Ĩvuku ya Mbee ya Mavinda
21 Na ĩndĩ Satani* avĩnga Aisilaeli na eekĩa Ndaviti vinya atale Aisilaeli. 2 Kwoou Ndaviti eea Yoavu na anene ma andũ atĩĩ: “Endai, mũkatale Aisilaeli kuma Mbeeli-sieva nginya Ndani; na ĩndĩ mũyũka mũndavye nĩ kana nĩmanye ũtalo woo.” 3 Ĩndĩ Yoavu amwĩa atĩĩ: “Yeova naingĩvye andũ make kũndũ 100! Mwĩai wakwa mũsumbĩ, mo onthe ti athũkũmi ma mwĩai wakwa? Nĩkĩ mwĩai wakwa ũkwenda kwĩka ũu? Nĩkĩ ũkwenda kũtuma Aisilaeli mavĩtya?”
4 Ĩndĩ ndeto sya mũsumbĩ nĩsyakĩlilye ndeto sya Yoavu vinya. Kwoou Yoavu aumaala athi Isilaeli yonthe, na ĩtina wa ũu, asyoka Yelusalemu. 5 Nĩvo ĩndĩ Yoavu wanengie Ndaviti ũtalo wa andũ ala maandĩkĩthĩtwʼe. Isilaeli yonthe yaĩ na aũme 1,100,000 ala makuaa mbyũ, nayo Yuta yaĩ na aũme 470,000 ala makuaa mbyũ. 6 Ĩndĩ andũ ma mbaĩ ya Livai na ya Mbenyamini mayaandĩkĩthwʼa katĩ woo, nũndũ ndeto sya mũsumbĩ nĩsyathatisye Yoavu mũno.
7 Yu ũndũ ũsu ndwaaendeesya Ngai ũla wa w’o o na vanini, kwoou aetee Aisilaeli ũkũno. 8 Nĩvo ĩndĩ Ndaviti weeie Ngai ũla wa w’o atĩĩ: “Nĩnĩvĩtĩtye mũno kwa kwĩka ũndũ ũũ. Na yu, mwa, ekea mũthũkũmi waku ĩvĩtyo yake, nũndũ nĩkĩte ũndũ wa ũtumanu mũno.” 9 Na ĩndĩ Yeova aneena na Ngati, mwoni wa Ndaviti, aimwĩa: 10 “Enda ũkatavye Ndaviti, ‘Ũũ nĩwʼo Yeova ũkwasya: “Nĩũnenga maũndũ atatũ ũnyuve. Nyuva ũndũ ũla ngũkũetee.”’” 11 Kwoou Ngati ooka vala ve Ndaviti na amwĩa atĩĩ: “Ũũ nĩwʼo Yeova ũkwasya, ‘Nyuva 12 wĩenda myaka ĩtatũ ya yũa, kana myei ĩtatũ ya kũsindwa nĩ amaitha maku na maikũkĩlya vinya na ũvyũ woo, kana mĩthenya ĩtatũ mũvithũkĩwe nĩ mũlaĩka wa Yeova e na ũvyũ wa Yeova na aikũna Aisilaeli onthe na ũwau wa kũkwatanwʼa ũla ũkoaa andũ aingĩ nthĩ yaku.’ Yu sũanĩa ũndũ ũsu na ũindavya ũndũ ngũthi kũsũngĩa ũla wandũma.” 13 Kwoou Ndaviti eea Ngati atĩĩ: “Nĩĩwʼa nĩ na thĩna mwingĩ mũno. Mwa, eka nĩvalũke kwʼokonĩ kwa Yeova, nũndũ tei wake nĩ mwingĩ mũno; ĩndĩ ndũkaeke nĩvalũke kwʼokonĩ kwa mũndũ.”
14 Nĩvo ĩndĩ Yeova waeteie Aisilaeli ũwau wa kũkwatanwʼa, ũla wooaie andũ 70,000 ma nthĩ ya Isilaeli. 15 O na ĩngĩ, Ngai ũla wa w’o nĩwatũmie mũlaĩka akanange Yelusalemu; ĩndĩ akilyĩ kwĩka ũu, Yeova oona ũu na eelila* nũndũ wa mũisyo ũsu, na eea mũlaĩka ũsu waanangaa andũ atĩĩ: “Nũu! Yu theesya kwʼoko kwaku.” Mũlaĩka ũsu wa Yeova aũngye vakuvĩ na kĩvũĩo kya Olinani ũla waĩ Mũyevusi.
16 Yĩla Ndaviti wookĩlilye metho make, nĩwoonie mũlaĩka wa Yeova aũngamĩte katĩkatĩ wa nthĩ na ĩtu akũĩte ũvyũ wake na aũkwete aũtambũũkĩtye welekele Yelusalemu. Nĩvo ĩndĩ Ndaviti na atumĩa, mekĩĩte ngũa sya makunia, meevalũkilye nthĩ vau kwa vau na mothyũ moo nginya nthĩ. 17 Ndaviti eeie Ngai ũla wa w’o atĩĩ: “Yo tinyie nĩnaisye andũ matalwe? Ninyie nĩkĩte naĩ, na ninyie nĩvĩtĩtye; ĩndĩ mo malondu aa mekĩte ata? Ame Yeova Ngai wakwa, mwa eka kw’oko kwaku kũngũne ne inyie na nyũmba ya ĩthe wakwa; ĩndĩ ndũkaetee andũ maku ũthĩnyʼo ũũ.”
18 Nĩvo ĩndĩ mũlaĩka wa Yeova weeie Ngati akatavye Ndaviti ambate akakĩe Yeova kĩthembeo kĩvũĩonĩ kya Olinani ũla waĩ Mũyevusi. 19 Kwoou Ndaviti ambata kwosana na ndeto sya Ngati, ila waneeneete ĩsyĩtwanĩ ya Yeova. 20 Ĩvindanĩ yĩu, Olinani nĩwavĩndũkie na oona ũla mũlaĩka, na ana make ana ala maĩ vamwe nake meevitha. Yu Olinani avũaa nganũ. 21 Yĩla Ndaviti wambatie vala ũĩ, Olinani nĩwamũsyaisye na amwona, na vau kwa vau auma kĩvũĩonĩ na akumanĩa Ndaviti na ũthyũ wake nginya nthĩ. 22 Ndaviti eeie Olinani atĩĩ: “Nthooesye* vala ũseũvĩtye kĩvũĩo, nĩ kana nakĩe Yeova kĩthembeo vo. Nthooesye vo na thooa wavo wʼonthe, nĩ kana ũthĩnyʼo ũla ũetewe andũ ũũngamwʼe.” 23 Ĩndĩ Olinani eeie Ndaviti atĩĩ: “Vose vethĩwe vaku, na eka mwĩai wakwa mũsumbĩ eke kĩla ũkwona kĩ kĩseo.* Yu nĩngũnengane ngʼombe sya nthembo ya kũvĩvwʼa na ivũi syĩthĩwe ngũ na nganũ yĩthĩwe nthembo ya lĩu. Nĩnaũnenga syĩndũ isu syonthe.”
24 Ĩndĩ o na ũu wĩ o vo, Mũsumbĩ Ndaviti eeie Olinani atĩĩ: “Aiee, no nginya ngũthoee vo na thooa wavo wʼonthe, nũndũ ndiosa syĩndũ syaku niinenge Yeova kana numye nthembo sya kũvĩvwʼa ndaumĩsye kĩndũ.” 25 Kwoou Ndaviti anenga Olinani thaavu waĩ na ũito wa sekeli 600* athooe vandũ vau. 26 Na Ndaviti aakĩa Yeova kĩthembeo vau na amumĩsya nthembo sya kũvĩvwʼa na nthembo sya ngwatanĩo, na eekaĩla Yeova, nake amũsũngĩa kwa kũete mwaki kuma ĩtunĩ wavĩvya nthembo ila syaĩ kĩthembeonĩ kĩu. 27 Na ĩndĩ Yeova eeaĩa ũla mũlaĩka atũnge ũvyũ wake ndoonĩ yawʼo. 28 Ĩvinda yĩu, yĩla Ndaviti woonie Yeova amũsũngĩĩa kĩvũĩonĩ kya Olinani ũla Mũyevusi, nĩwaendeeie kũthembea vau. 29 Ĩndĩ o na ũu wĩ o vo, ĩvindanĩ yĩu ĩeema ya ũthaithi ya Yeova yĩla Mose waseũvĩisye weũnĩ na kĩthembeo kya nthembo sya kũvĩvw’a syaĩ vandũnĩ vatũlu kũu Ngiveoni. 30 Ĩndĩ Ndaviti ndaĩ esa kũthi mbee wayo akakũlye Ngai ũtao, nũndũ nĩwakĩaa mũno ũla ũvyũ wa mũlaĩka wa Yeova.