Amaitha ma Ngai Naaũ?

Mũmaitha mũnene wa Ngai nĩ Satani ũla Ndevili. We nĩ kyũmbe kya veva kyangʼendeie Yeova. Satani nũendeeaa na kaũ wa kũvĩnganĩsya Ngai na nũeteae andũ thĩna mũnene. Satani nĩ mũthũku mũno. We nĩ mũneeni wa ũvũngũ na nĩ mũaani.—Yoana 8:44.

Syũmbe ingĩ sya veva nĩsyeekwatanisye na Satani nthĩnĩ wa ũngʼendu wake kwa Ngai. Mbivilia ĩsyĩtaa syũmbe isu ndaimoni. O ta Satani, ndaimoni o nasyo nĩ amaitha ma andũ. Nĩsyendete kũũmĩsya andũ. (Mathayo 9:32, 33; 12:22) Yeova akaananga Satani na ndaimoni syake tene na tene. Mo matiele na ĩvinda o ĩkuvĩ ya kũthĩnʼya andũ.—Ũvuanʼyo 12:12.

Ethĩwa nũkwenda kwĩthĩwa mũnyanya wa Ngai, no nginya ũlee kwĩka ũndũ Satani ũnũkwenda wĩke. Satani na ndaimoni nĩmamenete Yeova. Mo nĩ amaitha ma Ngai, na meenda kũkũtwʼĩkĩthya mũmaitha wa Ngai. No nginya ũnyuve ũla ũkwenda kwendeesya—Satani kana Yeova. Ethĩwa nũkwenda thayũ ũtathela, no nginya ũnyuve kwĩka kwenda kwa Ngai. Satani e moseleke maingĩ na nzĩa mbingĩ sya kũkenga andũ. Andũ aingĩ nĩmaendeee kũtumanwʼa nĩwe.—Ũvuanʼyo 12:9.