Ĩsomo ya 12

Kwonanʼya Ndaĩa kwa Thayũ na Nthakame

Twaĩlĩtwe kwĩthĩwa na woni mwaũ ĩũlũ wa thayũ? (1)

kumya ĩvu? (1)

Aklĩsto monanasya ata kana nĩmonaa vata wa kwĩsũvĩa maikeke maũndũ me mũisyo? (2)

Atĩĩ, nĩ ĩvĩtyo kũaa nyamũ? (3)

Imwe sya imanyĩo ila itonanasya ndaĩa kwa thayũ nĩ syĩva? (4)

Mwĩao wa Ngai ĩũlũ wa nthakame nĩ mwaũ? (5)

Ũu nĩ vamwe na kwĩkĩa nthakame mĩkivanĩ? (6)

1. Yeova nĩwe Kyumo kya thayũ. Syĩndũ syonthe ila syĩ thayũ syĩ na thiĩ wa thayũ wasyo kwa Ngai. (Savuli 36:9) Thayũ nĩ mũtheu kwa Ngai. O na thayũ wa kana kate kasyae nthĩnĩ wa nyinyia nĩ wa thooa mũnene kwa Yeova. Kũaa na ngũlũ kana kau kaendeee kũmbĩka nĩ ĩvĩtyo methonĩ ma Ngai.—Kuma 21:22, 23; Savuli 127:3.

2. Aklĩsto ma wʼo nĩmonaa vata wa kwĩsũvĩa maikeke maũndũ me mũisyo. Nĩmaĩkĩĩthasya kana ngalĩ syoo (mĩtokaa) na mĩsyĩ yoo yĩ ũsũvĩo ũtaete mũisyo. (Kũtũngĩlĩlwa kwa Mĩao 22:8) Athũkũmi ma Ngai maithengeeasya mathayũ moo mĩisyonĩ vate kĩtumi kĩseo no kenda metanĩthye kana mewʼe mũyo. Kwoou mayĩthĩawa na kĩlungu nthĩnĩ wa mathaũ ma ũngʼendu wĩ wũkiti ala mekaa andũ ala angĩ naĩ kwa kwenda. Nĩmevathanaa na ũtanĩthyo ũla ũũmĩĩasya andũ kwĩthĩwa na ũngʼendu wĩ wũkiti.—Savuli 11:5; Yoana 13:35.

3. Thayũ wa nyamũ o nawʼo nĩ mũtheu kwa Mũmbi. Mũklĩsto nũtonya kũaa nyamũ amanthe kya-ũya na kya-kwĩvwʼĩka kana esũvĩe na ũwau na mũisyo. (Mwambĩlĩlyo 3:21; 9:3; Kuma 21:28) Ĩndĩ nĩ ĩvĩtyo kwĩka nyamũ naĩ kana kũsyũaa ta ĩthaũ kana wĩtanĩthyo.—Nthimo 12:10.

4. Kũkusya sikala, kũtanyuka mĩlaa kana tambũũ (matũ maumasya mata matune yĩla matanyukwa), na kũnywʼa ndawa syĩ kĩmilo kwa kwĩtanĩthya kũyaĩlĩte Aklĩsto. Imanyĩo ii syĩ mavĩtyo nũndũ (1) itumaa twĩthĩwa ngombo syasyo, (2) syĩkaa mĩĩ yitũ naĩ, na (3) ti ntheu. (Alomi 6:19; 12:1; 2 Akolintho 7:1) Nĩkũtonya kwĩthĩwa kwĩ vinya mũno kũeka imanyĩo isu. Ĩndĩ no nginya twĩke ũu nĩ kenda twendeesye Yeova.

5. Nthakame o nayo nĩ ntheu methonĩ ma Ngai. Ngai aasya kana thayũ wĩ nthĩnĩ wa nthakame. Kwoou nĩ ĩvĩtyo kũya nthakame. Ĩngĩ nĩ ĩvĩtyo kũya nyama ya nyamũ ĩtaumĩtwʼe nthakame ũla kwaĩle. Ethĩwa nyamũ nĩyaitwa kana yakwʼĩĩa kĩteinĩ, ndĩaĩle kũĩwa. Ethĩwa yaathwa na ĩtumo kana ĩvuti, no nginya yumwʼe nthakame mĩtũkĩ ethĩwa nĩkũĩwa.—Mwambĩlĩlyo 9:3, 4; Alivai 17:13, 14; Meko 15:28, 29.

6. Ĩndĩ-ĩ, nĩ ĩvĩtyo kwĩtĩkĩla kwĩkĩwa nthakame mĩkivanĩ? Lilikana atĩĩ, Yeova endaa twĩvathane vyũ na nthakame. Ũu nĩ kwonanʼya kana no nginya tũlee kũlikya mĩĩnĩ yitũ kwa nzĩa o na yĩva nthakame ya andũ angĩ kana o na nthakame yitũ ene ĩla yĩthĩĩtwe yiĩtwe ũionĩ. (Meko 21:25) Kwoou Aklĩsto ma wʼo mayĩtĩkĩla kwĩkĩwa nthakame mĩkivanĩ. Makeetĩkĩla mĩthemba ĩngĩ ya ũiiti wa ũtakĩtalĩ, ta kwĩkĩwa mĩkivanĩ syĩndũ iseũvĩtwʼe vate nthakame. Mo nĩmendaa kũtũa thayũ, ĩndĩ maitataa kũvonokya thayũ woo kwa kũtũla mĩao ya Ngai.—Mathayo 16:25.

[Visa Ithanguni ya 25]

Kwendeesya Ngai, no nginya twĩvathane na kwĩkĩwa nthakame mĩkivanĩ, imanyĩo ite ntheu, na kwĩthengeesya mĩisyonĩ vate kĩtumi