Ĩsomo ya 6

Ũsumbĩ wa Ngai Nĩ Kyaũ?

Ũsumbĩ wa Ngai ũĩ va? (1) Mũsumbĩ wawʼo nũũ? (2)

Atĩĩ, kwĩ na andũ angĩ me kĩanda nthĩnĩ wa kũsumbĩka na Mũsumbĩ ũsu? Ethĩwa nũu, nĩ meana? (3) Nĩ kyaũ kyonanasya kana tũtũĩte nthĩnĩ wa mĩthenya ya mũminũkĩlyo? (4)

Ũsumbĩ wa Ngai ũkeeka ũko wa andũ ata ĩvinda yĩla yũkĩte? (5-7)

1. Yĩla waĩ ĩũlũ wa nthĩ, Yesũ amanyĩisye aatĩĩi make kũvoya Ũsumbĩ wa Ngai. Ũsumbĩ nĩ silikalĩ ĩtongoawʼa nĩ mũsumbĩ. Ũsumbĩ wa Ngai nĩ silikalĩ ya mwanya. Wũũngamĩtwʼe ĩtunĩ na ũkasumbĩka nthĩ ĩno. Ũkathesya syĩtwa ya Ngai. Ũkatuma kwenda kwa Ngai kwĩkwe ĩũlũ wa nthĩ tondũ kwĩkawa ĩtunĩ.—Mathayo 6:9, 10.

2. Ngai anenganie watho kana Yesũ akatwʼĩka Mũsumbĩ wa Ũsumbĩ Wake. (Luka 1:30-33) Yĩla Yesũ waĩ ĩũlũ wa nthĩ, aĩkĩĩthisye kana akeethĩwa Mũsumbĩki wĩ kanee, mũsili-wa-katĩ, na mwĩanĩu. Yĩla wasyokie ĩtunĩ, ndaaĩkalwʼa kĩvĩlanĩ atwʼĩke Mũsumbĩ wa Ũsumbĩ wa Ngai vau kwa vau. (Aevelania 10:12, 13) Mwakanĩ wa 1914, Yeova nĩwanengie Yesũ ũkũmũ ũla wamwathĩte. Kuma ĩvinda yĩu, Yesũ asumbĩkĩte ĩtunĩ e Mũsumbĩ mwiwa wa Yeova.—Ndanieli 7:13, 14.

3. Ĩngĩ Yeova nũnyuvĩte andũũme na andũ aka na aĩkĩĩku kuma nthĩ mathi ĩtunĩ. Me vamwe na Yesũ makasumbĩka ũko wa andũ me asumbĩ, asili, na athembi. (Luka 22:28-30; Ũvuanʼyo 5:9, 10) Yesũ ametie “ĩĩthya ĩnini” asumbĩki asu ma ngwatanĩo nake nthĩnĩ wa Ũsumbĩ wake. Ũtalo woo nĩ 144,000.—Luka 12:32; Ũvuanʼyo 14:1-3.

4. Yesũ amina oou kũtwʼĩka Mũsumbĩ, ekisye Satani na alaĩka make athũku kuma ĩtunĩ mavaũũka kũvika wĩkalo wa nthĩ. Nĩkyo kĩtumi maũndũ mathũkĩte mũno vaa ĩũlũ wa nthĩ kuma mwaka wa 1914. (Ũvuanʼyo 12:9, 12) Makaũ, mayũa, mowau ma ũnyaĩĩko mũnene, ũlei wa mĩao ũla ũendeee na kwongeleka—maũndũ asu onthe nĩ kĩlungu kya “wonanʼyo” wa kwĩthĩwa kana Yesũ nũsumbĩkĩte na kana mũvangĩle ũũ wa maũndũ wĩ nthĩnĩ wa mĩthenya ya mũminũkĩlyo yawʼo.—Mathayo 24:3, 7, 8, 12; Luka 21:10, 11; 2 Timotheo 3:1-5.

5. Mĩtũkĩ Yesũ akasilĩla andũ, amavathanʼye tondũ mũĩthi ũvathaa malondu kuma kwa mbũi. “Malondu” nĩ ala makethĩwa meyĩĩkĩĩthĩtye kwĩthĩwa asumbĩkwa make alũmanu. Makakwata thayũ wa tene na tene ĩũlũ wa nthĩ. “Mbũi” nĩ ala makethĩwa maleete Ũsumbĩ wa Ngai. (Mathayo 25:31-34, 46) Ĩvindanĩ ĩkuvĩ yũkĩte, Yesũ akaananga onthe ala ma mũthemba wa mbũi. (2 Athesalonika 1:6-9) Ethĩwa nũkwenda kwĩthĩwa wĩ ũmwe wa “malondu” ma Yesũ, no nginya wĩthukĩĩsye ũtũmani wa Ũsumbĩ na ũyĩka kwĩanana nondũ ũkwĩmanyĩsya.—Mathayo 24:14.

6. Yuyu nthĩ yonthe ĩaanĩkĩte ĩkatwʼĩka nthĩ mbingĩ. Kĩla ĩmwe yĩ silikalĩ yayo mbene. Mbaĩ ii nivũanaa kaũnĩ mavinda maingĩ. Ĩndĩ Ũsumbĩ wa Ngai ũkoosa mwanya wa silikalĩ syonthe sya kĩmũndũ. Ũkasumbĩka nthĩ yonthe newʼo silikalĩ ĩmwe yoka. (Ndanieli 2:44) Ĩvinda yĩu kũikethĩwa kaũ ĩngĩ, ũtũli wa mĩao, na ũngʼendu wĩ wũkiti. Andũ onthe makatũa vamwe me na mũuo na ngwatanĩo.—Mika 4:3, 4.

7. Ĩvindanĩ ya Ũsumbĩki wa Yesũ wa Myaka Ngili, andũ aĩkĩĩku makatwʼĩka eanĩu, na nthĩ nima ĩkatwʼĩka valatiso. Kũvikĩa mũthya wa myaka ĩsu ngili, Yesũ akeethĩwa ekĩte kĩla ũndũ Ngai wamwĩie nĩeke. Nĩvo ĩndĩ wĩtũngĩa Ĩthe ũla Ũsumbĩ. (1 Akolintho 15:24) Nĩkĩ ũtatavya anyanyau na endwa maku ũndũ Ũsumbĩ wa Ngai wĩĩka?

[Visa Ithanguni ya 13]

Ungu wa ũsumbĩki wa Yesũ, kũikethĩwa ĩngĩ kĩmena kana kyoneo na kyende kĩte mũsingi