2 Ngwatanĩo

ŨU NĨ KWASYA ATA?

Yĩla mũũme na mũka meethĩwa na ngwatanĩo, wĩthĩaa no ũndũ ũmwe na mũtwai wa ndeke na mũtetheesya wake, na onthe maendete vandũ vamwe. O na makwatwa nĩ mathĩna, vandũ va kũsũanĩa “ndonya kwĩka ata,” kĩla ũmwe asũanĩaa “tũtonya kwĩka ata.”

MWOLOOTO WĨ MBIVILIANĨ: “Mayĩthĩawa me elĩ ĩngĩ, ĩndĩ nĩ mwĩĩ ũmwe.”—Mathayo 19:6.

“No nginya mũũme na mũka meke maũndũ me ngwatanĩo nĩ kana maĩlye mũtwaano woo.”—Christopher.

NĨKĨ NĨ ŨNDŨ WA VATA?

Yĩla mathĩna maumĩla, mũũme na mũka ala mate ngwatanĩo makamanthaa nũũ ũla wĩ na mavĩtyo vandũ va kũmantha ũndũ meũmina ũ thĩna. Tũmathĩna tũnini twĩsaa kũtwʼĩka thĩna mũnene.

“Ngwatanĩo nĩ ya vata mũno mũtwaanonĩ. Keka nĩ na mũemewa tũyĩthĩawa twĩ ngwatanĩo, twĩthĩwa tũilyĩ andũ mekalanasya ĩmwe vandũ va andũ matwaanĩte. Yĩla vekwendeka twĩke motwi manene, wĩthĩa nĩ thĩna.”—Alexandra.

ŨNDŨ ŨTONYA KWĨKA

ĨYĨOSYE

• Nĩnonaa mbesa ila nthũkũmaa syaĩle kwĩthĩwa syĩ “syakwa syonthe”?

• Nĩnĩwʼaa naĩle kwĩthĩwa vaasa na ũla ndwaanĩte nake yĩla ngwenda kũthũmũa?

• Nĩnĩwʼaa ndekwenda kwĩthĩwa na ũnyanya na andũ ma mũsyĩ ma ũla ndwaanĩte nake o na kau we e ngwatanĩo namo?

NEENEA MAKŨLYO AA WĨ NA ŨLA ŨTWAANĨTE NAKE

• Nĩ maũndũ meva twĩkaa nesa twĩ ngwatanĩo mũtwaanonĩ witũ?

• Nĩ maũndũ meva tũtonya kwaĩlangya?

• Nĩ maũndũ meva tũtonya kwĩka tũkaĩlangya wendi witũ wa kwĩka maũndũ twĩ ngwatanĩo?

MAŨNDŨ MATONYA KŨŨTETHEESYA

• Ndũkone ũla ũtwaanĩte nake ta mũndũ mũũsindana mũithaũka mũvĩla wa tennis. Vandũ va ũu, mwone ta mũndũ mwaĩle kwĩthĩwa mũithaũkĩla ngalĩko ĩmwe, na mathĩna ala mwĩ namo me ngalĩko ĩla ĩngĩ.

• Vandũ va kũkũlya, ‘Ndonya kũsinda ata?’ ĩkũlye-ĩ ‘Ithyelĩ tũtonya kũsinda ata?’

“Ndũkethĩnyʼe na kwenda kũmanya ũla wĩ na mavĩtyo na ũla ũte na ĩvĩtyo. Kĩla kĩthĩawa kĩ kya vata nĩ kwĩthĩwa na mũuo na ngwatanĩo nthĩnĩ wa mũtwaano.”—Ethan.

MWOLOOTO WĨ MBIVILIANĨ: “Mũteũmantha kwĩyĩuna o inywʼĩ ene, ĩndĩ kũmauna ala angĩ o namo.”​—Avilivi 2:3, 4.