Ĩsomo ya 10
Imanyĩo Ila Ngai Ũmenaa
Waĩlĩtwe nĩ kwĩthĩwa na woni mwaũ ĩũlũ wa maũndũ ala Ngai waasya nĩ mathũku? (1)
Nĩ mĩthemba yĩva ya mũendele wa kĩngomanʼyo ĩla ĩtaĩle? (2)
Mũklĩsto aĩlĩtwe nĩ kwĩthĩwa na woni mwaũ ĩũlũ wa ũneeni wa ũvũngũ? (3) wũthi wa kyũthi? (3) ũngʼei? (3) ũngʼendu wĩ wũkiti? (4) ũneenanʼyo na maveva? (5) ũnywʼi? (6)
Nata mũndũ ũtonya kwĩthalũla ethasye imanyĩonĩ nthũku? (7)
1. Athũkũmi ma Ngai mendaa ũla ũseo. Ĩndĩ no nginya ĩngĩ memanyĩsye kũmena ũla ũthũku. (Savuli 97:10) Ũu nĩ kwasya mevathane na imanyĩo imwe ila Ngai ũmenaa. Imwe sya imanyĩo isu nĩ syĩva?
2. Ũlaalai: Ngomanʼyo mbee wa mũtwaano, ũthaaa, ngomanʼyo na nyamũ, ngomanʼyo sya andũ ma nthakame ĩmwe, na ngomanʼyo ya mũndũũme na mũndũũme na mũndũ mũka na mũndũ mũka, syonthe isu nĩ naĩ ngito kwa Ngai. (Alivai 18:6; Alomi 1:26, 27; 1 Akolintho 6:9, 10) Ethĩwa mũndũũme na mũndũ mũka maitwaanĩte ĩndĩ nĩmatũĩte vamwe, maĩlĩtwe nĩ kũtaanĩsya kana ethĩwa ti ũu matwaane kwĩanana na mwĩao.—Aevelania 13:4.
3. Ũneeni wa ũvũngũ, Wũthi wa Kyũthi, Ũngʼei: Yeova Ngai ndatonya kũneena ũvũngũ. (Tito 1:2) Andũ ala mekwenda wĩtĩkĩlo wake no nginya makevathana na ũneeni wa ũvũngũ. (Nthimo 6:16-19; Akolosai 3:9, 10) Kĩla mũthemba wa wũthi wa kyũthi wĩ tũvuthĩ twa ĩtomo. Kwoou Aklĩsto mayĩthĩawa na kĩlungu nthĩnĩ wa mũthemba o na wĩva wa wũthi wa kyũthi, ta kũmantha mbesa kwa kũthaũka nganda, kuluanʼya matangi ma tikiti, na kũthooa tikiti sya ĩvuso. (Aeveso 5:3-5) Na Aklĩsto mayũyaa. Maithooaa syĩndũ mbũye mesĩ, kana makosa syĩndũ matanengetwe mwanya.—Kuma 20:15; Aeveso 4:28.
4. Mĩkũthũko ya Ũthatu, Ũngʼendu wĩ Wũkiti: Ũthatu ũte mũũngamĩe nũtonya kwelekelya mekonĩ ma ũngʼendu wĩ wũkiti. (Mwambĩlĩlyo 4:5-8) Mũndũ wĩ ũngʼendu wĩ wũkiti ndatonya kwĩthĩwa mũnyanya wa Ngai. (Savuli 11:5; Nthimo 22:24, 25) Nĩ ĩvĩtyo kwĩyĩĩvanĩsya kana kũtũnga ũthũku kwondũ wa mothũku ala andũ angĩ matonya kũtwĩka.—Nthimo 24:29; Alomi 12:17-21.
5. Ithitũ sya Ũe na Ũneenanʼyo na Maveva: Andũ amwe nĩmetasya ũtonyi wa maveva kũtata kũvosya mowau. Angĩ nĩmaingaa ithitũ ĩũlũ wa amaitha moo kũtuma mawaa kana o na makwʼa. Ũtonyi wa kwĩka imanyĩo ii syonthe nĩ Satani. Kwoou no nginya Aklĩsto malee kwĩthĩwa na kĩlungu nthĩnĩ wa kĩmanyĩo o na kĩva katĩ wa isu. (Kũtũngĩlĩlwa kwa Mĩao 18:9-13) Kwĩkala vakuvĩ na Yeova nĩwʼo ũsũvĩo mũseo kũthonoka wʼonthe wa kwĩsiĩĩa na ithitũ ila tũtonya kũingĩwa nĩ andũ angĩ.—Nthimo 18:10.
6. Ũnywʼi: Ti ĩvĩtyo kũnywʼa ndivai nini, ũkĩ, kana kya-ũnywʼa kĩngĩ kĩ kĩmilo. (Savuli 104:15; 1 Timotheo 5:23) Ĩndĩ kũnywʼa kũthonoka kĩthimo na ũnywʼi nĩ ĩvĩtyo methonĩ ma Ngai. (1 Akolintho 5:11-13; 1 Timotheo 3:8) Kũnywʼa kũvĩtũka kĩthimo nĩkũtonya kwananga ũima wa mwĩĩ waku na kũthokoa mũsyĩ waku. O na no kũtume wĩlekelya matatwa angĩ kwa ũvũthũ.—Nthimo 23:20, 21, 29-35.
7. Andũ ala mamanyĩaa kwĩka maũndũ ala Ngai waasya nĩ mathũku “maikatiĩwa ũsumbĩ wa Ngai.” (Akalatia 5:19-21) Ethĩwa kwa wʼo nũmwendaa Ngai na wĩenda kũmwendeesya, nũtonya kwĩthalũla wĩthasye imanyĩonĩ isu. (1 Yoana 5:3) Ĩmanyĩsye kũmena kĩla Ngai waasya nĩ kĩthũku. (Alomi 12:9) Tindanasya na andũ ala me na imanyĩo sya kĩngai. (Nthimo 13:20) Atindanʼya aviku ma Kĩklĩsto nĩmatonya kwĩthĩwa kyumo kya ũtethyo kwaku. (Yakovo 5:14) Mbeange wa maũndũ onthe, ĩkwatye ũtethyo wa Ngai kwĩsĩla mboyanĩ.—Avilivi 4:6, 7, 13.
[Visa Ithanguni ya 20]
Ngai nũmenaa ũnywʼi, ũngʼei, wũthi wa kyũthi, na meko ma ũngʼendu wĩ wũkiti