Mageniinxi Jaalala Baro Baro Hexxaan

1-2. Heddo Kirsitaanaꞌni geltaꞌneexxi rakko heente?

ABBAAYYATEꞌNI kexxeexxe jabaxxe hobonbaltexxe oddoꞌni hexxeexxa hobolo hedde. Kexxeexxi hobonbalte tennee hobolo elqenna kayya runkaassaꞌneen. Mitti manji hobolo leꞌmitabaashsha assaaka sibiljo buttiꞌaa darba gophoole, hobolo tennee hobonbalte hasseexxe bakkabaa adhdhite metaan. Hobolotiki buttiꞌaa darbinaaki sibilji, hobolo hexxeexxe bakkanaaꞌni lemitabaashshanna raankitabaashsha assaan.

² Rakko jabaxxi gelteeꞌnaa ossitatto wodda hobonbaltetixxe oddoꞌni hexxeexxe hoboloshsha ateꞌni fakkaattaaxxi hexxaan. Tennenaaꞌni kexxeexxa yaadiki raankitatton. Mitte barra Yihowwa atee eeyyaꞌneexxanna gargaaraꞌneexxa addattatton, wele wodda kinni hitta hexxeexxe rakko giddo hexxeettexxa isi uudaꞌneenxa mandatton. (Far. 10:1; 13:1) Mitti jaali atiki jajjabeessaaka yaada haasoꞌaa wodda henooxxe yannaꞌa qalbe atee gammaddaaxxi hexxaan. (Fak. 17:17; 25:11) Kaddoolenna, Yihowwa atee gargaaraꞌneexxa higgeen mandatton. Matanga Yihowwa ateꞌni adde woxeeshshanna heddattoxxi hexxaan. Rakko geltaaꞌnaanni jabaatte uurra dandeettattoki hittate? Wele orinni, Yihowwa atee eeyyaꞌneexxanna gargaaraaxxa, addata dandeettattokinna addattetteshshanni hexxattoki hittate?

3. Faaro 31:7 nna 136:1 keꞌni “addatendeexxe jaalala” hitaꞌneexxe hiyyaxxi tika maachcho? Iitta hexxeexxa jaalala leellishati duuchchiingenaaꞌni caalaaki fakkeenni Yihowwaten hinaanneki mayeete? (Fakketanna uudi.)

³ Rakko geltaa wodda leꞌminabeꞌnoshsha noꞌoo gargaartaaxxi mitte yaane, Yihowwaxxa addatendeexxa jaalala qalliyyaten. (Faaro 31:7; 136:1 yaansis.) “Addatendeexxa jaalala” hitaaxxi hiyya mitti manji welki afaaxxa jabaxxanna haanonna taxxabaaxxa mittunte ifissaaxxe hiyyan. Addatendeexxa jaalala leellishati duuchchiingenaaꞌni caaleeke fakkeenna kadaaki Yihowwaten. Matanga, Maxaafi Qulichchi Yihowwaa ‘addatendeexxi jaalala. . . . . . . haranga bira saxxeeke’ kadeexxa haasoꞌaan. (Zts. 34:6, 7) Ittan Maxaafi Qullichchi Yihowwaaꞌa: “Atee yeꞌaake duuchchiꞌaa leellishshattoxxi addatendeexxi jaalala gabala affebaan” hiyyaan. (Far. 86:5) Iitta hiyyo: Yihowwa addatendeexxa ergantoole isixxa ijjenda hunabaan! hiyyote kaddeexxa hedi. Jabaxxi rakko ateꞌni geltaaxxa yanna addatendeexxi Yihowwaxxi jaalala raankitabexxoshsha atee assitaaxxa qalli hiyyi.—Far. 23:4.

YIHOWWAXXI JAALALA MAXAAFI QULLICHCHIINXE HUNDAAYYE BARACHCHOSHSHATE KADDEEXXA HEDI

4. Mitte mitte Maxaafi Qullichchiinxe hundaayye barachchoka fakkeennuwwa kuli. Tennee barachchuwwa qalbe woꞌmani addantaanneki mayeete?

⁴ Rakko geltaa wodda leꞌminabeꞌnoshsha assitaaxxi wele yaane Yihowwaxxi jaalala Maxaafi Qullichchiinxe hundaayye barachchoshshate kaddeexxa hedaten. “Maxaafi Qullichchiinxa hundaayye barachcho” hitaaxxa hiyya heddatto wodda sammo atixxibaa daggaꞌneexxi yaane maachcho? Mageniinxe Qaalenaaꞌni baratteettaxxa hundaayye barachchuwwa qalli hitattoxxi hexxaan. Fakkeennakeꞌe, Mageniinki summi Yihowwate kadeexxa, Yesuusi Mageniinke mitteechcho Belto kadeexxa, reyeeki manji mittechchonna egeꞌnabaaxxanna butta gennete kaddeeꞌnaa manji iseꞌni baro baro hedhaaxxa baratteetten. (Far. 83:18; Mek. 9:5; Yoh. 3:16; Lel. 21:3, 4) Tennee barachchuwwa mittele addattettechchi uduma sholla qicinni wocci assitaaxxon. Mayee? Buutotinna tinni barachchuwwa dhugaateꞌni hundeessendeexxe kaddeexxa egendeetten. Yihowwaxxa jaalala Maxaafi Qullichchiinxe hundaayye barachchoshsha uuda, ‘Yihowwa atee dedheꞌeen, hitta hedhee jeeji giddo hexxettenxa uudaꞌnebaan yookiin hedaꞌnebaan’ hitaaxxa hedino injifattattoshsha gargaartaaki hittatte kaddeexxa uundo.

5. Mitti manji dhariinxe barachchonaaꞌni fulaa qico ifisi.

⁵ Taakkaa Maxaafa Qullichcha barattette wodda dhariinxe barachchonaaꞌni bayyattattoshsha atee gargaarteexxi yaane maachcho? Edo hexxettaxxi adde barsiisseexxa yaane, Maxaafi Qullichchi barsiisaꞌneexxe dhugaani hokkokisa atee gargaara gophpheebaan. Mitte fakkeenna uundo: Edo Yesuusi Duuchchiinxa Dandeꞌaake Magenoni hitee addattaattan hino. Maxaafa Qullichcha barattettexxi ‘Tinni barachcho dhugaandee?’ hite ifi qortetten. Maxaafi Qullichchi maa hiyyaaxxa qoꞌnissettechchi uduma, Yesuusi Duuchchiinxa Dandeꞌaake Mageno kadeebaaxxa egendetten. Okkooꞌni dhariinxe barachchoxxe bakkaꞌni Yesuusi “dada duuchchike angafan” “Mageniinke mitteechcho Belton” hitaaxxa dhugaatixxa barachcho tukkeessitetten. (Qol. 1:15; Yoh. 3:18) Dhugaaten, dhariinxi barachcho diigatee haꞌuraake jabake gollishshaten. (2 Qo. 10:4, 5) Kaddomaleꞌe, mittele diigge saxxottole edo baratteettaxxe dhariinxe barachchobaa higgaaxxon.—Flp. 3:13.

6. Yihowwa, Faaro 136 keꞌni “isixxi addatendeexxi jaalala baro baro jabaatte hexxaan” hiyyaaki yaadi higge higgeen borreessemaashsha asseki mayeete?

⁶ Yihowwaxxa jaalala uuddaaxxa Maxaafi Qullichchi barsiisaaxxa yaane addatateꞌe iimiiꞌni uundennaxxenni weli fakkaattaaxxa yaane assa dandeettatton. Geltaꞌneexxe rakkonaaꞌni kexxeexxa, Yihowwa atee eeyyaꞌneexxa mama saffoottole, ‘Tinni hedino nageꞌiniinxee?’ hite ifi qori. Yihowwaxxe jaalalaꞌni mama affoottole, qalbe atixxi giddo hedheeka mama tenne qoꞌnexxe illitte xiqseꞌni, Faaro 136:1 keꞌni hedheeke yaadinni hokkokisi. Yihowwa jaalala isixxa “addatendeexxe” hiyyeeki mayeete? Faarotike maxaafaꞌni “isixxi addatendeexxi jaalala baro baro jabaatte hexxaan” hiyyaꞌneeki yaadi 26 nele borreessemeeki mayeete? Iimiiꞌni uundennashshanni, Qaale Mageniinxenaaꞌni baratteꞌe sholla qicinni addatteettaxxe wele hundaayye barachchoshshanni, Yihowwa arda isikee leellishaꞌneexxi addatendeexxi jalalanna Maxaafi Qullichchiinxe hundaayye barachchoshshaten. Yihowwaxxe uushshoꞌni ‘laꞌo affeexxon yookiin isi atee eeyyaꞌnebaan’ hitaaxxi hedino dhariinxen. Jabeenniki dhariinxe barachchonaaꞌni bayyattettashshanni rakke tennee hedinonna ifinaaꞌni bayyisi!

7. Yihowwa atee eeyyaꞌneexxa haasoottaaxxa xiqsuwwa kuli.

⁷ Maxaafi Qullichchi giddo Yihowwa noꞌoo eeyyaꞌneexxa kokeessitaaxxi heddo xiqsuwwa hexxeen. Fakkeennakeꞌe, Yesuusi hordofoole isixxa: “Haꞌnoo heddo diillisenaaꞌni caleeka hira affineen” hiyyeen. (Mat. 10:31) Yihowwa ifiꞌaanni arda isika: “Ani atee jajjabeessannon, eeti gargaarannon, qullitte middixxe anga anxenni atee jabeesse abidannon” hiyyeen. (Isa. 41:10) Tinni hiyyuwwa hittatta jajjabeessitaaxxe kaddeexxa hedi. Yesuusi ‘Caaleeka hira affinaan’ hiyyeebaan, Yihowwanna kinni ‘Atee gargaarannoxxi hexxaan’ hiyyeebaan. Tenne irra “Haꞌnoo caaleeka hira affineen” ittan “Ani atee gargaarannon” hineen. Rakko ateꞌni gelteeꞌnaa Yihowwa atee eeyyaꞌneexxa mandaattole, tinni xiqsuwwa sammo atixxeꞌni eloki yaadi laqemaashsha assa calla keddebaaki, Yihowwa atee qalbe mittenni eeyyaꞌneexxa egendattoshsha gargaartaan. Tinni xiqsuwwa haasoottaꞌneexxi yaane dhugaaten. Tennee xiqsuwwa Yihowwabaa kadhattaꞌni adda heddaattole, 1 Yohaannisi 4:16 keꞌni, borreessendeeshshanni atinna “Mageni noꞌaa afeexxa jaalala egenneennen, ittan addanteennen” hiyya dandeettatton.a

8. Mitte mitte yanna Yihowwa atee eeyyaꞌneexxa mandaattole maa assa dandeettatto?

⁸ Mitte mitte yanna Yihowwa atee eeyyaꞌneexxa mandaattole maa assa dandeettatto? Qalbe atixxeꞌni laqendaꞌneexxa yaane egendeettexxe yaanenni hokkokkisi. Qalbe noꞌoxxeꞌni laqendaꞌneexxa yaane dhugaate hineꞌe addantaaꞌnon, Yihowwa noꞌoo eeyyaꞌneexxa Qaale isixxeꞌni haasoꞌeeki yaadi dhugaatiken. Yihowwa noꞌoo eeyyaꞌneexxa addata gonphaannole, adabuwwa isikenaaꞌni taakkaxxe kaddeexxa jaalala lumminse uundaabeꞌnonni hiyyoten.—1 Yo. 4:8.

YIHOWWA ATEE EEYYAꞌNEEXXA HEDI

9-10. Yesuusi, Yohaannisi 16:26, 27 keꞌni “Aabinna umo isingeꞌni haꞌnoo eeyyaan” hiyye haasoꞌeeke xiqsetike qarqaraꞌni hedheeke yaadixxi erga maachcho? (Fakkatanna uudi.)

⁹ Yesuusi hordofoole isixxee “Aabinna haꞌnoo eeyyaan” hiyyeeka yaada qoꞌnisati, Yihowwaxxa jaalala uuddaaxxa heddo yaane barantannon. (Yohaannisi 16:26, 27 yaansis.) Yesuusi konnee yaada haasoꞌeeki hordofoole isixxa gammachchisoꞌaa callabaan. Matanga, xiqsetike qarqaraꞌni hedheeki yaadi, Yesuusi ettene yannaꞌni insaꞌneꞌni laqendeexxa yaane haasoꞌateꞌni hedhemmabaaxxa leellishaan. Tenne irra haasoꞌateꞌni hedhemmaki kadha uuddaaxxen.

¹⁰ Yesuusi hordofoole isixxi isi darrenaaꞌni Aabii kadhantaashsha maleꞌe isibaa kadhantabaashsha kuleen. (Yoh. 16:23, 24) Ettene yannaꞌni tinni egeꞌna insaꞌnaa hasissaaxxemman. Isi reyotenaaꞌni keꞌeechchi uduma, hordofoole isibaa kadhatatee yora gophpheebaan. Yesuusi shiqike jaalo insaꞌnekemman. Isi insaꞌnee eeyyaammaxxeꞌe isibaa kadhantoole isi kadha insaꞌnexxa laqeꞌe Aabi edo shiqisaani hine hendaaxxinna hexxaan. Kaddomaleꞌe, Yesuusi insaꞌne iitta hine heda hasissabaaxxa haasoꞌeen. Mayee? Buutotinna insaꞌneꞌni “Aabinna haꞌnoo eeyyaan” hiyyeen. Tinni dhugaaꞌa kadha uuddaaxxa Maxaafi Qullichchi barsiisaaxxe hundaayye barachchoxxe kutan. Tinni yaane atiꞌaa maa laꞌo affeexxa hedi: Maxaafa Qullichcha baratteꞌe, Yesuusii egendetten ittan eeteetten. (Yoh. 14:21) Kaddoolenna, keꞌitiinke dhibbeesso baroꞌni hexxemmaxxe hordofooleyyeshshanni atinna Mageni ‘umo ifingeꞌni atee eeyyaꞌneexxa’ egendeettaxxeꞌe qalbe woꞌmanni kadhata dandeettatton. Tennee hiyya addattaattexxa Yihowwabaa kadhattattoxxa yanna duuchcha leellishshatton.—1 Yo. 5:14.

MAMI DAGAꞌNEEKI HABAAꞌNITE KADDEEXXA EGEꞌNI

11. Yihowwa noꞌoo eeyyaꞌneexxa mamanno wodda Seexani gammadaꞌneeki mayeete?

¹¹ Yihowwaxxa jaalala mammannoshsha assaaki yaadi dagaꞌneeki habaaꞌnite? Iitta hendannoshsha assaꞌneeki Seexanaken hite hiissitattoxxi hexxaan, kunni hiissichchi gama mittenaaꞌni dhugaatiken. Seexani noꞌoo ‘liqnsoꞌaa hasammaxxeꞌe’ Yihowwa noꞌoo eeyyaꞌneexxa mammanno wodda gammadaan. (1 Ph. 5:8) Matanga Yihowwa noꞌaa afeexxe jaalalanaaꞌni kexxeexxa wodo qophpheessen, Seexani kinni wodo tinni noꞌaa laꞌo affebaashsha assine hendonnaa hasaꞌneen. (Ibr. 2:9) Yihowwa noꞌoo eeyyaꞌneexxa mammonnoleta ayyee badhaansaanne? Seexana badhaansaanne hiyyoten. Rakko geltaa wodda adde wonxonnole ayyixxe fedhii muunxaanne hiyyote? Seexaniinxe fedhii muunxaanne hiyyotebaa? Seexani sobiki Yihowwa noꞌoo eeyyaꞌneexxa mammannoshsha assaꞌneexxa hedi. Yihowwa kinni Seexana eeyyaꞌnebaan. Tenneꞌaa isixxe “diiniinxe hujenni” Yihowwa noꞌoo eeyyaꞌnebaashshanna hasaꞌnebaashsha hendonnaa woꞌlaanaꞌneen. (Eff. 6:11) Naaphi noꞌoki assatee hasaꞌneexxa yaane egennanno wodda ‘Dabiloosi moromatee’ anfeennexxa shenunte jabeesseꞌnannon.—Yaq. 4:7.

12-13. Cubbaaleeyye kada noꞌoxxi Yihowwa noꞌoo eeyyaꞌneexxa mammannoshsha assitaaki hittate kada dandeetta?

¹² Yihowwaxxa jaalala mammannoshsha assitaaxxi wele yaanenna hexxeen. Tinni yaane maachcho kada dandeetta? Dhaalleennexxe cubbon. (Far. 51:5; Rom. 5:12) Cubbo manjo dadatike Magenonaaꞌni gargariti hiissiteen. Ittan manjiinxa sammo, qalbenna biso miiteen.

¹³ Cubbo hedino noꞌoxxa miiteexxi ifi jibbinannoshsha, yaandannoshsha, nageꞌa gonphannoshshanna shoonkannoshsha assiteen. Cubbo hunjanno wodda iitta hexxeexxi yaane noꞌoꞌni laqema dandeettaan. Kaddomaleꞌe, dhaallennexxe cubbonaaꞌni kexxeexxanna iitta hexxeexxi hedino sammo noꞌoxxibaa daga dandeettaan. Kunni jeeji manjiinki belti taakkaa dademeemmakenaaꞌni haranga gargariti hedheeken. (Rom. 8:20, 21) Mitte molee dhuqaateexxi kaamole fayya hexxemma woddishsha fiiga gophphammashshanni, noꞌonna qulliyye kada gonpheennaxxeꞌe keꞌitokeꞌni dademmenne woddishsha woꞌma fayyunte anfebeꞌnon. Tenneꞌaa mitte mitte wodda Yihowwa noꞌoo eeyyaꞌneexxa mama manbeꞌa hinannoshsha assitaaxxe yaanebaan. Iitta hexxeexxi yaane ateꞌni futti hitaa wodda Yihowwa ‘isoo eeyyakee, seera isika ulfeessaake manjiꞌaa, kako aageexxa heqqedhaake . . . addatendeexxa jaalala leellishaakenna lumoke sodaatemaake Mageno’ kadeexxa qalli hiyya hasissaan.—Neh. 1:5.

14. Yihowwa atee ijjenda eeyyaꞌnebaan hiyyaaka yaada faachcheeffatateꞌe wodo heda gargaartaaki hittate? (Roome 5:8) (“Cubbo Affeexxe Sobatixxe Hunnanaaꞌni ifi heqqedhdhe” hitaꞌneexxa kollona uudi.)

¹⁴ Dhugaaten, Yihowwaxxi jaalala noꞌaa hasissaake manjobaani hine ifi hendannoxxi mitte mitte yanna hexxaan. Dhugaa haasoꞌateꞌe, noꞌo jaalala isixxi hasissammake mannabaan, tinninna jaalala isixxi hittee qico lumoxxe kaddeexxa leellishshaaxxe yaanen. Ifixxe hunnanni Yihowwaxxa jaalala alfa dandeennaaꞌnon. Kaddoolenna, wodo cubbo noꞌoxxa buqqaan, Yihowwanna isee qophpheesseki noꞌoo eeyyammaxxeeten. (1 Yo. 4:10) Yesuusi buttiꞌaa dageeki, cubbaaleeyye fayyisoꞌaate maleꞌe qulliyyeteete kaddeebaaxxa deetoxxeꞌe. (Roome 5:8 yaansis.) Noꞌo giddiiꞌni ayyinna dedha affeebaaxxa yaane calla assaaki hedhebaan, Yihowwanna iitta hexxeexxa yaane noꞌonaaꞌni heqqaꞌnebaan. Dhaalleennexxi cubbo Yihowwa noꞌoo eeyyaꞌneexxa mammannoshsha assitaꞌneexxa egennanno wodda cubbo hedino noꞌoxxa micciirtabaashsha heqqedhateꞌe hidhanteenneke kandannon.—Rom. 7:24, 25.

ADDATENDEETTEKE KADE HEDHATEE MURTEESSEDHI

15-16. Yihowwaa addattemme heꞌnaannole, heene yaane addantanno? Mayee? (2 Samuꞌeli 22:26)

¹⁵ Yihowwa isonaaꞌni ‘gargariti higa gophati’ eloxxa murte murteesseꞌnonnaa hasaꞌneen. (Zed. 30:19, 20) Iitta assinaannole isi duuchchinii wodda noꞌaa addatemeeke kadeexxa addata dandeennannon. (2 Samuꞌeli 22:26 yaansis.) Noꞌo Yihowwaa addatemme heꞌnenne qicoꞌni, hiini rakkonna geltoole isi noꞌoo gargaaraaxxa mammannoxxi mitte buuto hexxebaan.

¹⁶ Iimiiꞌni uundaꞌni dangennashshanni, rakko geltaa wodda leleꞌminabeꞌnoshsha assitaaxxa heddo buuto anfeennen. Yihowwa noꞌoo eeyyaꞌneexxanna gargaaraaxxa egenneennen. Maxaafi Qullichchinna barsisaꞌneexxi yaane tennenden. Isi noꞌoo eeyyaaxxa mammaannole, qalbe noꞌoxxeꞌni laqendaꞌneexxe yaane irra jaalala isixxa uuddaaxxa egenneennexxe yaaneꞌni alalcha dandeennannon. Yihowwaxxi addatendeexxi jaalala baro baro hexxaaxxa Maxaafi Qullichchi barsiisaaxxe dhugaaꞌni addanto.