Yihowwa Ateꞌe Eeyyaꞌneexxa Addati

1. Hedho atixxa Yihowwaa uuwwatee murtessexxeetteki mayeete? (Fakketanna uudi.)

HEDHO atixxa Yihowwaa uwwatee murteessexxeettaxxa yanna qalli hitaatte? Iitta hexxeexxa murte murteessexxetteki, isoo egendettexxeenna isoo eetettexxeeten. Hedho atixxeꞌni fedhii isixxa edisateenna woꞌma qalbeni, woꞌma lubboni, woꞌma sammoninna hunnani isoo eeyyatee kako aaggetten. (Mar. 12:30) Eettenne yannanaaꞌni saffeꞌe isiꞌaa affeettexxi jaalala lebbaꞌni meteen. Mitti manji ateꞌe “ati Yihowwaa eetaatte?” hiyye qoreele maa hitee hiissitatto? Mitti mami belo, “Ayyi iimi darrenna, heene yaane irra isoo eeyyaannen!” hite hiissitattoxxi hexxaan.

2-3. Yihowwa addantonna hasaꞌneexxi yaane maachcho? Tenne qoꞌneꞌni mariꞌantaannexxi yaane maachcho? (Erimiyaasi 31:3)

² Mitti manji atee “Yihowwa atee eeyyaꞌneexxa addattaatte?” hiyye qoreele maa hitatto? Dedha Yihowwaxxi jaalala aniꞌaa hasissaake manjobaan hiteꞌe, hiissichcho hiissa gophatee hooddatto? Hadi jaalala belo nosseexxi mitte dayyo: “Ani Yihowwaa eeyyaannexxa egeꞌnennen. Tinni mamannoxxe yaanebaan. Heddo yanna kinni, ‘Yihowwa anee eeyyaꞌninni hedheesi?’ hiyyaꞌni mamannon.” Yihowwa atee eeyyaꞌneexxa egendattoshshata gargaartaaxxi yaane maachcho?

³ Yihowwa isi atee eeyyaꞌneexxa addattottaa hasaꞌneen. (Erimiyaasi 31:3 yaansis.) Dhugaa haasoꞌateꞌe ateee ifibaa yeꞌedheeki isonden. Hedho ifixxa isiꞌaa uwwatee murteessexxettexxanna cuuphendettexxa yanna, mitte fiixa kaddeexxa yaanenna alfiteetten, tinninna jaalalaten. Tinni jaalalanna jabaxxen, haanonna taxxaaxxebaan. Tinni jaalala Yihowwa addatendeexxa isixxa mageneeffatoole, ittan ateenna “fiixa karrashsha” uudashsha assitaan. (Mil. 3:17 lqj.) Hawaarya Phawuloosi, Yihowwa isoo eeyyaammaxxa mitte qalbeni addataamman. Yihowwa atinna Phawuloosishshanni addattottaa hasaꞌneen. Phawuloosi qalbe mitten: “Reyonna kaddoole, hedhotenna kaddoole, ergannatenna kaddoole, mootummuwwatenna kaddoole, taꞌa hexxeexxe yaanuwwanna kaddoole, ediꞌaa daggaaxxe yaanuwwanna kaddoole, fedheexxe hunnanna kaddoole, qephphinnakenna kadoole, gooddotenna kaddoole, wele heene dadanna kaddoole, Gootta Yesuusi Kirstoosi darreeꞌni leelliteexxe Mageniinxe jaalalanaaꞌn noꞌoo gargariti hiissa dandeettabaaxxa mitte qalbeni addataannen” hiyyeen. (Rom. 8:38, 39) Tenne qoꞌneꞌni Yihowwa noꞌoo eeyyaꞌneexxa anfeennexxa adde jabeessedha hasisseeki mayeete kaddeexxanna isi noꞌoo eyyaꞌneexxa addantannoshsha gargaartaaxxa yaane uundannon.

YIHOWWA NOꞌOO EEYYAꞌNEXXA ADDATA HASISSEEKI MAYEETE?

4. Seexaniinxa fuggoxxa dhiibbe faachcheeffantannoki hittate?

⁴ Yihowwa noꞌoo eeyyaꞌneexxa addatati, Seexaniinxa “fuggoxxa dhiibbe” faachcheeffata dandeennannon. (Eff. 6:11) Seexani, Yihowwaa ergatemmabeꞌnoshsha assateꞌe kadabaanxi yaane hexxebaan. Seexaniinxe fuggoxxe dhiibbe giddiiꞌni mitte, Yihowwa noꞌoo eeyyaꞌnebaaxxa dhara haasoꞌaten. Seexani alfaaxxa futtii duuchcha laꞌoonfataaxxa deetoxxeꞌe. Heddo yanna noꞌoo miidhaaki rakko noꞌoꞌni geltaa woddaten—dedha noꞌoo miidhaaki edo kaddeexxe yaanenaaꞌni, taꞌa noꞌoꞌni geltaꞌneexxe hega uushshonaaꞌni yookiin ediꞌaa kaddaaxxe egennebeꞌnoxxe yaanenaaꞌn kexxeexxa yaandanno woddate kada dandeettaan. (Fak. 24:10) Seexani ifi faachcheeffatabaaka biniincha adame abidammake neenqishshaten. Tenneꞌaa rakko gelteeꞌnaa yaandannoxxa yanna laꞌoonfateexxi noꞌoonna adde woxisatee woꞌlaanaan. Yihowwa noꞌoo eeyyaꞌneexxa anfeennexxa adde jabeesseꞌnaannole, Seexana, ittan isixxa hantallenna mala ‘jabaante uurrine moromateꞌe’ elo qicinni kaꞌlineenneke kandannon.—1 Ph. 5:8, 9; Yaq. 4:7.

5. Yihowwa noꞌoo eeyyoꞌaanna lummise uudoꞌaa hansaanneki mayeete?

⁵ Yihowwa noꞌoo eeyyaꞌneexxa addatati isibaa shiqa dandeennannon. Iitta hinaanneki mayeete? Buutotinna Yihowwa noꞌoo dadeeki eeyyatixxinna eeyyematixxi halcha noꞌo giddo hexxaashsha asseeten. Dadumi noꞌongi noꞌoo eeyyaaka manjo eenannoshsha assaan. Tenneꞌaa, Yihowwa noꞌoo eeyyaꞌneexxa egennanno wodda noꞌonna edi irra isoo eenaꞌni menannon. (1 Yo. 4:19) Noꞌo isiꞌaa anfeennexxi jaalala lebbaꞌni meteenxe qixxeꞌni, isinna noꞌaa afeexxi jaalala lebbaꞌni metaan. Maxaafi Qullichchi: “Mageniinbaa shiqqe, isinna haꞌnoobaa shiqaan” hiyyaan. (Yaq. 4:8) Yihowwa noꞌoo eeyyaꞌneexxa anfeennexxa adde jabeesseꞌnannoki hittate?

YIHOWWA NOꞌOO EEYYAꞌNEEXXA ADDANTANNOSHSHA GARGAARTAAXXI YAANE MAACHCHO?

6. Yihowwa ateꞌe eeyyaꞌneexxa addatateꞌe, isi atiꞌaa maa assoꞌaa kadhata dandeettatto?

⁶ Hassaattexxa yaane caꞌa assite kuli, ittan kadhateꞌni jabaat. (Luq. 18:1; Rom. 12:12) Hasissaꞌnoole duuchchiinxa barra, higge higgeen— Yihowwa ateꞌe uudaꞌne garinni atinna ifi uuddattoshsha gargaroꞌa kadhat. Dhugaaten, ifi tuffattattoshsha assitaꞌneexxi qalbe sholla qicinni addattabaaxxi hexxaan. Kaddoolenna, Yihowwa qalbe atixxi iimi darre lumoke kadeexxa qalliyyi. (1 Yo. 3:19, 20) Isi ati ifi egendebexxo iimi darre ateꞌe egeꞌneꞌeen, ittan isi ati uuda dandeettabexxoxxa ati giddo hexxeexxa eloxxa yaane uuda dandeꞌaan. (1 Sa. 16:7; 2 Ze. 6:30) Tenneꞌaa qalbe atixxi giddo hexxeexxa yaane isi edo farri asse kulateenna isi ateꞌe eeyyaꞌneexxa addattattoshsha gargaaroꞌaa isoo qoratee hooddoxxeꞌe. (Far. 62:8) Okkooꞌni buttiiꞌni hedheeka gorsa hujeteꞌni hosissaꞌni kadha atixxinni qabaake oraꞌni hedhi.

7-8. Faarsanji Yihowwa noꞌaa jaalala afeexxa kokeesseeki hittate?

⁷ Yihowwa haasoꞌeexxa yaane muuxaaxxa addati. Yihowwa, Maxaafa Qullichcha borreesseeki manni, isi dhugaa haasoꞌaake Mageno kadeexxa borreessaashsha asseen. Faarsanji Daawiti, Yihowwaa hiyyeexxa yaane hubati. “Yihowwa qalbe enqendeekee shiqiken, adde woxeeka manjonna gargaaraan” hiyyeen. (Far. 34:18, lqj.) Yaaddattoxxa yanna qofitti gatteetteshsha ateꞌni labbaaxxi hexxaan. Kaddomaleꞌe, Yihowwa iitta hexxeexxa yanna edi irra gargaarsa isika hassattoxxa egeꞌneemmaxxeꞌe, atibaa shiqatee kako aageen. Wele faaroꞌni Daawiti: “Indiddo anxa qalqallo atixxeꞌni cami” hiyye borreessen. (Far. 56:8) Isi rakkatteꞌe yaaddattoxxa yanna ateꞌe dedhabaan. Atiꞌaa qalbe giddixxinni hedaan, ittan mararaan. Gammoojje qiillakeꞌni meꞌaake manjiꞌa wodeꞌe abixxinaake miyi giddo hexxeexxi shiixxooxxi cingo fiixa yaane kaddammashsha, rakkoti wodda dundattoxxa indiddo atixxa Yihowwa lummisee uudaan. Faaro 139:3 “[Yihowwaa] ora anka duuchcha egendeetten” hiyyaan. Yihowwa ora atika duuchcha uudaan, kaddoolenna miꞌlachcho assaꞌneeki ati assitaattexxe eloxxe yaaneꞌniten. (Ibr. 6:10) Mayee? Buutotinna isoo gammachchiisateꞌe assitaattexxa yaane duuchcha lummise uudaammaxxeeten.a

⁸ Qaale isixxeꞌni borrssiseeke jajjabeessaake yaadinni Yihowwa: “Ateꞌe hittee qico eeyyaannexxanna atiꞌaa hedaannexxa egendottaa hasaannen” hiyyeeshshaten. Iimiiꞌni uundennashshanni, Seexani, ‘Yihowwa anee eeyyaꞌnebaan’ hite heddattoshsha assaka dhara haasoꞌaꞌneen. Tenneꞌaa Yihowwa ateꞌe eeyyaꞌneexxa mandattoxxa yanna, ‘Addata hasissaaki ayyeete?—“dhariinke anna” moo “dhugaatike Mageno”?’ hite ifi qori.—Yoh. 8:44; Far. 31:5.

9. Yihowwa isoo eeyyaake manjiꞌaa maa kako aagee? (Zetsiꞌaate 20:5, 6)

⁹ Yihowwa isoo eeyyaake manjiꞌaa maa assaaxxa hedi. Yihowwa, Muuseꞌanna Israꞌeelootakeꞌe maa hiyyeexxaa uudi. (Zetsiꞌaate 20:5, 6 yaansis.) Yihowwa isoo eeyyaake manjiꞌaa addatendeexxa jaalala duuchchinii wodda leellishateꞌe kako aageen. Tinni hiyya, Yihowwa addatemeeke Mageno kademmaxxeꞌe, isoo eeyyaaka manjo ijjenda jibbabaaxxa kokeessitaan. (Neh. 1:5) Tenneꞌaa Yihowwa ateꞌe eeyyaꞌneexxa koka hassattoxxa yanna, hekki hitettexxi ‘Ani Yihowwaa eeyyaanne?’ hite ifi qori. Okkooꞌni tenne yaane hedi: Ati isoo eetaattolenna isoo gammachchiisateꞌe dandeettettexxa yaane assitaattole, isinna atee yoꞌoshsha eeyyaaxxa addati. (Dan. 9:4; 1 Qo. 8:3) Wele orinni, ati isoo eetaattexxa mama gophphaattole, isi ateꞌe eeyyaꞌneexxa mandaattekita mayeete? Isi atee yoꞌoshsha eeyyaammaxxeꞌe ijjenda atee hunabaan.

10-11. Yihowwa wodoteꞌe hitta hexxeexxa uushsho affottaa hasaꞌne? (Gelaatiya 2:20)

¹⁰ Yihowwa wodo ayyiꞌaa uwweexxa hedi. Yesuusi Kirsitoosixxe wodoki tolchi, Yihowwa manjiinke beltiꞌaa uwweexxe uwwa duuchchinaaꞌni lumoxxen. (Yoh. 3:16) Tinni uwwa atiꞌaa qofinni uwwendeexxee? Eeti! Hawaarya Phawuloosixxa hedhotixxa baranno uudi. Isi Kirsitaana kadebaa edi darre mitte mitte jabaxxa cubbo hujeemmaxxanna gonphe ifixxa injifatatee duuchchinii wodda woꞌlaancho assa hasissaammaxxa qalliyyi. (Rom. 7:24, 25; 1 Xi. 1:12-14) Kaddoolenna, isi wodo Yihowwa isiꞌaa qofinni uwweexxe uwwashsha uudaamman. (Gelaatiya 2:20 yaansis.) Yihowwa, Phawuloosi tennee yaane borreessaashsha asseeki mayeete kaddeexxa qalliyyi. Maxaafi Qullichchi giddo hexxeexxi yaane duuchchi noꞌaa barachchote kaddaaxxen. (Rom. 15:4) Phawuloosi borreesseki yaadi, Yihowwa, ati wodotixxa uwwa hitta uuddottaa hasaꞌneexxa leellishaan. Yihowwa, wodo atiꞌaa qofinni uwweexxe uwwashsha uuddottaa hasaꞌneen. Wodotixxa uwwa konne garinni uuddatto wodda Yihowwa ateꞌe qofinni hittee qico eeyyaꞌneexxa affeettexxi adde jabaattaan.

¹¹ Yihowwa, Belti isiki Yesuusi noꞌaa hiyye reyaashsha buttaa ergeexxe galateeffantaannen. Yesuusi buttiꞌaa dageexxi wele buuto kinni, Mageno uuddaaxxa dhugaate kaddeexxa yaane barsiisateeten. (Yoh. 18:37) Yesuusi, Yihowwa oose isixxa hittee qico eeyyaꞌneexxanna barsiiseꞌeen

YIHOWWA NOꞌOO EEYYAꞌNEEXXA YESUUSI BARSIISEEKI HITTATE?

12. Yihowwaa uuddaaxxa Yesuusi barsiiseexxa yaane addantaanneki mayeete?

¹² Yesuusi butta hedhemmaxxa yanna Yihowwa hitta hedheeke Mageno kadeexxa mannakee gammashshoti barsiisaamman. (Luq. 10:22) Isi Yihowwaa uuddaaxxa barsiiseexxa yaane addantannoshsha assitaaxxi buuto hexxeen. Yesuusi, buttiꞌaa dagebaa edi darre Ani isikeni welti iimateꞌni qeerraake bariꞌaa tureen. (Qol. 1:15) Iima hedhemma wodda Anni isiki meyyaxxanna labbaxxa oose isixxa hittee qico eeyyaꞌneexxa egeꞌneꞌeen. Yesuusi, manni Mageni insaꞌnee eeyyaꞌneexxa addataashsha gargaareeki hittate?

13. Yesuusi, Yihowwaa hitta uundonnaa hasaꞌne?

¹³ Yesuusi, Yihowwaaꞌa isi uudaꞌne garinni noꞌonna uundonnaa hasaꞌneen. Wengeeletike maxaafaꞌni Yesuusi, 160 caaldaaxxe bakkaꞌni Yihowwaaꞌa “Anna” hiyye yeꞌeen. Ittan hordofoleeyye isixxeni haasoꞌaammaxxa yanna Yihowwaaꞌa, “Anni haꞌnooki” yookiin “iimateꞌni hedheeki Anni haꞌnooki” hiyyaꞌni yeꞌaamman. (Mat. 5:16; 6:26) Qoꞌnetiki Maxaafi Qullichchi Matwoosi 5:16 iitta hiyyaan: “Qarixxi Mageniinxi ergantoleeyye, Yihowwaa ifisateenna yeꞌateeꞌe, ‘Duuchchiinxa Dandeꞌaake’ ‘Haranga Lumoke’ ittan ‘Lumoke Dadallo’ hiyyaake heddo ulfinniinke summinni yexxaamman, Yesuusi kinni, Yihowwa isoo mageneeffataꞌneeka manna hittee qico eeyyaꞌneexxa ifisateꞌe, manji duuchchi egeꞌneexxa ‘Anna’ hitaaxxa hiyya duuchchinii wodda laꞌoonfataamman.” Yesuusi, oose isxxa qalbe mitten eeyyaꞌneeke jaalalatike Annishsha Yihowwaa uundonnaa hasaꞌneexxi egeꞌnendeexxen. Isi, Yihowwaa “Anna” hiyyeeki mayeete kaddeexxa leellishaaka lame fakkeenna qoꞌninso.

14. Yesuusi noꞌo mitti mittingi iimatike Anni noꞌokixxe ille edo lumoxxa bakka anfeennexxa leellisheeki hittate? (Matwoosi 10:29-31) (Fakketanna uudi.)

¹⁴ Edinsennexxi Matwoosi 10:29-31 Yesuusi haasoꞌeeka yaada uundo. (Yaansis.) Diillise Yihowwaa eeyya dandeettabaaxxe yookiin mageneeffattabaaxxe shiixxaramma ciꞌan. Kaddoolenna, Anni noꞌoki mitte mitten diillise, lummise uudaammaxxeꞌe butta ibbaaki haanote kaddeexxa geltaa qicoꞌni egeꞌneꞌeen. Isiꞌaa jaalalati ergatendaꞌneexxa addatendeexxa mageneeffatole isixxa-faꞌi hittee qico lummise uuda! Qoꞌnetiki Maxaafi Qullichchi, laakkoossa 30 keꞌni “matanga umi haꞌnookiki ordichchi mittinna gatebaangi laakkoꞌemeꞌeen” hiyyaꞌneeka yaada: “Yihowwa tenne shiixxaramma yaaneꞌaa miꞌlachcho uwwe egeꞌnandi, isi Kirsitoosixxa hordofoleeyye mitte mittenda qalbe giddixxinni eeyyaꞌneexxa kokeessitaan” hiyyaan. Yesuusi noꞌo mitti mittingi iimatike Anni noꞌokixxe ille edo fiixa kandeennexxa addantonna hasaꞌneen.

15. Yesuusi, Yohaannisi 6:44 keꞌni, haasoꞌeeki yaadi iimatika Anna atika uuddaaxxa atee maa barsiisa?

¹⁵ Yesuusi “Anna” hitaaxxa hiyya laꞌoonfateeka langaka fakkeenna uundo. (Yohaannisi 6:44 yaansis.) Iimatiki Anni atiki isoo egendattoshshanna isoo eetattoshsha gargaareꞌeen. Iitta asseeki mayeete? Buutotinna qalbe atixxi giddo hexxeexxa eloxxa yaane uudeexxeeten. (Huj. 13:48) Yesuusi, Yohaannisi 6:44 keꞌni hedheeka yaada haasoꞌeeki Erimiyaasi 31:3 keꞌni hedheeka yaada ifisateete kada gophpheebaan. Tenne bakkaꞌni Yihowwa arda isika “Addatendeexxe jaalalanni ateꞌe anibaa harkilseennen” hiyyeen. (Er. 31:3; lqj.; nna Hos. 11:4 hokkokisiis) Iitta hiyyo maa hiyyote kaddeexxa hedi. Iimatiki jaalalatiki Anni atiki ati giddo hexxeexxa ati uuddabexxoxxa eloxxa yaane uuda ittin sufaan.

16. (a) Yesuusi Anna isika uuddaaxxa barsiiseexxa yaane hitta hiyye barsiiseeshsha uundanno? Isi barsiiseexxa yaane addantaanneki mayeetee? (b) Yihowwa atiꞌaa eloke Anna kaddeexxa affeettexxa adde jabeessedha dandeettattoki hittate? (“Duuchchiinge Eloke Kadeeka Anna” hitaꞌneexxa kollonna uudi)

¹⁶ Yesuusi, Yihowwa Anna noꞌoke kadeexxa barsiisee wodda haasoꞌeeka yaada: “Yihowwa Anna anke callabaan, isi haꞌnoꞌaanna Annaken. Haꞌnoo eeyyaꞌneexxanna haꞌnoꞌaa mitte mittengee qalbe giddixxenni hedaꞌneexxa egeꞌneennen” hiyyeeshsha uuda dandeennannon. Tenneꞌaa Yihowwa ateꞌe eeyyaꞌneexxa mandattoxxa yanna hekki hitettexxi ‘Iimatika Anna noꞌoka adda egeꞌneekinna isoo uuddaaxxa dhugaa haasoꞌaaki Belti isiki haasoꞌeexxa yaane ani addata hasissaba?’ hite ifi qori.—1 Ph. 2:22.

YIHOWWA ATEꞌE EEYAꞌNEEXXA AFFEETTEXXA ADDE JABEESSEDHA ITTIN SUFI

17. Yihowwa noꞌoo eeyyaꞌneexxa anfeennexxa adde jabeessedha ittin sufa hasisseeki mayeete?

¹⁷ Yihowa noꞌoo eeyyaꞌneexxa anfeennexxa adde jabeessedha ittin sufa hasissaan. Iimiiꞌni uundennashshanni dhiibbaaleessi naaphi noꞌooki Seexani, Yihowwaa ergatemmabeꞌnoshsha noꞌoo kutateꞌe assabaaxxi yaane hexxebaan. Tenneꞌaa noꞌoo gophisateenna Yihowwa noꞌoo eeyyaꞌnebaani hine addantannoshsha assateꞌe duuchchinii wodda woꞌlaancho assaꞌneen. Seexani noꞌoo injifatoꞌaa anga uwwa ijjenda hasissabaan!—Iyo. 27:5.

18. Yihowwa ateꞌe eeyyaꞌneexxa affeettexxa adde jabeessexxattoki hittate?

¹⁸ Yihowwaaxxe jaalalaꞌni affeettexxa adde jabeessedhatee isi ateꞌe uudaꞌnee garinni atinna ifi uuddattoshsha gargaaroꞌaa duuchchinii wodda kadhati. Maxaafa Qullichcha borreesseeki manni, isixxa dhugaatixxa jaalala hitta ifiseexxa hedi. Yihowwa isoo eeyyaaka manjo isinna wirri asse eeyyaaxxa qalliyyi. Wodo atiꞌaa qofinni uwwendeexxe uwwashsha assite uuda hasisseeki mayeete kaddeexxa hedi. Ittan Yihowwa iimateꞌni hedheeke atike Anna kadeexxa Yesuusi haasoꞌeeka yaada addati. Okkooꞌni mitti manji atee, “Yihowwa atee eeyyaꞌnexxa addattaatte?” hiyye qoraa wodda “Eeti, isi anee eeyyaꞌneen! Aninna isoo eeyyannexxa leellishatee barra barrandeꞌni dandeꞌennexxa yaane duuchcha assaannen!” hiyya dandeettatton.