განმეორებითი მონახულებები — ბიბლიის შესწავლების დაწყების შესაძლებლობა
1. რატომ არის განმეორებითი მონახულებები მნიშვნელოვანი?
1 იესომ თავის მოწაფეებს არა მარტო ქადაგება დაავალა, არამედ ხალხის ‘მოწაფეებად მომზადება. . . და სწავლება’ (მათ. 28:19, 20, აქ). მასწავლებლობა უფრო მეტს ნიშნავს, ვიდრე მხოლოდ ქადაგებას. მასწავლებელი ასწავლის, ხსნის და მოჰყავს არგუმენტები. ამის გასაკეთებლად ერთ-ერთი საშუალებაა დაინტერესებული ადამიანების განმეორებით მონახულება იმ მიზნით, რომ მათთან ბიბლიის შესწავლა დავიწყოთ.
2. ვინ უნდა მოინახულო განმეორებით?
2 ვინ უნდა მოინახულო განმეორებით? აუცილებლად მიაკითხე მათ, ვისაც დაუტოვე ლიტერატურა ან მათ, ვინც მცირე ინტერესი მაინც გამოავლინა სასიხარულო ცნობისადმი. როდესაც საზოგადოებრივ ადგილებში ქადაგებისას შენი მოსაუბრე ინტერესდება, შეეცადე გაიგო მისი მისამართი ან ტელეფონის ნომერი, რათა ინტერესი გაუღვივო. ოპტიმისტურად იყავი განწყობილი ბიბლიის შესწავლების დაწყებასთან დაკავშირებით. გააგრძელე მათი ძებნა, ვისაც ბიბლიის შესწავლა სურს. სავსებით შესაძლებელია, რომ იპოვი კიდეც ასეთ ადამიანებს (მათ. 10:11).
3, 4. როგორ შეგვიძლია ეფექტური განმეორებითი მონახულებების გაკეთება?
3 გამოავლინე ინტერესი. განმეორებითი მონახულებისთვის მომზადება პირველი შეხვედრისას იწყება. გამოცდილი მაუწყებლები იწერენ, რა აინტერესებს მობინადრეს და ამას მომავალი მსჯელობის საფუძვლად იყენებენ. ბევრმა შენიშნა, რომ პირველი მონახულების დასასრულისას ეფექტურია მობინადრისთვის დამაფიქრებელი კითხვის დასმა, რაც მას შემდეგი მონახულებისადმი ინტერესს გაუღვივებს. თუ გულწრფელად ვართ დაინტერესებული ამ პიროვნებით, ჩვენ კვლავაც ვიფიქრებთ მასზე და რაც შეიძლება მალევე მივაკითხავთ. თუ შესაძლებელია, ეცადე მობინადრე მოინახულო მანამ, სანამ ინტერესი არ განელებია — შეიძლება ერთ-ორ დღეშიც კი.
4 განმეორებით მონახულებისას შეეცადე, წინა შეხვედრის დროს წამოჭრილი საკითხი განიხილო. მიზნად დაისახე, რომ ყოველი მონახულების დროს მობინადრეს, სულ მცირე, ერთი გამამხნევებელი ბიბლიური აზრი გაუზიარო. უკეთ გაიცანი მობინადრე. შემდგომი მონახულებების დროს ის აზრები განიხილე ღვთის სიტყვიდან, რომლებიც მისთვის ყველაზე აქტუალურია.
5. რა მარტივი მეთოდის გამოყენება შეგიძლია ბიბლიის შესწავლის დასაწყებად?
5 ყოველთვის ეცადე ბიბლიის შესწავლის დაწყებას. პიროვნება განმეორებით იმ მიზნით მოინახულე, რომ ბიბლიის შესწავლა დაიწყო. როგორ შეიძლება ამ მიზნის მიღწევა? უთხარი, რომ მისთვის საინტერესო საკითხის გაზიარება გსურს და გადაშალე წიგნი „შემეცნება“ ან ბროშურა „რას მოითხოვს“ იმ აბზაცზე, რომელიც, შენი აზრით, მის გულს შეეხება. წაიკითხე აბზაცი, იმსჯელე კითხვის ირგვლივ და განიხილე ერთი ან ორი მითითებული მუხლი. ამის გაკეთება შეგიძლია პირდაპირ კართან 5 ან 10 წუთის განმავლობაში. განხილვის დასასრულს დაუსვი სხვა კითხვა და შეუთანხმდი, როდის გააგრძელებთ მსჯელობას.
6. როგორ შეგვიძლია ვაჩვენოთ, რომ გვესმის განმეორებითი მონახულებების მნიშვნელობა?
6 დაინტერესებულ ადამიანებში ინტერესის გაღვივება ჩვენი მსახურების მნიშვნელოვანი ნაწილია. ამიტომ, შენს ყოველკვირეულ გეგმაში გამოყავი დრო განმეორებითი მონახულებების გასაკეთებლად. ეს შენს მსახურებას უფრო წარმატებულსა და სასიხარულოს გახდის.