Kuma
10 Na ĩndĩ Yeova eea Mose: “Enda kwa Valao, nũndũ nĩnĩtĩkĩlĩtye ngoo yake na ngoo sya athũkũmi make syĩthĩwe syĩ mbũmũ, nĩ kana nonanyʼe mawonanyʼo aa makwa mbee wake, 2 na nĩ kana mwĩtavya syana syenyu na esũkũũu ũndũ nakũnie Misili mũno wĩana na syama ila neekie katĩ woo; na vate nzika, mũkamanya kana ninyie Yeova.”
3 Kwoou Mose na Alũni mathi kwa Valao na mamwĩa atĩĩ: “Ũũ nĩwʼo Yeova Ngai wa Aevelania ũkwasya, ‘Wĩlea kũmbĩnyivĩsya nginya ĩndĩĩ? Lekya andũ makwa mathi nĩ kana makanthũkũme. 4 Nũndũ waendeea kũlea kũlekya andũ makwa mathi, ũnĩ ngaete ngie kĩsionĩ kyaku. 5 Na ikavwʼĩka nthĩ yonthe, nginya wĩthĩe mũitonya kwona mũthanga. Ikaya kyonthe kĩla kĩtaneeanangwa nĩ mbua ya mavia na mũnatiiwe nakyo, na iiya mĩtĩ yenyu yonthe ĩla yĩ kĩthekanĩ. 6 Ikausũa nyũmbanĩ syaku syonthe, nyũmbanĩ sya athũkũmi maku onthe, na nyũmbanĩ sya Amisili onthe kwa nzĩa ĩtaaoneka nĩ aa-ĩthe menyu na aa-ũmae menyu kuma yĩla meethĩiwe nthĩ ĩno nginya ũmũnthĩ.’” Ĩtina wa ũu, nĩweethyũũie na auma vala ve Valao.
7 Na ĩndĩ athũkũmi ma Valao mamwĩa atĩĩ: “Mũndũ ũũ eendeea kũtũthĩnyʼa* nginya ĩndĩĩ? Lekya andũ aa mathi makathũkũme Yeova Ngai woo. We ndũkwona ũndũ Misili yanangĩtwe?” 8 Kwoou Mose na Alũni nĩmatũngiwe vala ve Valao, nake amea: “Endai, mũkathũkũme Yeova Ngai wenyu. Ĩndĩ mo naaũ meũthi?” 9 Na ĩndĩ Mose amwĩa: “Twĩthi na amũika maitũ, andũ maitũ ala akũũ, ana maitũ, eĩtu maitũ, malondu maitũ, na ngʼombe sitũ, nũndũ tũkeethĩwa na mboka kwondũ wa Yeova.” 10 Nake amea: “Ngesa kwĩthĩa nĩmũlekilye mũthi vamwe na syana syenyu, kwa wʼo Yeova ethĩwa vamwe nenyu! Nĩ ũndũ wĩ ũtheinĩ kana mũvangĩte kwĩka ũndũ mũthũku. 11 Ti kĩla mũndũ ũkũthi! No aũme menyu me oka meũthi makamũthũkũme Yeova, nũndũ ũu nĩwʼo mũnakũlĩtye.” Ĩtina wa ũu, malũngwʼa mauma mbee wa Valao.
12 Nĩvo ĩndĩ Yeova weeie Mose atĩĩ: “Tambũũkya kwʼoko kwaku ĩũlũ wa Misili, nĩ kana ngie syũke nthĩ ya Misili na iiya kyonthe kĩla kĩmeete ĩ nthĩ, kyonthe kĩla kĩnatialilwʼe nĩ mbua ya mavia.” 13 Vau kwa vau, Mose atambũũkya ndata yake ĩũlũ wa nthĩ ya Misili, na Yeova atuma kĩseve kyumĩte wumĩlonĩ wa sua kĩuutana nthĩ ĩsu mũthenya wʼonthe na ũtukũ wʼonthe nginya kwakya. Na kĩseve kĩu kyumĩte wumĩlonĩ wa sua kyaete ngie. 14 Na ngie syooka nthĩ yonthe ya Misili na syekala kĩsionĩ kyonthe kya Misili. Kwaĩ kũthũku mũno; kũyaĩ kwaaĩthĩwa ngie mbingĩ mũno ta isu, na kũyaĩ kwĩse kwĩthĩwa ingĩ mbingĩ ta isu. 15 Syavwʼĩkie nthĩ yonthe, na nthĩ yausũa kĩvindu nũndũ wasyo; syaanangie syĩndũ syonthe ila syameete nthĩ ĩsu na matunda onthe ma mĩtĩ ala matialĩtwʼe nĩ mbua ya mavia; vai kĩndũ o na kĩmwe kĩũ kyaatiala mĩtĩnĩ kana mĩmeanĩ nthĩ yonthe ya Misili.
16 Kwoou Valao ate kwananga ĩvinda eeta Mose na Alũni na amea: “Nĩnĩmũvĩtĩsye Yeova Ngai wenyu na nĩnĩmũvĩtĩsye inywʼĩ. 17 Yu, mwa ndekea ĩvinda yĩĩ yĩmwe na ũimwĩsũva Yeova Ngai wenyu nĩ kana ambetangĩe ũkũno ũũ mũthũku mũno.” 18 Kwoou auma* vala ve Valao na amwĩsũva Yeova. 19 Na ĩndĩ Yeova avĩndũa kĩseve, kyatwʼĩka kĩseve kĩ vinya mũno kyumĩte ũthũĩlonĩ wa sua, na kyakua ngie isu kyaitwaa Ũkanganĩ Mũtune. Vai ngie o na ĩmwe yaatiala kĩsionĩ kyonthe kya Misili. 20 O na ũu wĩ o vo, Yeova nĩweetĩkĩlilye ngoo ya Valao yĩthĩwe yĩ mbũmũ, na ndaalekya Aisilaeli mathi.
21 Na Yeova eea Mose atĩĩ: “Tambũũkya kwʼoko kwaku kwelekele ĩtunĩ nĩ kana kwĩthĩwe na kĩvindu nthĩ ya Misili, kĩvindu kya ngokomi.” 22 Mose ate kwananga ĩvinda nĩwatambũũkisye kwʼoko kwake elekelye ĩtunĩ, na kweethĩwa kĩvindu kya ngokomi kwa ĩvinda ya mĩthenya ĩtatũ nthĩ yonthe ya Misili. 23 Mũndũ ndaĩ atonya kwona ũla ũngĩ, na kwa mĩthenya ĩtatũ vai ũmwe woo waauma vala waĩ; ĩndĩ Aisilaeli onthe maĩ na kyeni kũla mekalaa. 24 Na ĩndĩ Valao eeta Mose na amwĩa: “Endai, mũkamũthũkũme Yeova. No malondu menyu na ngʼombe syenyu iũtiwa. O na no mũthi na syana syenyu.” 25 Ĩndĩ Mose asya: “O na ĩngĩ, we mwene nũũtũnenga* nthembo na nthembo ingĩ sya kũvĩvwʼa, na tũkasyumĩsya Yeova Ngai witũ. 26 Twĩthi na indo sitũ o nasyo. Vai nyamũ* o na ĩmwe twĩĩtĩkĩla ĩtiwe, nũndũ tũkatũmĩa imwe kũmũthaitha Yeova Ngai witũ, twavika kũu nĩwʼo tũkamanya nĩ nyamũ syĩva tũũmũthembea Yeova.” 27 Kwoou Yeova eetĩkĩlya ngoo ya Valao yĩthĩwe mbũmũ, na Valao ndaaĩtĩkĩla kũmalekya mathi. 28 Na Valao amwĩa: “Ĩvete mbee wakwa! Ndũkaatate kwona ũthyũ wakwa ĩngĩ, nũndũ mũthenya ũla ũkona ũthyũ wakwa, ũkakwʼa.” 29 Mose eewʼa ũu, amwĩie: “Nĩkwĩthĩwe o tondũ waweta, ndikaatata kwona ũthyũ waku ĩngĩ.”