პირველ ადგილზეა თუ არა ღმერთი შენს ოჯახში?
„შეიყვარე უფალი, ღმერთი შენი, ყოვლითა გულითა შენით“ (მარკოზი 12:29, 30).
„რომელია უპირველესი მცნება?“ — შეეკითხა იესოს მწიგნობარი. ნაცვლად იმისა, რომ იესოს საკუთარი მოსაზრება გამოეთქვა, ღვთის სიტყვიდან, მეორე რჯულის 6:4, 5-ის ციტირებით უპასუხა. მან აღნიშნა: „პირველი არის ‘ისმინე ისრაელო: უფალი, ღმერთი ჩვენი, უფალი ერთია. შეიყვარე უფალი, ღმერთი შენი, ყოვლითა გულითა შენით, და ყოვლითა სულითა შენითა და ყოვლითა გონებითა შენითა და ყოვლითა ძალითა შენითა’“ (მარკოზი 12:28–30).
2 უმნიშვნელოვანეს მცნებას რომ დავემორჩილოთ, რომელსაც იესომ პირველი უწოდა, გვესაჭიროება, ყოველთვის ვაკეთოთ ის, რაც იეჰოვას ესიამოვნება. იესო თვითონაც ასე აკეთებდა, მიუხედავად იმისა, რომ ერთხელ მოციქული პეტრე შეეწინააღმდეგა იესოს მოქმედებას და სხვა დროს მისმა ახლო ნათესავებმაც გაიმეორეს იგივე (მათე 16:21–23; მარკოზი 3:21; იოანე 8:29). რას გააკეთებ, თუ შენც მსგავს სიტუაციაში აღმოჩნდები? ვთქვათ, ოჯახის წევრებს სურთ, შეწყვიტო ბიბლიის შესწავლა და იეჰოვას მოწმეებთან ურთიერთობა. დააყენებ თუ არა ღმერთს პირველ ადგილზე, რასაც დაამტკიცებ იმით, რომ მის მოსაწონად მოიქცევი? პირველ ადგილზე აყენებ თუ არა ღმერთს, როცა ოჯახის წევრები ეწინააღმდეგებიან შენს ძალისხმევას, ემსახურო მას?
მახე — ოჯახური წინააღმდეგობა
3 იესოს არ გაუიოლებია გაჭირვების ის სურათი, რომელიც შესაძლოა წარმოიშვას მაშინ, როცა ოჯახის წევრები ეწინააღმდეგებიან მას, რომელიც იღებს მის მოძღვრებას. „კაცის მტრები მისი შინაურები იქნებიან“, — თქვა იესომ. მაგრამ ასეთი სამწუხარო შედეგების მიუხედავად, იესომ გვაჩვენა, ვინ უნდა იყოს პირველ ადგილზე მათთვის, როცა თქვა: „ვისაც მამა ან დედა ჩემზე მეტად უყვარს, იგი არ არის ჩემი ღირსი, და ვისაც ძე ან ასული ჩემზე მეტად უყვარს, იგი არ არის ჩემი ღირსი“ (მათე 10:34–37). იეჰოვა ღმერთს ჩვენს ცხოვრებაში პირველ ადგილზე ვაყენებთ მისი ძის, იესო ქრისტეს, მოძღვრების მიყოლით, ვინც არის „მისი არსების ანარეკლი“ (ებრაელთა 1:3; იოანე 14:9).
4 სხვა შემთხვევაში, როცა იესო მსჯელობდა, თუ სინამდვილეში რას ნიშნავდა მისი მიმდევრობა, თქვა: „თუ ვინმე მოვა ჩემთან და არ მოიძულებს თავის მამას და დედას, ცოლსა და შვილებს, ძმებსა და დებს, საკუთარ სულსაც კი, იგი ვერ გახდება ჩემი მოწაფე“ (ლუკა 14:26). ცხადია, იესო არ გულისხმობდა, რომ თავის მიმდევრებს პირდაპირი გაგებით უნდა სძულებოდათ ოჯახის წევრები, ვინაიდან ადამიანებს მოუწოდა, თავიანთი მტრებიც კი ჰყვარებოდათ (მათე 5:44). პირიქით, იესომ მოიხსენია, რომ მის მიმდევრებს უნდა უყვარდეთ ოჯახის წევრები, მაგრამ ეს სიყვარული ღვთისადმი სიყვარულს არ უნდა აღემატებოდეს (შეადარე მათე 6:24). ამ თვალსაზრისით ბიბლია ამბობს, რომ იაკობს „მოძულებული“ ჰყავდა ლეა და უყვარდა რახელი, რაც იმაზე მეტყველებდა, რომ მას ისე ძალიან არ უყვარდა ლეა, როგორც მისი და, რახელი (დაბადება 29:30–32). თვით ჩვენი საკუთარი „სული“, ანუ სიცოცხლე, რომელიც იესომ მოიხსენია, უნდა გვძულდეს, ანუ იეჰოვაზე მეტად არ უნდა გვიყვარდეს!
5 როგორც შემოქმედი და სიცოცხლის მომცემი, იეჰოვა სრულ ერთგულებას იმსახურებს ყველა თავისი მსახურისაგან (გამოცხადება 4:11). მოციქული პავლე წერდა: „ამისათვის ვიდრეკ მუხლს ჩვენი უფლის, იესო ქრისტეს მამის წინაშე, ვის მიერაც იწოდება ყოველი მამობა ცაში და ქვეყანაზე“ (ეფესელთა 3:14, 15). იეჰოვამ ისე შესანიშნავად შექმნა ოჯახი, რომ ოჯახის წევრებს შორის ბუნებრივი სიყვარული არსებობს (მესამე მეფეთა 3:25, 26; 1 თესალონიკელთა 2:7). სატანა ეშმაკი ცბიერად იყენებს ამ ბუნებრივ ოჯახურ სიყვარულს, რომელიც შეიცავს სურვილს, ასიამოვნო საყვარელ პიროვნებებს. ის ოჯახური წინააღმდეგობის ალს აღვივებს და მრავალი პიროვნებისთვის გამოწვევაა, წინააღმდეგობის დროს მტკიცედ დარჩეს ბიბლიურ ჭეშმარიტებაში (გამოცხადება 12:9, 12).
წარმატებით დაძლიე ცდუნება
6 რას გააკეთებ, თუ გაიძულებენ, ორიდან ერთი აირჩიო: ასიამოვნო ან ღმერთს, ან ოჯახის წევრებს? თავს იმით ხომ არ იმართლებ, რომ ღმერთი არ მოითხოვს ჩვენგან მისი სიტყვის შესწავლითა და პრინციპების გამოყენებით უთანხმოებები შევქმნათ ოჯახში? მაგრამ დაფიქრდი. თუ დანებდები და შეწყვეტ ბიბლიის შესწავლას ან იეჰოვას მოწმეებთან ურთიერთობას, როგორ გაიგებენ შენთვის საყვარელი ადამიანები, რომ ბიბლიის ზუსტი შემეცნების მიღება სიკვდილ-სიცოცხლის საკითხია? (იოანე 17:3; 2 თესალონიკელთა 1:6–8).
7 სიტუაცია შეგვეძლო ასე წარმოგვედგინა: შესაძლოა ოჯახის წევრს ალკოჰოლისადმი მეტისმეტი მიდრეკილება აქვს. ნამდვილად სასარგებლო იქნება მისთვის, თუ ვაპატიებთ მას ან ყურადღებას არ მივაქცევთ მის პრობლემას? ნუთუ უკეთესი იქნება მშვიდობა იმით შეინარჩუნო, რომ დანებდე და არაფერი გააკეთო ამ პრობლემის გადასაჭრელად? არა, ალბათ, დაეთანხმები იმ აზრს, რომ უკეთესი იქნება, დაეხმარო მას, რათა გადალახოს სმის პრობლემა, მიუხედავად იმისა, თუ ეს მოითხოვს მისი მრისხანებისა და მუქარის წინაშე გაბედულ დგომას (იგავნი 29:25). ასევე, თუ ჭეშმარიტად გიყვარს ოჯახის წევრები, არ დანებდები მათ ძალისხმევას, შეგაწყვეტინონ ბიბლიის შესწავლა (საქმეები 5:29). თუ დაიკავებ მტკიცე პოზიციას, მხოლოდ მაშინ შეძლებ დაეხმარო იმის შეგნებაში, რომ ქრისტეს მოძღვრების თანახმად ცხოვრება ნიშნავს მთელ ჩვენს სიცოცხლეს.
8 ღვთის დაყენება პირველ ადგილზე ზოგჯერ შეიძლება, ძალიან რთული იყოს. მაგრამ დაიმახსოვრე, სატანამ იესოსაც გაურთულა ღვთის ნების შესრულება. მიუხედავად ამისა, იესო არასოდეს დანებებულა; მან ჩვენს გამო ძლიერი ტკივილიც კი მოითმინა. ‘ჩვენი მაცხოვარი არის იესო ქრისტე’, „რომელიც ჩვენთვის მოკვდა“, — ამბობს ბიბლია (ტიტე 3:6; 1 თესალონიკელთა 5:10). ნუთუ მადლიერი არა ვართ, რომ იესო არ დანებდა წინააღმდეგობას? რადგან მსხვერპლად შეეწირა, იმედი გვაქვს, რომ მარადიულად ვიცხოვრებთ მშვიდობიან, სამართლიან ახალ ქვეყნიერებაში, თუ რწმენას გამოვავლენთ მისი დაღვრილი სისხლისადმი (იოანე 3:16, 36; გამოცხადება 21:3, 4).
მოსალოდნელი უხვი დაჯილდოება
9 მიხვდი თუ არა, რომ შენც შეგიძლია მონაწილეობა როგორც სხვების, ასევე საყვარელი ნათესავების გადარჩენაში? მოციქულმა პავლემ მოუწოდა ტიმოთეს: „გაუფრთხილდი თავს და სწავლებას. ამას უერთგულე, რადგან ასეთი მოქმედებით შენს თავსაც იხსნი და შენს მსმენელთაც“ (1 ტიმოთე 4:16). ტიმოთე ცხოვრობდა დაყოფილ ოჯახში, მამამისი ბერძენი იყო, ურწმუნო (საქმეები 16:1; 2 ტიმოთე 1:5; 3:14). თუმცა არ ვიცით, გახდა თუ არა ტიმოთეს მამა მორწმუნე, მაგრამ მას ჰქონდა ამის შესაძლებლობა, რომელსაც უფრო ზრდიდა ტიმოთესა და ცოლის, ევნიკეს ერთგული ქცევა.
10 წერილები გვიჩვენებს, რომ ქმრებსა და ცოლებს, რომლებიც მტკიცედ მიჰყვებიან ბიბლიის ჭეშმარიტებას, შეუძლიათ, დაეხმარონ მეუღლეებს, გახდნენ მორწმუნეები და ამით ხელი შეუწყონ თავიანთი ურწმუნო მეუღლეების გადარჩენას. მოციქული პავლე წერდა: „თუ ვინმე ძმას ჰყავს ურწმუნო ცოლი და ის ქალი თანახმაა მასთან იცხოვროს, ნუ დატოვებს იმ ცოლს. დედაკაცი, რომელსაც ურწმუნო ქმარი ჰყავს და მას სურს მასთან ცხოვრება, ნუ დატოვებს ქმარს. ვინაიდან, რა იცი შენ, ცოლო, იქნებ იხსნა ქმარი? ანდა რა იცი შენ, ქმარო, იქნებ იხსნა ცოლი?“ (1 კორინთელთა 7:12, 13, 16). პეტრე მოციქულმა აღწერა, როგორ შეუძლიათ ცოლებს, გადაარჩინონ თავიანთი ქმრები, როდესაც მოუწოდა: „დაემორჩილონ თავიანთ ქმრებს, რათა ისინი, ვინც არ ერწმუნებიან სიტყვას, სიტყვის გარეშე იყვნენ მოგებულნი თავიანთი ცოლების საქციელით“ (1 პეტრე 3:1).
11 ბოლო წლებში ისეთი ათასობით პიროვნება გახდა იეჰოვას მოწმე, რომლებიც თვეებისა და წლების განმავლობაში თავიანთ მოწმე ნათესავებს ქრისტიანულ საქმიანობაში უწევდნენ წინააღმდეგობას. რა დიდი ჯილდოა ეს იმ ქრისტიანებისთვის, რომლებიც მტკიცენი დარჩნენ და რაოდენ დიდი კურთხევაა ერთ დროს მოწინააღმდეგე პიროვნებებისთვის! ერთ-ერთმა 74 წლის ქრისტიანმა უხუცესმა გრძნობით აღსავსე ხმით აღნიშნა: „ყოველთვის ვმადლობ მეუღლესა და შვილებს იმისთვის, რომ წლების განმავლობაში ჩემი წინააღმდეგობის მიუხედავად, მტკიცედ ჩაეჭიდნენ ჭეშმარიტებას“. მან თქვა, რომ სამი წლის განმავლობაში გამუდმებით უკრძალავდა ცოლს თავისთან ბიბლიაზე საუბარსაც კი. „მაგრამ ის ირჩევდა დროს, როცა განწყობილი ვიყავი ამისთვის, — თქვა მან, — და იწყებდა დამოწმებას, როცა ფეხებს მიზელდა. როგორი მადლიერი ვარ, რომ არ დანებდა ჩემს წინააღმდეგობას!“
12 სხვა მამაკაცმა, რომელიც ეწინააღმდეგებოდა თავის ოჯახს, დაწერა: „ჩემი ცოლისთვის ყველაზე საშინელი მტერი მე ვიყავი, რადგან იმის შემდეგ, რაც ჭეშმარიტება მიიღო, ვემუქრებოდი მას და ყოველდღე ვკამათობდით; უნდა ითქვას, რომ კამათს ყოველთვის მე ვიწყებდი. მაგრამ ყველაფერი ამაო იყო; ჩემი მეუღლე არ მოეშვა ბიბლიას. ასე გავიდა თორმეტი წელი, რაც გააფთრებით ვებრძოდი როგორც ჭეშმარიტებას, ასევე მეუღლესა და შვილს. ორივესთვის ხორცშესხმული სატანა ვიყავი“. ბოლოს და ბოლოს, მან დაიწყო თავისი ცხოვრების გაანალიზება. „მივხვდი, რამდენად გაღიზიანებული ვიყავი, — იხსენებს ის. — მე წავიკითხე ბიბლია და მისი რჩევების წყალობით ახლა მონათლული მოწმე ვარ“. წარმოიდგინე, რამდენად დაჯილდოვდა ცოლი, დიახ, 12 წლის განმავლობაში მტკიცედ გადალახა წინააღმდეგობა, რაც დაეხმარა იმაში, რომ „იხსნა ქმარი“!
ვისწავლოთ იესოსგან
13 ძირითადი გაკვეთილი, რომელიც ქმრებმა და ცოლებმა უნდა ისწავლონ იესოს ცხოვრებიდან, არის ღვთისადმი მისი მორჩილება. „მუდამ იმას ვაკეთებ, რაც მისთვის არის სათნო“, — თქვა იესომ. „მე ჩემს ნებას არ ვეძებ, არამედ ჩემი მომავლინებლის ნებას“ (იოანე 5:30; 8:29). იესომ მაშინაც კი შეინარჩუნა მორჩილება, როცა ერთხელ ღვთის ნებასთან დაკავშირებულ განსაზღვრულ საკითხში უსიამოვნება ჰპოვა. „თუ გსურს, ამაცდინე ეს სასმისი, — ილოცა მან. მაგრამ უმალ დაუმატა, — მაგრამ ჩემი ნება კი არა, შენი იყოს“ (ლუკა 22:42). იესოს არ უთხოვია ღვთისთვის, შეეცვალა თავისი ნება; მან ღვთისადმი ჭეშმარიტი სიყვარული აჩვენა იმით, რომ მორჩილად ექვემდებარებოდა ღვთის ნებას, როგორიც არ უნდა ყოფილიყო ეს მისთვის (1 იოანე 5:3). ღვთის ნების ყოველთვის პირველ ადგილზე დაყენება, როგორც იესო აკეთებდა, ძირითადად მნიშვნელოვანია, რათა მხოლოდ მარტოხელა ცხოვრებაში კი არ გვქონდეს წარმატება, არამედ ასევე ქორწინებასა და ოჯახურ ცხოვრებაში. განვიხილოთ რატომ არის ეს ასე.
14 როგორც ზემოთ იყო მოხსენიებული, როცა მორწმუნეები ღმერთს აყენებენ პირველ ადგილზე, ცდილობენ, დარჩნენ თავიანთ ურწმუნო მეუღლეებთან და ხშირად შეუძლიათ, დაეხმარონ მათ, რომ გახდნენ გადარჩენისთვის შესაფერისი. მაშინაც კი, როცა ორივე მორწმუნეა, მათი ქორწინება შეიძლება შორს იყოს იდეალურისაგან. ცოდვილი მიდრეკილებების გამო ქმრებსა და ცოლებს ყოველთვის არა აქვთ სიყვარულით აღსავსე ფიქრები ერთიმეორის მიმართ (რომაელთა 7:19, 20; 1 კორინთელთა 7:28). ზოგიერთი იქამდეც კი მიდის, რომ გეგმავს სხვასთან დაქორწინებას, თუმცა ბიბლიის მიხედვით არა აქვთ გაყრისთვის საფუძველი (მათე 19:9; ებრაელთა 13:4). მათ მიაჩნიათ, რომ მათთვის ყველაზე საუკეთესოა შემდეგი აზრი: ღვთის ნება ქმრებისა და ცოლების ერთად დარჩენისთვის საკმაოდ რთულია (მალაქია 2:16; მათე 19:5, 6). ეს, უეჭველია, საერთოდ განსხვავებული აზროვნების მქონე ადამიანის ფიქრებია და არა ღვთიური აზროვნების მქონესი.
15 რაოდენ დამცველია ღვთის დაყენება პირველ ადგილზე! დაქორწინებული წყვილები, რომლებიც ასე მოქმედებენ, ცდილობენ, ერთად დარჩნენ და ღვთის სიტყვის რჩევის გამოყენებით გადაჭრან თავიანთი პრობლემები. ამიტომ ისინი თავს აღწევენ ნებისმიერი სახის სულიერ ტკივილს, რომელიც ღვთის ნების უარყოფის შედეგია (ფსალმუნი 18:8–12). ეს ნათლად არის ნაჩვენები ახალგაზრდა წყვილის მიერ, რომლებმაც, გაყრის პირას მყოფებმა, გადაწყვიტეს, მიჰყოლოდნენ ბიბლიის რჩევას. რამდენიმე წლის შემდეგ, როცა ცოლმა გაიხსენა ის სიხარული, რომელიც ქორწინებაში ჰქონდა, თქვა: „ტირილის მეტი აღარაფერი მრჩება, როცა ვაანალიზებ ალბათობას, რომ შესაძლოა მთელი ამ წლების განმავლობაში განცალკევებულად მეცხოვრა ჩემი ქმრისგან. შემდეგ მე ვილოცე იეჰოვა ღმერთის წინაშე და მადლობა გადავუხადე რჩევისა და ხელმძღვანელობისთვის, რომელმაც ასეთ ბედნიერ ურთიერთობამდე მიგვიყვანა“.
ქმრებო, ცოლებო — მიბაძეთ ქრისტეს!
16 იესომ, რომელიც ყოველთვის პირველ ადგილზე აყენებდა ღმერთს, დიდებული მაგალითი დატოვა ქმრებისა და ცოლებისთვის და ისინი, თავის მხრივ, კარგს აკეთებენ, თუ საგულდაგულო ყურადღებას აქცევენ ამას. ქმრები მოწოდებული არიან, მიჰბაძონ გზას, რომლითაც იესო სიყვარულით აღსავსე მეთაურობას ავლენს ქრისტიანული კრების წევრებზე (ეფესელთა 5:23). და ქრისტიან ცოლებსაც შეუძლიათ ისწავლონ იესოს ღვთისადმი უმწიკვლო მორჩილების მაგალითიდან (1 კორინთელთა 11:3).
17 ბიბლია მოგვიწოდებს: „მამაკაცებო, გიყვარდეთ თქვენი ცოლები, ისევე როგორც ქრისტემ შეიყვარა ეკლესია და თავი გასწირა მისთვის“ (ეფესელთა 5:25). იესოს მიერ თავისი მიმდევრებისგან შემდგარი კრებისადმი სიყვარულის გამოვლენის მნიშვნელოვანი საშუალება იყო, მათთან ახლო მეგობრობა. „მეგობრები გიწოდეთ, — თქვა იესომ, — რადგან ყველაფერი გამცნეთ, რაც მამაჩემისგან მსმენია“ (იოანე 15:15). იფიქრე მთელი იმ დროის შესახებ, იესომ რომ გაატარა თავის მოწაფეებთან საუბარში — ძალიან, ძალიან ბევრი საუბრები — და იმის შესახებ, თუ რამდენი რწმენა ჩაუნერგა მათ! ნუთუ შესანიშნავი მაგალითი არ არის ეს ქმრებისთვის?
18 იესომ ნამდვილი ინტერესი გამოავლინა თავისი მოციქულებისადმი და ჭეშმარიტი სიყვარული ჰქონდა მათდამი (იოანე 13:1). როცა მისი სწავლებები ნათელი არ იყო მათთვის, მოთმინებით გამოუყოფდა ხოლმე პირადად დროს, რომ საკითხები ნათელი გაეხადა (მათე 13:36–43). ქმრებო, არის თუ არა თქვენთვისაც ასევე მნიშვნელოვანი თქვენი ცოლების სულიერი კეთილდღეობა? უთმობთ თუ არა დროს მათ და რწმუნდებით თუ არა, რომ ბიბლიური ჭეშმარიტება ნათლად არის აღბეჭდილი ორივეს გულსა და გონებაში? იესო თავის მოციქულებთან ერთად დადიოდა მსახურებაში და შესაძლოა პირადად ასწავლიდა თითოეულს. მიდიხარ თუ არა შენს მეუღლესთან ერთად მსახურებაში, რომელშიც შედის კარდაკარ მონახულებები და ბიბლიური შესწავლების ჩატარება?
19 განსაკუთრებით, იესომ არასრულყოფილ მოციქულებთან ურთიერთობით შემოგვთავაზა სრულყოფილი მაგალითი ქმრებისთვის. მოციქულებთან უკანასკნელი სერობისას მან შესძლო კვლავ გამოეაშკარავებინა მათში მეტოქეობის სული. მკაცრად გააკრიტიკა ისინი? პირიქით, მან თავმდაბლურად დაბანა ფეხები ყოველ მათგანს (მარკოზი 9:33–37; 10:35–45; იოანე 13:2–17). ავლენ თუ არა მსგავს მოთმინებას მეუღლესთან? ნაცვლად იმისა, რომ უკმაყოფილება გამოთქვა კვლავ გამეორებული სისუსტის გამო, მოთმინებით ცდილობ თუ არა მის დახმარებას და შენი მაგალითით მისი გულის მოპოვებას? მოსალოდნელია, რომ ცოლები გამოეხმაურებიან სიყვარულით აღსავსე ისეთ თანაგრძნობას, როგორც ზუსტად მოციქულებმა გააკეთეს.
20 ცოლებსაც უნდა ახსოვდეთ იესო, რომელიც არასოდეს ივიწყებდა, რომ მისი ‘თავი ღმერთია’. ის ყოველთვის ემორჩილებოდა ზეციერ მამას. მსგავსად, ცოლებმაც არ უნდა დაივიწყონ, რომ „ქმარი არის ცოლის თავი“, დიახ, რომ ქმარია მათი თავი (1 კორინთელთა 11:3; ეფესელთა 5:23). პეტრე მოციქული მოუწოდებდა ქრისტიან ცოლებს, გაეთვალისწინებინათ ადრინდელი დროის ‘წმიდა ცოლების’ მაგალითი, განსაკუთრებით კი, სარას მაგალითი, რომელიც „დაემორჩილა და ბატონი უწოდა აბრაამს“ (1 პეტრე 3:5, 6).
21 სარამ აშკარად კეთილმოწყობილი სახლი მიატოვა მდიდარ ქალაქში, რომ ეცხოვრა კარვებში, უცხო მიწაზე. რატომ? იმიტომ რომ, მან ამჯობინა ასეთი ცხოვრების სტილი? სავარაუდოა, რომ არა. რადგანაც ქმარმა სთხოვა მას გაჰყოლოდა? უეჭველია, ეს იყო მიზეზი, რადგან სარას უყვარდა აბრაამი და აფასებდა მას მისი ღვთიური თვისებების გამო (დაბადება 18:12). მაგრამ ძირითადი მიზეზი, რომ ის ქმართან ერთად წავიდა, იყო იეჰოვასადმი სიყვარული და გულწრფელი სურვილი, მიჰყოლოდა ღვთის მითითებებს (დაბადება 12:1). მან სიამოვნება ჰპოვა ღვთისადმი მორჩილებაში. ამის საპირისპიროდ, ლოტის ცოლი შეყოყმანდა ღვთის ნების შესრულებისას და ამიტომ მიიხედა უკან, ძლიერი სურვილით იმ საგნებისკენ, რომლებიც დატოვა თავის მშობლიურ ქალაქ სოდომში (დაბადება 19:15, 25, 26; ლუკა 17:32). როგორ ტრაგიკულად დამთავრდა მათი ქორწინება და ყოველივე ეს ღვთისადმი დაუმორჩილებლობის გამო!
22 ამიტომ, როგორც ქმარმა, ასევე ცოლმა, მნიშვნელოვანია, რომ კითხვა დაუსვა საკუთარ თავს: „პირველ ადგილზე დგას თუ არა ღმერთი ჩვენს ოჯახში? ჭეშმარიტად მთელი ძალით ვცდილობ თუ არა, შევასრულო ოჯახური მოვალეობა, რასაც ღმერთი ითხოვს ჩემგან? ნამდვილ ძალისხმევას ვახმარ თუ არა, რომ მიყვარდეს მეუღლე და დავეხმარო, რათა დაამყაროს ან განავითაროს კარგი ურთიერთობა იეჰოვასთან?“ მრავალ ოჯახში შვილებიც არიან. შემდეგ სტატიაში განვიხილავთ მშობლების როლს და მოთხოვნას როგორც მათთვის, ასევე მათი შვილებისთვის, რომ ღმერთი პირველ ადგილზე დააყენონ.
გახსოვს თუ არა?
◻ რა შეიძლება იყოს იესოს მოძღვრების შედეგები მრავალი ოჯახისთვის?
◻ რა ჯილდო მიიღო ათასობით ქრისტიანმა სიმტკიცის გამო?
◻ რა დაეხმარება წყვილს, გაექცეს უზნეობასა და გაყრას?
◻ რისი შესწავლა შეუძლიათ ქმრებს იესოს მაგალითიდან?
◻ როგორ შეუძლიათ ცოლებს, ხელი შეუწყონ ბედნიერ ქორწინებას?
[სასწავლო კითხვები]
1. რამდენად მნიშვნელოვანია, გვიყვარდეს იეჰოვა?
2. ა) რომელი წინააღმდეგობის წინაშე აღმოჩნდა იესო? ბ) რა ხდის დროდადრო რთულს, ვასიამოვნოთ იეჰოვას?
3. ა) როგორი შედეგი შეიძლება ჰქონდეს იესოს მოძღვრებას ოჯახში? ბ) როგორ შეუძლიათ ოჯახის წევრებს აჩვენონ, ვისადმი უფრო დიდი სიყვარული აქვთ?
4. ა) რა თქვა იესომ, რას ნიშნავდა მისი მიმდევრობა? ბ) რა თვალსაზრისით უნდა სძულდეთ ქრისტიანებს ოჯახის წევრები?
5. როგორი ცბიერებით იყენებს სატანა ოჯახს?
6, 7. ა) როგორ შეიძლება ოჯახის წევრებისთვის დახმარების გაწევა, რომ მიხვდნენ ბიბლიის შესწავლისა და ქრისტიანული ურთიერთობის დიდ მნიშვნელობას? ბ) როგორ შეგვიძლია ვაჩვენოთ, რომ ჭეშმარიტად გვიყვარს ოჯახის წევრები?
8. როგორ ვსარგებლობთ იმ ფაქტით, რომ იესო ერთგულად ასრულებდა ღვთის ნებას?
9. ა) როგორ შეუძლიათ ქრისტიანებს მონაწილეობა სხვების გადარჩენაში? ბ) როგორი იყო ტიმოთეს ოჯახის სიტუაცია?
10. რისი გაკეთება შეუძლიათ ქრისტიანებს თავიანთი ურწმუნო მეუღლეების გადასარჩენად?
11, 12. ა) რა ჯილდო მიიღო ათასობით ქრისტიანმა და რა გააკეთეს ამისთვის? ბ) მოჰყევი ოჯახის წევრის შემთხვევა, რომელიც დაჯილდოვდა ერთგული მოთმინებით?
13. ა) რა არის იესოს ცხოვრებიდან ძირითადი გაკვეთილი, რომელიც ქმრებმა და ცოლებმა უნდა ისწავლონ? ბ) როგორ შეუძლიათ იესოს მაგალითიდან ისარგებლონ იმ ადამიანებმა, რომლებისთვისაც ძნელია, ღვთის ნებისადმი მორჩილება?
14. როგორ არასწორ მსჯელობას ავითარებს ზოგიერთი ქრისტიანი?
15. რატომ არის დამცველი ღვთის პირველ ადგილზე დაყენება?
16. რა მაგალითი მისცა იესომ ქმრებსა და ცოლებს?
17, 18. რომელ საკითხებში დაგვიტოვა იესომ მშვენიერი მაგალითი ქმრებისთვის?
19. როგორი მაგალითი დაუტოვა იესომ ქმრებს იმით, რაც გაუკეთა თავის მოციქულებს მათ მიერ ხელახლა გამოვლენილი სისუსტეებისას?
20. რა არ უნდა დაივიწყონ არასოდეს ქრისტიანმა ცოლებმა და ვინ სთავაზობს მაგალითს?
21. რატომ იყო აბრაამისა და სარას ქორწინება წარმატებული, ხოლო ლოტისა და თავისი ცოლის ქორწინება — წარუმატებელი?
22. ა) როგორი თვითშემოწმება უნდა ჩაატარონ ბრძნულად ოჯახის წევრებმა? ბ) რა იქნება განხილული შემდეგში?