Ndaimoni Nĩ Oaani!

Satani na ndaimoni methĩĩtwe me angʼendu na me mũisyo ĩvinda yonthe. Mavinda ma tene Satani ooaie indo na athũkũmi ma Yovu wĩ kĩthito. Nĩvo ĩndĩ wooaie syana ĩkũmi sya Yovu kwa kũtuma “kĩseve kĩnene” kyananga nyũmba ĩla syaĩ. Ĩtina wa ũu Satani nĩwakũnie Yovu na “mĩimũ mĩthũku kuma ũnyaĩĩ wa kũũ kwake kũvika lolotya wake.”—Yovu 1:7-19; 2:7.

Mũthenyanĩ wa Yesũ, ndaimoni syatumie andũ amwe methĩwa andũ mataneenaa, na ililinda. (Mathayo 9:32, 33; 12:22) Syathĩnisye mũndũ mũũme ũmwe mũno na syatuma etilanga na mavia. (Maliko 5:5) O na nĩsyatumie kĩmwana kĩmwe kĩkaya, syakĩkimanyʼa na nthĩ, na ‘syakĩthingithangya [‘syatuma kĩyiliitya na kwĩkootanga naĩ mũno,’ ũalyũũlo wa New World].’—Luka 9:42.

Ũmũnthĩ, Satani na ndaimoni nĩ oaani mũno o ta tene. Kwa wʼo, ũthũkũmi woo nĩ mwongeleku kuma yĩla mekiwʼe kuma ĩtunĩ. Movoo ala mekuma kĩthyũlũlũ kya nthĩ yonthe meĩkĩĩthya ũngʼendu woo. Makũnaa andũ amwe na ũwau. Mathĩnasya andũ angĩ ũtukũ, makĩmavata too kana kũmanenga ndoto nthũku mũno. Nĩmathĩnasya andũ amwe makewʼa ta makomanĩtye na mũndũ ũngĩ. O na nĩmaũũkasya andũ amwe, makaingĩĩsya angĩ moaane, kana angĩ kwĩyũaa.

Lintina, ũla wĩkalaa Sulinamu, enengana ũvoo akĩweta kana ndaimoni ĩmwe, kana veva mũthũku, nĩyooaie andũ 16 ma mũsyĩ wake na yamũthĩnyʼa mũno kĩmwĩĩ na kĩlĩkonĩ kwa ĩvinda ya myaka 18. Kwa kwĩyonea we mwene ũndũ kwĩthĩawa kũilyĩ, easya kana ndaimoni “itanĩaa kũthĩnyʼa mũno ala matekwenda kũthĩnwʼa kũvika ikamoaa.”

Ĩndĩ Yeova nũtonya kũsũvĩa athũkũmi make na mokũno ma Satani.—Nthimo 18:10.