Israꞌeelixxe Mootoleeyyenaaꞌn Alfinannoxxa Laꞌo Affeexxa Barachcho

1-2. Mitte mitte Israꞌeelixxa mootoleeyye uuddaaxxa Maxaafi Qullichchi maa hiyya?

MAXAAFI Qullichchi Israꞌeelika boga 40 caaldaxxi mootoleeyyea galchiteexxa haasoꞌaan. Kunni raaginna, insaꞌne giddiiꞌn mitti mitti manni asseexxa yaane caꞌa assee kulaan. Fakkeennakeꞌe, eloxxe hiyyendeenxi mootoleeyye midde mitte mitte elobaaxxa yaane assiteen. Eloke mootichcha hiyyemeemmaka Daawiti uundo. Yihowwa: ‘Daawiti ille isixxi edo toggitte kaddeexxa yaane asseexxanna. . . woꞌma qalbenni isooꞌo hordofeexxa’ haasoꞌeen. (1 Neg. 14:8) Kaddoolenna kunni manji miniinka anna affeexxe manjichchonni yabaabulati miniink anni iseki bagedo duuleba reyaashsha asseen.—2 Samu. 11:4, 14, 15.

² Wele darrenaaꞌn kinni, heddo isiꞌaa addatendemabaaxxi mootoleeyye mitte mitte eloxxa yaane hujjeen. Roobiꞌaamika fakkeenna uundo. Isi Yihowwaxxe ille edo ‘elobaaxxa yaane hujeemman.’ (2 Zeena 12:14) Kaddoolenna, Roobiꞌaami mootumma isixxenaaꞌn tomme gosa gargariti higgaashsha Mageni uwweemmake ajajiꞌaa ajajemeen. Ittan qachcha jabeessati mageniinka arda naaphakenaaꞌn heqqeemman.—1 Neg. 12:21-24; 2 Zeena 11:5-12.

3. Maa hiyyaaki haranga hasisaaki qortumi keꞌa? Tenne qoꞌneꞌni mariꞌaantaannexxi yaane maachcho?

³ Mitti hasisaaki qortumi keꞌaan. Israꞌeelixxi mootoleeyye eloxxenna elobaaxxe kaddeexxa yaane hujjoole, Yihowwa mitti mootichchi isixxe ille edo addatemeeke kadeexxa murtesaꞌneeki hittate? Konne qortumika hiissichcho egeꞌna, Yihowwa Noꞌonaaꞌn hasaꞌneexxi yaane maachcho kaddeexxa egennannoshsha gargaartaan. Yihowwa Israꞌeelixxa mootoleeyye giddo insaꞌneexxa firfirsaa wodda uudaꞌneexxa sase yaane mariꞌantannon: tinniirinna qalbe insaꞌneexxika jeeja, aadde aaggo insaꞌneexxa, ittan dhugaatixxe mageneeffachchoꞌaa anfeexxa shenunte.

MITTE QALBENNI YIHOWWAA EENAꞌNEE QICO

4. Addatendeexxenna addatendebaaxxe mootoleeyyeexxe oddoꞌn hexxemmaxxi mitte gargarunte maachcho?

⁴ Mageni gammadammaxxi mootoleeyye isooꞌo mitte qalbenni mageneeffattaammaxxen.b Eloke mootichcha kadeemaki Iyyoosafixi “Yihowwaaꞌa woꞌma qalbenni halseemman.” (2 Zeena 22:9) Maxaafi Qullichchi Iyyoosiyaasi uuddaaxxa: “Woꞌma qalbenni Yihowwabaa higeeki isishsha hedheeki mootichchi isi edonna hedhemmabaan” hiyyaan. (2 Neg. 23:25) Udumiiꞌn elobaaxxa yaane hujeemmaka solomooni kinni, “qalbe isixxi Mageno isiki Yihowwa edo woꞌmatemmabaan” hiyyaan. (1 Neg. 11:4) Ittan Maxaafi Qullichchi wele addatemeemabaaka mootichcha Abiyaami: “Qalbe isixxi Mageno isiki Yihowwa edo woꞌmatemmabaan” hiyyaan.—1 Neg. 15:3.

5. Woꞌma qalbenni Yihowwa ergatemate hiyyo maa hiyyote kaddeexxa ifis?.

⁵ Mitti manji woꞌma qalbenni Yihowwaa mageneeffataan hiyyo, mageneeffata hasissammanxe calla mageneeffataan hiyyotebaan. Tenneꞌaa irra Yihowwaaꞌa ergatemaaki qalbetixxe jaalalanninna isiꞌaa afeeke ulfinninniten. Ittan hedho isixxika baro duuchchaꞌn Yihowwaꞌa afeexxa jaalalanna ulfinna jabeesedha ittin sufaan.

6. Woꞌma qalbenni ittin ediꞌaa sufa dandennannoki hittate? (Fakkeenna 4:23; Matwoosi 5:29, 30)

⁶ Addatendeexxa mootoleeyye fakkaata dandeennannokinna woꞌma qalbenni ittin ediꞌaa sufa dandeennannoki hittate? Fuggoxxa yaane hunjannoshsha assitaaxxe yaanenaaꞌn bayyatatiten. Fakkennakeꞌe nageellitte kaddebaaxxi dayyeeffachcho, elobaaxxi jaaluntenna maallaqiinxi jaalala qalbe noꞌoxxa qoqqoodaa dandeettaan. Mitte yaane Yihowwaa anfeennexxa jaalala qiidisa saffeexxa hubantonnole, ettene yaanenaaꞌn bayyatatee wiinamiinxa tarkaaffe adhdhinno.—Fakkeenna 4:23; Matwoosi 5:29, 30 yaansis.

7. Yihowwaa anfeennexxa jaalala qiidisa dandeettaaxxe heene yaanenaaꞌninna bayyata hasisseeki mayeete?

⁷ Qalbe noꞌoxxi qoqqoodendaaꞌnaa anga mirqeꞌne uuda hasissabaan. Xexxeꞌata gonphonnole, Yihowwaxxe ergachchoꞌn yoꞌoxxa yanna saꞌisinaannaxxee, elobaaxxi yaane noꞌoo geltabaan hine hendannoxxi hexxaan. Fakkeennakeꞌe, jabaxxi boojjenna diidallichchi hedheeꞌnaa gadho hexxetteshsha assite hedi. Mine geltetteshshanni giira haꞌishshetten. Hula bandetteshshanni haanni assitee waaldeeꞌnaa eldaa? Boojje miniꞌaa eꞌyitaammaxxeeꞌe mini qiidaan. Kabaaꞌn maachcho barantano? Yihowwanni welti anfeennexxa firunte eebbishshaaxxa manfasiinxa sagale itatenaaꞌn caaldeexxa yaane assa hasissaan. Tinni noꞌoo miitaaxxi elobaaxxi yaanuwwa, tinninna buttatixxi qiidaxxi “ayyare” yookiin Mageni eeyyabaaxxi hedinno qalbe noꞌoxxa qoqqooddabaashsha hula cufa hasissaan.—Effe. 2:2.

CUBBO INSAꞌNEEXXE AADDE AANGEE QICO

8-9. Mootichchi Daawitinna mootichchi Hiziqiyaasi xixichchi uwwemee wodda maa assine? (Gogakeꞌn hexxeexxa fakke uudi.)

⁸ Kaddomaleꞌe wabeekkichchi Naataani, Daawiti cubbo hujat Yihowwaa yaasideexxa kulee woddi, Daawitinna ifi heeshshi assee aadde aageen. (2 Samu. 12:13) Faaro 51 kenaaꞌn asseexxe yaaneꞌaa aadde ageexxa kulaaka yaada isi ifiꞌaan borreesseenke yaadaꞌni afa dandeenannon. Daawiti aadde aageki, hujeexxe cubboꞌa aadde aagechcho fakkeesse Naataanii soboꞌaa yookiin adheendaaxxe tarkaaffenaaꞌn gatatee hiyyeetebaan.—Faaro 51:3, 4, 17, faarotike umoꞌn afemaaka ifisanjo.

⁹ Mootichchi Hiziqiyaasinna Yihowwa edo cubbo hujeemman. Maxaafi Qullichchi: “Kaddoolenna Hiziqiyaasi qalbe kijibbeemmaxxee assendeexxe eloxxe yaaneꞌa saadino afebaang gateen, Mageniinxi mufe isoꞌni, Yihuudaꞌninna Iyyerussalemiꞌn kaddeen” hiyyaan. (2 Zeena 32:25) Hiziqiyaasi hollaantichcha kadeeki mayeete? Dedha dureessa kadeexxee, Asoorika sannachcha injifateexxee yookiin dhibotenaaꞌn masoti fayyeexxee manjo duuchchanaaꞌn saꞌeechcho isoꞌn fakkaata gophpheebaan. Wabeekkichchi Isayaasi isooꞌo xixaashsha assiteexxi yaane, karra affeexxa duuchcha Baabiloonotakee leellishaashsha assiteexxe hollaate kada gophpheebaan. (2 Neg. 20:12-18) Kaddoolenna, Hiziqiyaasi Daawitishshanni ifi heeshshi assati aadde aageen. (2 Zeena 32:26) Tennenaaꞌn kexxeexxa Yihowwa isi edo ‘toggitte yaane assaꞌneeke’ addatemeeke mootichchishsha assee uudeen.—2 Neg. 18:3.

10. Ameesiyaasi xixichchi uwwemee wodda maa asse?

¹⁰ Wele darrenaaꞌn kinni, Yihuudiki mootichchi Ameesiyaasi eloxxa yaane assolenna ‘ettene yaane assaammaki woꞌma qalbennitemabaan.’ (2 Zeena 25:2) Isi hujeexxi elobaaxxi yaane maachcho? Yihowwa Eedomii injifataashsha gargaareechchi uduma, Ameesiyaasi adibaare insaꞌneexxa sagadeen.c Okkooꞌni Yihowwaki wabeekkichchi, balleessa isixxa edo mare hasoꞌeexxa yanna, isi hiyyaꞌneexxa yaane laqa gibeen.—2 Zeena 25:14-16.

11. 2 Qorontoosi 7:9, 11 xxe hundaayyeshshanni, Yihowwa noꞌaa gattowwaal hiyyoꞌaa hansaannole maa assa hasissa? (Fakkuwwa uudi.)

¹¹ Taꞌi qicoꞌn uundenneke fakkeennuwwinaaꞌn maa barantenne? Cubbo hunjennexxee aadde aaganna higgeenna huja gophatee dandeennennexxa duuchcha assa hasissaan. Noꞌoꞌn shiixxooxe fakkaattaanxe yaaneꞌaa gubaꞌetixxi geedhe gorsitoolenaꞌa? Yihowwa yookiin geedhe noꞌoo eenaꞌnebaashsha assine heda hasissabaan. Elonxe hiyyeendaammaxxe Israꞌeelixxe mootoleeyyeꞌaanna midde gorsinna xixichchi hasiseemman. (Ibra. 12:6) Xixichchi noꞌaa uwwemaa wodda, (1) ifi heeshshi asse adhdha, (2) hasissaaxxa jijjiirra assa, ittan (3) Yihowwa qalbe woꞌmanni ergatema ittin ediꞌaa sufa hasissaan. Cubbo hunjennexxee aadde aangonnole, Yihowwa gattowwaal hiyyaan.—2 Qorontoosi 7:9, 11 yaansis.

DHUGAATIXXA MAGENEEFFACHCHO JABEESINE ABIXXINNEE QICO

12. Addatendeexxa mootoleeyye addatendebaaxxenaaꞌn gargari hisse ifisaachchi maachcho?

¹² Yihowwa isiꞌaa addatendeexxe mootoleeyyeshsha asse hedaammaxxi, dhugaatixxa mageneeffachcho jabeessexxe abixxiteemmaxxen. Ittan insaꞌne galchinaammaki Yihowwaki ardi, insaꞌneeshshan assaashsha jajjabeesitaammaxxe mootoleeyyen. Dhugaaten, iimiiꞌn uundennashshanni kunni manni ifixxe kaddeexxa gonphe afeeken. Kaddoolenna, Yihowwaaꞌa mudhdhekenna adibaare bogakenaaꞌn balleessatee jabaxxa yaane asseekemman.d

13. Yihowwa Akiꞌaabi isiꞌaa addatemebaake mootichchishsha asse murteesseeki mayeete?

¹³ Yihowwa mitte mitte mootoleeyye isiꞌaa addatendebaasha assee murteesseeki mayeete? Insaꞌne assinaammaxxi yaane duuchcha elobaaxxemman hiyyotebaan. Fuggichcha hiyyemeeki Akiꞌaabinni, Naabuuttexxe reyonaaꞌn kexxeexxa yaadati ifi heeshshi asseexxa leellisheemman. (1 Neg. 21:27-29) Ittan qachcha jabeesse ijaareemman, Israꞌeelike ardiꞌaa hiyya wodda lola fuleꞌe injifateemman. (1 Neg. 20:21, 29; 22:39) Kaddomaleꞌe, Akiꞌaabi miniinxe amaxxe tirtirsanni, dhariinxa mageneeffachcho baꞌlisati egeꞌnemeemmake manjon. Tenne balleessaanna ijenda aadde aagebaan.—1 Neg. 21:25, 26.

14. (a) Yihowwa mootichcha Roobiꞌaamii isiꞌaa addatemeebaasha asse uudeeki mayeete? (b) Addatendebaaxxe mootoleeyyexxi galcha egeꞌnendeemmaki mayikite?

¹⁴ Wele addatemeemmabaaka mootichcha Roobiꞌaami uundo. Deero langakeꞌn uundennashshanni isi galchaamma wodda, heddo eloxxa yaane asseexxa uundeennen. Kaddomaleꞌe, mootumma isixxa jabeessedheechchi uuduma, Yihowwaka seera waalati dhariinxa mageneeffachcho mageneeffata safeen. (2 Zeena 12:1) Okkoneechchi udumanna dhugaatixxenna dhariinxe mageneeffachchoxxe oddoꞌn ale aade daaqaamman. (1 Neg. 14:21-24) Dhugaatixxe mageneeffachchoꞌaa dudduro uuteemmaxxi mootoleeyye Roobiꞌaaminna Akiꞌaabi callammabaan. Heddo mootoleeyye dhariinka mageno mageneeffattaammaxxinna welinna iitta assaashsha jajabeessitaammaxxi egeꞌnendeexxen. Kabaaꞌn uundaanneshshanni mitti mootichchi, Yihowwa edo eloke yookiin elobaake hiyyemeꞌe murteessemaꞌneeki dhugaatixxa mageneeffachcho jabeessedhe abixxee qicinniiten.

15. Dhugaatixxa mageneeffachcho jabeessee abixxa, Yihowwa lummise uudaꞌneeki mayeete?

¹⁵ Yihowwa dhugaatixxa mageneeffachcho lummise uudaꞌneeki mayeete? Taakkaxxi yaane, Mageniinka arda dhugaatixxe mageneeffachchoꞌn akeekatixxi maganne uwwendeeki mootoleeyyeteetemman. Ittan dhariinxi mageneeffachcho ardi jabaxxa cubbo hujaashshanna dhugaatixxe kaddebaaxxa yaane hujaashsha assitaaxxi egeꞌnendeexxen. (Hose. 4:1, 2) Wele darrenaaꞌn kinni, mootoleeyyetinna insaꞌne galchinaammaki ardi Yihowwaaꞌa ifi mudhdhekeman. Maxaafi Qullichchi dhariinxa mageneeffachcho yabaabulleti welti fakkeessaꞌneeki tenneꞌaaten. (Ermi. 3:8, 9) Mitti yabaabulaaki manji bultetika jaalo isika miidhaan. Weli fakkatanxa mitti ifi isiꞌaa mudhdheeki manji dhariinka mageno mageneeffata wodda, toggichcha kadeekenna toggichcha kadebaake orinni isoꞌn cubbo hujaan.e—Zeda. 4:23, 24.

16. Yihowwaxxe ille edo qullichcha cubbichchakenaaꞌn gargariti hiisitaaxxi yaane maachcho?

¹⁶ Maa barantano? Dhariinxe mageneeffachchon noꞌo tuttuqemmannoshsha assitaaxxe heene yaanenaaꞌn bayyatatee hidhanteenneke kada hasissaan. Kaddoolenna dhugaatixxa mageneeffachcho duuchchinii wodda, jabeesseꞌne abixxinaannekenna ergachchoteꞌn abidemmeenneke kada hasissaan. Wabeekkichchi Milkiyaasi, Yihowwaxxe ille edo mitti eloki manji elobaake manjinaaꞌn gargariti higaaki hittate kadeexxa ifiseꞌeen. Iitta hiyye borreesseen: “Haꞌnonna qullichchiinxenna fuggaalesiinxeꞌn, ittan Magenokee ergataakenna ergatabaake manjixxe oddoꞌn hexxeexxa gargarunte higgeen uuddinaan.” (Mil. 3:18) Tenneꞌa, cubbaaleeyye kada noꞌoxxinna hunjaanneki dedhi, hiini yaanenna Magenokeꞌe ergatemmabeꞌnoshsha noꞌoo udumiꞌaa hiissitoꞌa waala hasissabaan. Matanga Yihowwaa ergatema waalandi jabaxxe cubbon.

17. Buliite melleꞌnaaneki manji Yihowwa anfeennexxe jaalalaꞌn rakko dadaaki hittate?

¹⁷ Aaxxebexxoke yookiin aadhate heddaatteke kaddoottole Milkiyaasi haasoꞌeeki yaadi eloka bultetika jaalo mellexxattoshsha gargaaraaki hittate? Mitti Yihowwaa mageneeffataꞌnebaaki manji, mitte mitte eloka adaba afeexxenna kaddoole, kunni manji Yihowwaxxe ille edo qullichchake hiyyemaa? (2 Qoro. 6:14) Kunni manji atike bultetike jaalo kadoole, Yihowwaꞌn affeettexxi adde jabaattaashsha gargaaraa? Meen uundo: Dhariinka Mageno mageneeffattaammaxxi mootichchi Solomoonixxi miniinxi amuwwa, mitte mitte eloka adaba affaxxinna hexxaan. Kaddomaleꞌe, insaꞌne Yihowwaa mageneeffata gonphaammaxxee, Solomoonixxi qalbenna laanginni dhariinxe mageneeffachchobaa wirri hitaashsha assineen.—1 Neg. 11:1, 4.

18. Hadi oose isixee barsiisa hasissaaxxi yaane maachcho?

¹⁸ Hadoo, oose haꞌnooxxi hinaaffeti Yihowwaa mageneeffattaashsha assatee, Maxaafi Qullichchi giddo afemaaka mootoleeyyetika raaga laꞌoonfata dandeetinaan. Yihowwa mitte mootichcha elokishsha yookiin elobaakishsha assee, uudaꞌneeki ikki mootichchi dhugaatixxa mageneeffachcho baꞌlisatee asseexxe yaanexxe hundaayyeshshate kaddeexxa oose haꞌnooxxi egendaashsha gargaarre. Duuchchiinxe yaane iimi darre, manfasiinxe hedho haꞌnooxxeꞌn assitinaꞌneexxa yaane edisati, tinnirinna Maxaafa Qullichcha yaansisa, gubaꞌe mara, ittan ergachcho fulati oose haꞌnooxxa haasoꞌikinnaa assitinaꞌneexxe yaanen fakkeenna kadati barisiisse. (Mat. 6:33) Iitta kada gophphoole oose haꞌnooxxi Yihowwaxxe Naqaashe kada, “hadiinxe addexxe” una kadatenaaꞌn caaldeexxa yaane assa hasissabaachcho fakkaatte leellitoꞌaa dandeettaan. Tennenaaꞌn kexxeexxa, dhugaatixxa mageneeffachcho okkone qiconna lummisse uuddabaan yookiin dhugaatenaaꞌninna fula dandeettaan.

19. Yihowwaa ergata uurriseeki huuni manjinna maa tasfa afeꞌe? (“Yihowwabaa Higa Dandeettatton!” hitaꞌneexxa kollo uud)

¹⁹ Yihowwaa ergata uurriseeki manni tasfa afeba hiyyotee? Waawwot, buutotinna aadde aage dhugaatixxe mageneeffachchobaa higa dandeꞌaan. Iitta assateꞌe ifi heeshshi assati, gubaꞌetixxi geedhe uutaꞌneeka gargaarsa adhdhaa hasissaan. (Yaꞌiqo. 5:14) Higgeeni Yihowwake jaalo kadatee assaꞌneexxa woꞌlaanchonaaꞌn caaldaaxxi hiini yaanenna hexxebaan!

20. Addatendeexxa mootoleeyye fakkaantaannole Yihowwa noꞌoo uudaꞌnee qici hittate?

²⁰ Israꞌeelixxe mootoleeyyenaaꞌn barantennexxi yaane maachcho? Woꞌma qalbenni Yihowwaa eenaannexxe kaddoole, addatendeemmaxxe mootoleeyyeshsha kada dandeennannon. Dedha hunjennekenaaꞌn baranto, aadde aango, ittan hasissaaxxa jijjiirra assinno. Itttan isi calli dhugaatike kadeeka mitte Mageno, jabaante mageneeffata maa laꞌo affeexxa qalli hino. Yihowwaa addatenshshati ergattattole, isi edo eloxxa yaane assaꞌneeke manjishsha asseꞌe atee uudan.