Ĩvuku ya Mbee ya Mavinda

14 Mũsumbĩ Ilamu wa Tile nĩwatũmĩie Ndaviti atũmwa, o vamwe na mbwaũ sya mũtalakwe,* mavundi ma mavia,* na mavundi ma mbwaũ nĩ kana makamwakĩe nyũmba.* 2 Na Ndaviti nĩwamanyie kana Yeova nĩwamũlũlũmĩĩlye vyũ ethĩwe mũsumbĩ wa Isilaeli, nũndũ ũsumbĩ wake nĩwanenevetwʼe mũno kwondũ wa andũ ma Ngai, Aisilaeli.

3 Ndaviti nĩwoosie iveti ingĩ e Yelusalemu, na Ndaviti eethĩwa na ana na eĩtu angĩ. 4 Aa nĩmo masyĩtwa ma syana ila wasyaĩwe e Yelusalemu: Samua, Sovavu, Nathani, Solomoni, 5 Iviali, Elisua, Eliveleti, 6 Noka, Neveki, Yavia, 7 Elisama, Mbeeliata, na Elivieleti.

8 Yĩla Avilisiti meewie kana Ndaviti nĩwĩtĩkĩwʼe mauta ethĩwe mũsumbĩ wa Isilaeli yonthe, Avilisiti onthe nĩmambatie makamanthe Ndaviti. Nake Ndaviti eewʼa ũu, athi kũmavithũkĩa. 9 Na ĩndĩ Avilisiti mooka na mambĩĩa kũvithũkĩa ala maĩ Mwandanĩ* wa Alevai. 10 Ndaviti akũlilye Ngai ũtao, ayasya: “Nĩnaĩlĩte kwambata ngavithũkĩe Avilisiti? Nũũmanengane kw’okonĩ kwakwa?” Nĩvo ĩndĩ Yeova wamwĩie atĩĩ: “Ambata, nũndũ vate nzika, nĩngũmanengane kw’okonĩ kwaku.” 11 Kwoou Ndaviti nĩwambatie Mbaali-velasimu, na amoaĩa kũu. Nĩvo ĩndĩ Ndaviti waisye atĩĩ: “Ngai ũla wa w’o nĩwatũĩte amaitha makwa na akamasinda na kw’oko kwakwa, o ta mwatũka watũĩtwe nĩ kĩw’ũ.” Nĩkyo kĩtumi meetie vandũ vau Mbaali-velasimu.* 12 Avilisiti nĩmatiie ngai syoo vau, na yĩla Ndaviti waumisye mwĩao, nĩsyavĩviwʼe na mwaki.

13 Ĩtina, Avilisiti nĩmavithũkĩie mwanda ũsu* ĩngĩ. 14 Ndaviti nĩwakũlilye Ngai ũtao ĩngĩ, ĩndĩ Ngai ũla wa w’o amwĩa atĩĩ: “Ndũkambate ĩmwe kwa ĩmwe ũmaatĩĩe. Vandũ va ũu, thiũũka ũthi ĩtina woo, na ũimavithũkĩa ngalĩko ya mbee ya ikuthu sya mbaka. 15 Na ĩndĩ weewʼa matuu ma andũ mesĩlĩte ĩũlũ wa ikuthu sya mbaka, wĩambĩĩa kũmavithũkĩa, nĩkwĩthĩwa Ngai ũla wa w’o akeethĩwa anathi mbee waku oae ita isu sya Avilisiti.” 16 Kwoou Ndaviti eeka o tondũ Ngai ũla wa w’o wamwĩaĩe, na mooaa ita isu sya Avilisiti kuma Ngiveoni nginya Ngeseli. 17 Na nguma ya Ndaviti yanyaĩĩka nthĩ syonthe, na Yeova atuma mbaĩ syonthe imũkĩa.