Ĩvuku ya Mbee ya Mavinda
13 Ndaviti nĩwaneenie na anene ma makili na ma maana na kĩla mũtongoi. 2 Na ĩndĩ Ndaviti eea ũmbano wʼonthe wa Isilaeli atĩĩ: “Ethĩwa nĩmũkwona wĩ ũseo na nĩ ũndũ wĩtĩkĩlĩkĩte nĩ Yeova Ngai witũ, ekai tũtũmane ũtũmani kũla kwĩ ana-a-ĩthe maitũ ala matiele isionĩ syonthe sya Isilaeli na o na kũla kwĩ athembi na Alivai ala me ndũanĩ syoo syĩ na isesi moke kũũ tũĩ. 3 Na ekai tũtũnge Ĩsandũkũ ya Ngai witũ.” Nĩkwĩthĩwa nĩmayĩlekeleelye mĩthenyanĩ ya Saũlo. 4 Ũmbano wʼonthe nĩweetĩkĩlile kwĩka ũu, nũndũ andũ onthe moonie ũndũ ũsu waĩlĩte. 5 Kwoou Ndaviti oombanyʼa Aisilaeli onthe, kuma ũsĩ wa* Misili nginya Levo-amathi,* nĩ kana makaumye Ĩsandũkũ ya Ngai ũla wa w’o Kiliathi-yealimu.
6 Ndaviti na Aisilaeli onthe nĩmambatie mathi Mbaala, nayo nĩ Kiliathi-yealimu, ĩla ya Yuta, nĩ kana makaumye kũu Ĩsandũkũ ya Yeova, Ngai ũla wa w’o, ũla wĩkalaa kĩvĩlanĩ kyake kya ũsumbĩ ĩũlũ* wa akelũvi, vala ĩsyĩtwa yake yĩkaĩlawa. 7 O na ũu wĩ o vo, mailĩĩile Ĩsandũkũ yĩu ya Ngai ũla wa w’o ĩkasyanĩ yeũ na mayumya nyũmbanĩ ya Avinatavu, na Usisa na Aio nĩmo matongoesye ĩkasya yĩu. 8 Ndaviti na Aisilaeli onthe maendeee kũtanĩa mbee wa Ngai ũla wa w’o na vinya woo wʼonthe, mainĩte mbathi, makũnĩte mĩio ya wathi yĩ na ndii 12,* mĩio ĩngĩ ya kũinga yĩ na ndii, ndambulĩnĩ, masaya, na masoo. 9 Ĩndĩ yĩla mavikie kĩvũĩonĩ kya Kitoni, Usisa nĩwatambũũkisye kw’oko kwake na mĩtũkĩ na akwata Ĩsandũkũ yĩu, nĩkwĩthĩwa ngʼombe syaĩ vakuvĩ kũyĩvalũkya. 10 Nũndũ wa ũu, ũthatu wa Yeova nĩwakanĩie Usisa, na amũaa nũndũ nĩwatambũũkisye kw’oko kwake akwata Ĩsandũkũ yĩu, na akw’ĩĩa vau mbee wa Ngai. 11 Ĩndĩ Ndaviti athata* nũndũ ũthilĩku wa Yeova nĩwakanĩie Usisa; na vandũ vau vetawa Velesi-usisa* nginya ũmũnthĩ.
12 Kwoou mũthenya ũsu Ndaviti akĩa Ngai ũla wa w’o mũno na asya: “Ndonya kũete Ĩsandũkũ ya Ngai ũla wa w’o vala nĩĩ ata?” 13 Ndaviti ndaaete Ĩsandũkũ yĩu vala waĩ Ndũanĩ ya Ndaviti, ĩndĩ eeaie yĩtwawe nyũmbanĩ ya Oveti-etomu ũla waĩ Mũngathi. 14 Ĩsandũkũ ya Ngai ũla wa w’o yaĩ na andũ ma mũsyĩ wa Oveti-etomu, na yekalile nyũmbanĩ yake myei itatũ, na Yeova aendeea kũathima andũ ma mũsyĩ wa Oveti-etomu na kyonthe kĩla waĩ nakyo.