6:49) Yesuusi ifi ‘iimatenaaꞌni uwwendeexxe dhugaatixxe sagale,’ ‘Mageni uwweexxe sagalenna,’ ‘hedhotixxe sagalen’ hiyyeen. (Yoha. 6:32, 33, 35) Yesuusi isixxeꞌninna mennatixxe oddoꞌni hexxeexxa lumoxxa gargarunte ifiseen. Iitta hiyeen: “Iimiiꞌni dirriteexxi hedho affeexxi sagale anten. Tenne sagalenaaꞌni itaaki duuchchi baro baro hedhaan.” (Yohaannisi 6:51 yaansis.) Ayhuudooti mekki hiyyen. Insaꞌne Yesuusi ifi ‘iimiiꞌni dirriteexxe sagale’ anten hiyyaꞌneeki mayeete kaddeexxanna edo annuwwa insaꞌnekee Mageni uwweemmaxxe mennanaaꞌni, saꞌaaki hittate kaddeexxa qalbeeffata dandeenneemmabaan. Yesuusi sagale tinni kinni “buttatixxe hedhoꞌaa hiyye uwwaanneke maala anken” hiyeexxi yaane caꞌa asseꞌe kuleen. Yesuusi iitta hiyyeeki maa hiyyatee haseete? Konne qortumiki hiissichchi noꞌonna noꞌo eenaanneki manni bari bariinxa hedho alfinannoxxa leellishaake kademmaxxee hiissichcho isika egeꞌna hasissaan. Yesuusi maa hiyyatee haseemmaxxa uundo.

HEDHO AFFEEXXA SAGALENNA MAALA ISIKA

4. Mitti mitti manni Yesuusi haasoꞌeexxe yaanenaaꞌni kexxeexxa corifateeki mayeete?

⁴ Yesuusi maala ‘isika buttatixxe hedhoꞌaa hiyyeꞌe uuwwaaxxa’ haasoꞌee wodda isoo caqasaammaki mitti mitti manni corifateemman. Dedha insaꞌne, Yesuusi maala isika addichcha indoꞌaa uwwaachcho insaꞌneꞌni fakkaattuu? (Yoha. 6:52) Yesuusi itti-aana manbeꞌa assaaka haasoꞌeeka yaada hubanto: “Manjiinke beltika maala ita gophphinoolenna munde haꞌwa gophphinoole ifiꞌaa hedho affinebaan.”—Yoha. 6:53.

5. Yesuusi “haꞌwitinebaaki” hiyyeexxi munde additte munde isixxebaan hinaanneki mayeete?

⁵ Nohike baroꞌni manji munde itabaashsha Mageni seereemman. (Dada. 9:3, 4)Yihowwa Israꞌeelootakee uwweemmake seeraꞌninna munde indabaashsha higgeen ajajeemman. Munde itaaki duuchchi ‘reya’ hasissaamman. (Zele. 7:27, lqj.) Yesuusi Muuseka seera duuchchiinga ulfeessaamman. (Mat. 5:17-19) Tenneꞌaa Yeesuusi Yihuudiki ardi addichcha maala isika itaashsha yookiin biso isikenaaꞌni fuldaaxxa munde haꞌwaashsha jajjabeessaamman hiyye heda, haranga fakkaattaaxxe yaanebaan. Kaddomaleꞌe, Yesuusi konnee haꞌura haasoꞌa haasoꞌeeki, manji “bari bariinxa hedho” alfaaki hittate kaddeexxa barsiisatee haseeten.—Yoha. 6:54.

6. Yesuusi maala isika itanna munde isixxa haꞌwa hasissaaxxa haasoꞌeeka yaada uuda hasissaaki hittate?

⁶ Yesuusike haasoꞌixxi erga maachcho? Yesuusi haasoꞌaammaki fakkeenniinke kadeeke orinniten. Okkoneechchi edi darre Saamiraawwichchoti haasoꞌeemma woddanna fakkeenniki haasoꞌeemman. Iitta hiyyeen: “Ani uwwaanneke wodeꞌinaaꞌni haꞌwaaki duuchchi ijjenda dheeboꞌabaan, tenne irra ani uwwaanneki wodiꞌi bisi giddo burqaake, bari bariinxa hedho uwwaake wodiꞌiinxe muumme kadaan.” (Yoha. 4:7, 14)b Yesuusi haasoꞌaammaki, Saamiraawwichcho addichcha wodeꞌe haꞌwiteexxi sholla qicinni bari bariinxa hedho alfitaashshatemmabaan. Tennenni weli fakkaattaanxa Yesuusi Qifirinahoomi hedhemmaki ardi bari bariinxa hedho alfatee, addichcha maala isika itanna munde isixxa haꞌwa hasissaani hiyyatee haseetebaan.

LAME YANNAXXE ODDOꞌNI HEXXEEXXA GARGARUNTE

7. Yohaannisi 6:53 keꞌni afemaaka Yesuusika haasoꞌa mitti mitti manni maa hiyyee hedaꞌne?

⁷ Mitte mitte addeki manni, Yohaannisi 6:53 keꞌni Yesuusi maala isika itanna munde isixxa haꞌwa hasissaaxxa haasoꞌeeke yaadinni weli fakkaataaka, okkkoneechchi uduma haasoꞌeemmaxxeꞌe, Goottiinke Hirbaatike fakkeennan hiyye hedaaki hedheen. (Mat. 26:26-28) Insaꞌne Goottiinke Hirbaatiꞌaa bukki hiyyeeki huuni manjinna, shiqaꞌneeke qixxanaaꞌninna woyinetenaaꞌni adhdha hasissaan hine addantaan. Tinni dhugaatee? Wogga woggandeꞌni miilooneti laakoꞌemaaki manni noꞌonni bukki hiyyaammaxxeꞌe, noꞌonna konne qortumika hiissichcho egeꞌna hasissaan. Yohaannisi 6:53 keꞌni afemaake yaadixxenna Yesuusi Goottiinke Hirbaati wodda haasoꞌeeke yaadixxe oddoꞌni hexxeexxa lumoxxa gargarunte uundo.

8. Tenne lame yannaxxe oddoꞌni hexxeexxi mitte mitte gargarunte maachcho? (Fakkuwwa uudi.)

⁸ Tenne yannaxxe oddoꞌni hexxeexxa lame gargarunte uundo. Taakkaaxxi, Yesuusi Yohaannisi 6:53-56 hedheeka yaada haasoꞌeeki haanote?, habate? Isi konnee haasoꞌa haasoꞌeeki 32 G.Wꞌni Geliilaten. Tinni yannanna Iyyerusaalemike qachchi giddo, Goottiinka Hirbaata hundeessebaa mitte wogga edi darren. Langa, konee yaada haasoꞌeeki ayyiꞌaate? Geliila manfasiinxa halcha woꞌneshedhatee irra yannatixxa maaliinxa yorte woꞌnshedhatee hasaammake manniꞌaaten. (Yoha. 6:26) Insaꞌne Yesuusi haasoꞌeexxa yaane qalbeeffata insaꞌneꞌni haꞌurteexxa yanna isoꞌni anfeemmaxxi adde hirbangeꞌni baxxeen. Matanga hordofooleeyye isixxi giddiiꞌni mitte mitte isoo hordofa waaldeen. (Yoha. 6:14, 36, 42, 60, 64, 66) Konnee jeeja woggati uduma Yesuusi 33 G.W ꞌni Goottiinka Hirbaata hundeesseexxa yanna hedhemake jeejinni hokkokisiisi. Okkone wodda isi barsiiseexxi yaane adda aaga gophphoolenna 11 addatendeexxi hawaaryaate, isoo waaldeemmabaan. Tinni addatendeexxi hawaaryaate Geliila hedhemmake heddi mannishshate kaddebaangi, Yesuusi iimiiꞌn dageeke Mageniinke belto kadeexxa addattaamman. (Mat. 16:16) Isinna insaꞌnee, “hega uushsho aneꞌni gelteexxa yanna duuchcha, ani biriiꞌni gargariti higginebaangi hexxinemman” hiyye galateeffateen. (Luqa. 22:28) Iimiiꞌni uundennexxi lame yaanexxi gargarunte calli, Yohaannisi 6:53 keꞌni Yesuusi haasoꞌeeki yaadi Goottiinke Hirbaati wodda haasoꞌeexxe yaanenni weli fakkaattabaaxxe kaddeexxa leellishshaaxxen. Ittan uundaaꞌnexxi wele gargarunte hexxeen.

YESUUSIKI HAASOꞌI ATIꞌAA MAA LAꞌO AFEE?

9. Yesuusi Goottiinke Hirbaataꞌni haasoꞌeeki yaadi heene golluwwaa kadaake?

⁹ Yesuusi Goottiinke Hirbaati wodda hawaaryaate isixxee, irsho beloka qixxa uwween, qixxi kunninna biso isika tukkeessaaxxa insaꞌneꞌni kuleen. Okkooꞌni woyine haꞌwinaa uwweexxi “kakotixxa munde” tukkeesitaaxxe kaddeexxa haasoꞌeen. (Marqo. 14:22-25; Luqa. 22:20; 1 Qoro. 11:24) Kako uuddaaxxa haasoꞌeexxi yaane haranga laꞌo affeexxe yaanen. Haarooxxi kako Yihowwa manji duuchchini aageexxe kaddebaangi ‘Mageniinxa Motumma’ dhaalaake manfasiinxe ‘Israꞌeelike mininni’ aageexxe kakon. (Ibra. 8:6, 10; 9:15) Ettene yannaꞌni hawaaryaateteꞌni haarooxxi kako aaggeemmabaan. Kaddomaleꞌe, shiqixxe yannaꞌni manfasi qullichchiki hariiremmeꞌe iimateꞌni Yesuusinni welti hedhatee haarooxxe kakoxxe kuta kandaan.—Yoha. 14:2, 3.

10. Yesuusi Geliila haasoꞌeexxi yaanenna Goottiinke Hirbaati wodda haasoꞌeexxi yaane baꞌla qicinni gargariti higgaaki hittate? (Fakke uudi.)

¹⁰ Yesuusi Goottiinke Hirbaati wodda ‘shiixxooxxe goodheꞌni’ miꞌlachcho asseexxe hubatte. Tinni shiixxooxxi gollo saffeeki, Yesuusi Goottiinka Hirbaata hundeesseexxa yanna isinni welti hexxemmaxxe addatendeexxe hawaaryatenniten. (Luqa. 12:32) Insaꞌnenna udumiiꞌni tenne golloxxe una kadaaki manni, fakkeenniinke qixxanaaꞌni nnaa woyinetenaaꞌni adhdha hasissaan. Insaꞌne Yesuusinni welti iima hedhatee meꞌaꞌnee mannan. Isi tenne yanna haasoꞌeexxi yaane, Geliila bukki hiyyemmake manniꞌaa haasoꞌeexxe yaanenaaꞌni haranga gargariti hexxeexxen. Qifirinahoomike loolaꞌni hedhemma wodda haasoꞌeexxi yaane baca manna uuddaaxxen.

11. Yesuusi Geliila hedhemma wodda haasoꞌeexxi yaane shiixxooxxa goodhe uuddaaxxebaan, hinaanneki mayeete?

¹¹ Yesuusi 32 G.Wꞌni Geliila hedhemma wodda haasoꞌeeki, sagale insaꞌnaa uwwoꞌaa hasaammake Ayhuudootiꞌaaten. Kaddomaleꞌe, Yesuusi insaꞌne additte sagale irra caaldeexxe laꞌo affeexxe yaaneꞌni miꞌlachcho assinaashsha jajjabeesseen. Bari bariinxa hedho alfinaashsha assitaaxxi qophphe hexxeexxa leellisheen. Ittan Yesuusi reyeeki manji muuxamiinxe barraꞌni keꞌaaxxanna baro baro hedhaaxxa haasoꞌeen. Yesuusi tennee yanna haasoꞌeexxi yaane Goottiinke Hirbaati wodda haasoꞌeemmaxxe yaaneshsha shiixxooke mellemeeke mannixxa una uuddaaxxebaan. Tenne irra, Geliila bukki hiyyeemmake ardiꞌaa haasoꞌee wodda miꞌlachcho asseeki duuchchiingi manji alfaaxxe eebbaꞌniten. Iitta hiyyeen: “Tenne sagalenaaꞌni itaaki duuchchi baro barokee hedhaan, sagale tinni kinni buttatixxe hedhoꞌaa hiyye uwwaanneke maala anken.”—Yoha. 6:51.c

12. Yesuusi hiyyeexxa bari bariinxa hedho alfatee maa assa hasissa?

¹² Yesuusi Geliila bukki hiyyeemmake Ayhuudootiꞌaa, heene yannanna lubboti hedhemmaki manji yookiin ediꞌaa ilemaaki manji duuchchi tennee eebba alfaaxxa haasoꞌebaan. ‘Tennee sagale itati’ laꞌo alfaaki manji, Yesuusiꞌni adde afeexxa leellishaake manjo callan. Heddo summi callike Kirsitaanaꞌni, ‘Yesuusiꞌni addatanna’ isoo ifike fayyisanjishsha asse uuda calli, fayyatee geltaaxxe yaaneshsha fakkaattaan. (Yoha. 6:29, Kingi Jemis Verzhiin) Kaddomaleꞌe, tennenaaꞌni caaldeexxa yaane assa hasissaan. Geliila hedhammake manni giddiiꞌni heddi keꞌitokeꞌni Yesuusiꞌni addataamman, udumiiꞌni kinni Yesuusii hordofa waaleen. Insaꞌne iitta assineeki mayeete?

13. Dhugaatixxe Yesuusixxe hordofooleeyye kadatee hasissaaxxi yaane maachcho?

¹³ Yesuusi sagale itiseemmaki heddi ardi, insaꞌne haansaꞌneexxa yaane isi uwwaꞌnee qicoꞌni, isoo hordofatee gammashshotikemman. Insaꞌne dhibemeeka masot fayyisoꞌaa, sagale tola itatee yookiin halcha insaꞌnexxishsha calla hexxeexxa barachcho barsiisoꞌaa hansaamman. Kaddomaleꞌe, Yesuusi dhugaatixxi hordofooleeyye isixxi tennenaaꞌni caaldeexxa yaane assa hasissaaxxa leellisheen. Isi buttatibaa dageeki manjiinxa maaliinxa halcha calla wonshateetebaan. Insaꞌne “anibaa amme” hiyyeeke yeꞌinjo adhdhanna, isi barsiisaꞌneexxe duuchchiinxe barachchoꞌaa ajajema hasissaamman.—Yoha. 5:40; 6:44.

14. Yesuusike maalanaaꞌninna mundenaaꞌni laꞌo alfatee noꞌo maa assa hasissa?

¹⁴ Yesuusi Geliila bukki hiyyeemmaki ardi adde afeexxa leellisha hasissaaxxa jabeesseꞌe haasoꞌeen. Mayekeꞌn? Yesuusi tolcha kadaa wodda maali isikinna munde isixxi wodatixxa hunna affeexxa addata hasissaamman. Iitta hexxeexxi adde Ayhuudootiinke baroꞌninna kadde noꞌoke baroꞌni hasissaaxxen. (Yoha. 6:40) Yohaannisi 6:53 keꞌni kulendeeshshani, noꞌonna Yesuusike maalanaaꞌninna mundenaaꞌni laꞌo alfatee wodoteꞌni adde anfeennexxa leellisha hasissaan. Tinni eebbatixxi hula baci manniꞌaa banendeexxen—Effe. 1:7.

15-16. Yohaannisi hafuura adhdha 6 kenaaꞌni, baranteennexxi laꞌo affeexxi yaane heente?

¹⁵ Yohaannisi hafuura adhdha 6 keꞌni, noꞌaanna noꞌo eenaanneke manjiꞌaa lumoxxa laꞌo afeeki borreessemeeki yaadi hedheen. Kunni yaadinna Yesuusi manjiinke beltiꞌaa hittee qico hedaꞌneexxa leellishaaken. Yesuusi Geliila ardiki hedhemma wodda ela gopheeka fayyiseen, Mootumma Mageniinxa uuddaaxxa barsiiseen, ittan indaaxxi sagale hasisseexxa yannanna insaꞌneꞌaa wonsheen. (Luqa. 9:11; Yoha. 6:2, 11, 12) Duuchchiinxenaaꞌni caaldeexxa isi “hedhotixxe sagale kadeexxa” barsiiseemman. —Yoha. 6:35, 48.

¹⁶ Isi “wele gedhebo” hiyye yeꞌeeki manni, Goottiinka Hirbaata ulfeessinaaxxa yanna qixxakenaaꞌninna woyinetenaaꞌni ijjenda adhdha hasissabaan. (Yoha. 10:16) Kaddoolenna Yesuusi Kirsitoosike maalanaaꞌninna mundenaaꞌni laꞌo alfaan. Laꞌo alfa dandeennaaki, tolchi isikike wodotike hiraꞌni adde anfeexxa leellishatiten. (Yoha. 6:53) Wele darrenaaꞌni, qixxakenaaꞌninna woyinetenaaꞌn adhdha hasissaꞌneeki manni, haarooxxe kakoxxe kuta kandeexxanna iimateꞌni Mageniinxe Mootummaꞌni galchatika tasfa afeexxa leellishaaken. Tenneꞌaa hariiremmeenneke yookiin wele gedhebo kandoonnole, Yohaannisi hafuura 6 keꞌni hedheeki yaadi noꞌaa duuchchiinge laꞌo afeeken. Isinna bari bariinxa hedho alfatee adde haranga hasisseeki mayeete kaddeexxa ifisaan.