Ĩsomo ya 1

Ũndũ Ũtonya Kũmanya Kĩla Ngai Wendaa

Nĩ ũvoo mwaũ wa vata wĩ nthĩnĩ wa Mbivilia? (1)

Mũandĩkĩthya wa Mbivilia nũũ? (2)

Nĩkĩ waĩlĩtwe nĩ kwĩmanyĩsya Mbivilia? (3)

1. Mbivilia nĩ mũthĩnzĩo wa thooa mũnene kuma kwa Ngai. Ĩilyĩ ta valũa kuma kwa ĩthe-wa-mũndũ wĩ wendo kwa syana syake. Ĩtũtavasya wʼo ĩũlũ wa Ngai—nĩwe ũũ na ieleelo syake nĩ myaũ. Ĩmanyĩthasya nzĩa ya kũmĩĩsya mathĩna na nzĩa ya ũkwata ũtanu wa wʼo. Mbivilia yoka nĩyo ĩtũtavasya maũndũ ala no nginya twĩke nĩ kenda twendeesye Ngai.—Savuli 1:1-3; Isaia 48:17, 18.

2. Mbivilia yaandĩkiwe nĩ andũũme kĩvathũkanʼyo vakuvĩ 40 kwa ĩvinda ya myaka 1,600, kwambĩlĩĩlya mwaka wa 1513 M.I.Y. (Mbee wa Ĩvinda Yitũ) Yo nĩ wũmbanʼyo wa mavuku manini 66. Andũ ala maandĩkie Mbivilia maveveewe nĩ Ngai. Maandĩkie mesilya make, ti moo ene. Kwoou Ngai wa ĩtunĩ, na ti mũndũ o na wĩva ĩũlũ wa nthĩ, nĩwe Mũandĩkĩthya wa Mbivilia.—2 Timotheo 3:16, 17; 2 Vetelo 1:20, 21.

3. Ngai nĩwaĩkĩĩthisye kana Mbivilia yaumwʼa wumĩĩsyo mũlũngalu na kũsũvĩwa nesa. Mbivilia ila ikũnĩtwe kyava nĩ mbingĩ kwĩ ĩvuku yĩngĩ o na yĩva. Ti kĩla mũndũ ũkatana kwona ũyĩmanyĩsya Mbivilia, ĩndĩ ndũkaeke kwĩmanyĩsya nũndũ wa ũu. Ĩvinda yaku yĩla yũkĩte ya tene na tene yĩkwetye kũmanya Ngai na kwĩka kwenda kwake o na wavĩnganĩwʼa ata.—Mathayo 5:10-12; Yoana 17:3.