Ĩsomo ya 11

Mĩĩkĩĩo na Imanyĩo Ila Itendeeasya Ngai

Nĩ mĩĩkĩĩo na imanyĩo syĩva syĩ mavĩtyo? (1)

Atĩĩ, Aklĩsto nĩmaĩlĩtwe nĩ kũĩkĩĩa kana Ngai nĩ Ũtatũ? (2)

Nĩkĩ Aklĩsto ma wʼo matakwataa ũlilikano wa Kĩsimisi, Isita, kana mĩthenya ya kũsyawa? (3, 4)

Atĩĩ, akwʼũ nĩmatonya kwĩka naĩ ala me thayũ? (5) Atĩĩ, Yesũ akwʼĩĩe ngelanʼyonĩ? (6) Nĩ ũndũ wa vata ata kwendeesya Ngai? (7)

1. Ti mĩĩkĩĩo na imanyĩo syonthe nthũku. Ĩndĩ Ngai ndasyĩtĩkĩlaa ethĩwa syumanĩte na ndĩnĩ ya ũvũngũ kana nileanaa na momanyĩsyo ma Mbivilia.—Mathayo 15:6.

2. Ũtatũ: Atĩĩ, Yeova nĩ Ũtatũ—andũ atatũ nthĩnĩ wa Ngai ũmwe? Aiee! Yeova, ũla Ĩthe, nĩwe “Ngai ũla wa wʼo weka.” (Yoana 17:3; Maliko 12:29) Yesũ nĩwe Mwana Wake mũsyawa wa mbee, na e ungu wa ũnene wa Ngai. (1 Akolintho 11:3) Ĩthe nĩ mũnene kwĩ Mwana. (Yoana 14:28) Veva mũtheu ti mũndũ; nĩ vinya wa Ngai wa wĩki.—Mwambĩlĩlyo 1:2; Meko 2:18.

3. Kĩsimisi na Isita: Yesũ ndaasyawa Ndisemba 25. Asyaiwe Okutova 1, ĩvinda ya mwaka yĩla aĩthi mekalasya ndĩthya syoo nza wa mĩsyĩ ũtukũ. (Luka 2:8-12) Yesũ ndaaĩaĩa Aklĩsto makwatae kĩlilikano kya kũsyawa kwake. Vandũ va ũu, eeie amanyĩwʼa make matũasye kĩlĩkonĩ kana malilikanae kĩkwʼũ kyake. (Luka 22:19, 20) Kĩsimisi na imanyĩo syakyo syumĩte nthĩnĩ wa ndĩni sya ũvũngũ sya tene. Nowʼo ta imanyĩo sya Isita, ta ũtũmĩi wa matumbĩ na tũvũkũ. Aklĩsto ma mbee mayaakwata kĩlilikano kya Kĩsimisi kana Isita, o ũndũ ũmwe na Aklĩsto ma wʼo ũmũnthĩ.

4. Mĩthenya ya Kũsyawa: Makwata elĩ moka ma mĩthenya ya kũsyawa ala mawetetwe nthĩnĩ wa Mbivilia makwatiwe nĩ andũ matathaithaa Yeova. (Mwambĩlĩlyo 40:20-22; Maliko 6:21, 22, 24-27) Aklĩsto ma mbee mayaaĩthĩwa na molilikano ma mĩthenya ya kũsyawa. Kĩmanyĩo kya kwĩthĩwa na molilikano ma mĩthenya ya kũsyawa kyumanĩte na ndĩni sya ũvũngũ sya tene. Aklĩsto ma wʼo manenganae mĩthĩnzĩo na kwĩtanĩthya me vamwe mavindanĩ angĩ ma mwaka.

5. Kũkĩa Ala Akwʼũ: Ala akwʼũ maitonya kwĩka ũndũ o na wĩva kana kwĩwʼa ũndũ o na wĩva. Ithyĩ tũitonya kũmatethya, nao maitonya kũtwĩka naĩ. (Savuli 146:4; Mũtavanʼya 9:5, 10) Thayũ nũkusaa; ndũendeeaa kũtũa thayũ ĩtina wa kĩkwʼũ. (Esekieli 18:4) Ĩndĩ mavinda amwe alaĩka athũku, metawa ndaimoni, nĩmetusaa ta mo maveva ma akwʼũ. Imanyĩo o na syĩva ila ikonetye kũkĩa kana kũthaitha akwʼũ syĩ na mavĩtyo.—Isaia 8:19.

6. Ngelanʼyo: Yesũ ndaakwʼĩĩa ĩũlũ wa ngelanʼyo. Akwʼĩĩe ĩũlũ wa kĩtuĩ, kana kĩtĩ. Ndeto ya Kĩngiliki ĩla ĩalyũlĩtwe “ngelanʼyo” nthĩnĩ wa Mbivilia mbingĩ yoonanasya o kĩlungu kĩmwe kyoka kya ũvwaũ. Ũvano wa ngelanʼyo wumanĩte na ndĩni sya ũvũngũ sya tene. Ngelanʼyo ndĩaatũmĩwa kana kũthaithwa nĩ Aklĩsto ma mbee. Kwoou-ĩ, wĩĩsilya nĩkwaĩlĩte kũtũmĩa ngelanʼyo ũthaithinĩ?—Kũtũngĩlĩlwa kwa Mĩao 7:26; 1 Akolintho 10:14.

7. Nũtonya kwĩthĩwa wĩ ũndũ wĩ vinya mũno kũtia ĩmwe ya mĩĩkĩĩo na imanyĩo isu. Andũ ma mũsyĩ na anyanya nĩmatonya kũtata kũkũĩkĩĩthya ndwaĩle kũalyũũla mĩĩkĩĩo yaku. Ĩndĩ kwendeesya Ngai nĩkwʼo kwa vata kwĩ kwendeesya andũ.—Nthimo 29:25; Mathayo 10:36, 37.

[Visa Ithanguni ya 22]

Ngai ti Ũtatũ

[Visa Ithanguni ya 23]

Kĩsimisi na Isita syumĩte nthĩnĩ wa ndĩni sya ũvũngũ sya tene

[Visa Ithanguni ya 23]

Kũiĩ kĩtumi kya kũthaitha akwʼũ kana kũmakĩa