We Nowende Kũmanya Ũla Wʼo?

ŨLA wʼo ĩũlũ wa kyaũ? Ĩũlũ wa makũlyo amwe ma vata andũ matwĩe makũlasya. No wĩthĩwe ũsengʼawʼa nĩ makũlyo amwe ta aa:

• We Ngai nũtũthĩnĩkĩaa?

• Kaũ na mathĩna ikathela?

• Kwĩthĩawa ata yĩla twakwʼa?

• Ve wĩkwatyo kwa ala akwʼũ?

• Ndonya kũvoya ata nĩwʼĩke nĩ Ngai?

• Ndonya kwĩthĩwa na ũtanu ata?

Mosũngĩo ma makũlyo asu ũtonya kũmakwata va? Wakũlya andũ me kĩvathũkanyʼo, ũkwataa mosũngĩo me kĩvathũkanyʼo. O na ũkakũlya andũ ala maendaa makanisanĩ kana atongoi ma ndĩni, ũkwata o mosũngĩo meũleana. Mosũngĩo amwe monekaa ta maĩlĩte ĩndĩ ĩtina wa kavinda kanini andũ mayĩthĩa maitethya.

Ĩndĩ ve ĩvuku yĩmwe yĩ mosũngĩo ma kwĩkwatwʼa. Ĩvuku yĩtawetaa ũvũngũ. Yesũ Klĩsto aivoya Ngai amwĩie: “Ndeto yaku nĩyo wʼo.” (Yoana 17:17) Ũmũnthĩ Ndeto ĩsu nĩ Mbivilia. Ũvoonĩ ũũ ũatĩĩe nũũkwata mosũngĩo ma wʼo ma makũlyo asu kwa ũkuvĩ kuma Mbivilianĩ.

We Ngai Nũtũthĩnĩkĩaa?

NĨKĨ ANDŨ MAKŨLASYA ĨKŨLYO YĨU?: Nthĩ ĩno tũĩ yusũĩte ũngʼendu na sila ũte wa katĩ. Ndĩni mbingĩ imanyĩasya kana nĩ kwenda kwa Ngai tũthĩnae.

KĨLA MBIVILIA ĨMANYĨASYA: Ngai ndaetae ũthũku. Ĩandĩko ya Yovu 34:10 yaĩtye: “Nĩkwĩthĩwe kũasa na Ngai, atĩ eke ũthũku, na kũasa na Mwene Vinya Wʼonthe, atĩ eke naĩ!” Ngai e na kĩeleelo kyonanĩtye wendo kwa andũ. Nĩkyo kĩtumi Yesũ watũmanyĩisye tũvoyae atĩĩ: “Asa waitũ ũla wĩ ĩtunĩ . . . Ũsumbĩ waku wũke. Kwenda kwaku kwĩke kũũ nthĩ o ta kũya ĩtunĩ.” (Mathayo 6:​9, 10) Ngai atũthĩnĩkĩaa mũno vyũ, nĩkyo kĩtumi wĩkĩte maũndũ maingĩ nĩ kana kĩeleelo kyake kĩanĩe.​—⁠Yoana 3:​16.

Soma Mwambĩlĩlyo 1:26-⁠28; Yakovo 1:13; na 1 Vetelo 5:​6, 7.

Kaũ na Mathĩna Ikathela?

NĨKĨ ANDŨ MAKŨLASYA ĨKŨLYO YĨU?: Andũ aingĩ maendee kũkwʼa nũndũ wa kaũ. Ithyonthe nĩtũthĩnĩkaa ngoonĩ nũndũ wa mathĩna ala makwataa andũ.

KĨLA MBIVILIA ĨMANYĨASYA: Ngai nĩwathanĩte ĩvinda ũkaete mũuo nthĩ yonthe. Ũsumbĩnĩ wake, kana nthĩnĩ wa silikalĩ yake ya ĩtunĩ, andũ ‘matikemanyĩsya kaũ ĩngĩ.’ Ĩndĩ “makatusya mbyũ syoo itwʼĩke maembe.” (Isaia 2:4) Ngai akamina sila ũte wa katĩ na mathĩna onthe. Mbivilia yathanĩte: “[Ngai] akavyaĩa methoi onthe methonĩ moo; na kĩkwʼũ kĩikethĩwa vo ĩngĩ; o na kũikethĩwa ĩngĩ kũmeta, kana kũĩa, kana woo: maũndũ ma mbee [o vamwe na sila ũte wakatĩ na mathĩna] nĩ mavĩtu.”​—Ũvuanʼyo 21:​3, 4. 

Soma Savuli 37:​10, 11; 46:9; na Mika 4:​1-4.

Kwĩthĩawa Ata Yĩla Twakwʼa?

NĨKĨ ANDŨ MAKŨLASYA ĨKŨLYO YĨU?: Ndĩni mbingĩ sya nthĩ ĩno imanyĩasya kana yĩla mũndũ wakwʼa ve kĩndũ kĩtakusaa. Angĩ maĩkĩĩaa kana akwʼũ nĩmatonya kũthĩnyʼa andũ ala me thayũ, kana Ngai asilĩlaa andũ ĩianĩ ya mwaki tene na tene.

KĨLA MBIVILIA ĨMANYĨASYA: Mũndũ akwʼa ethĩawa aeka kwĩthĩwa thayũ. Ĩandĩko ya Mũtavanʼya 9:5 yaĩtye: “Ala akwʼũ matyĩsĩ ũndũ o na wĩva.” Nũndũ akwʼũ matyĩsĩ ũndũ o na wĩva, na mayĩwʼaa ũndũ o na wĩva, maitonya kũũmĩsya kana kũtethya ala me thayũ.​—⁠Savuli 146:​3, 4.

Soma Mwambĩlĩlyo 3:​19 na Mũtavanʼya 9:​6, 10.

Ve Wĩkwatyo kwa ala Akwʼũ?

NĨKĨ ANDŨ MAKŨLASYA ĨKŨLYO YĨU?: Nĩtwendaa kwĩkala na kũtanĩa thayũ vamwe na endwa maitũ. Nĩtwĩthĩawa na mea ma kwona ĩngĩ endwa maitũ ala makwie.

KĨLA MBIVILIA ĨMANYĨASYA: Andũ aingĩ ala makwie makathayũũkwʼa. Yesũ athanie kana “ala me mbũanĩ . . . makauma.” (Yoana 5:​28, 29) Kwĩanana na kĩeleelo kya mbee kya Ngai, ala methayũũkwʼa matonya kwĩkala valatisonĩ. (Luka 23:43) Ĩvinda yĩu yũkĩte kũkeethĩwa ũima mwĩanĩu wa mwĩĩ na thayũ ũtathela kwa andũ ala ewi. Mbivilia yaasyaa: “Ala alũngalu makatiĩwa nthĩ, na makatũa vo kũvika tene na tene.”​—⁠Savuli 37:29.

Soma Yovu 14:​14, 15; Luka 7:​11-​17; na Meko ma Atũmwa 24:15.

Ndonya Kũvoya Ata Nĩwʼĩke nĩ Ngai?

NĨKĨ ANDŨ MAKŨLASYA ĨKŨLYO YĨU?: Andũ ma ndĩni vakuvĩ syonthe nĩmavoyaa. Ĩndĩ aingĩ mewʼaa mboya syoo itasũngĩawa.

KĨLA MBIVILIA ĨMANYĨASYA: Yesũ atũmanyĩisye kana tũyaĩle kũsyokeleelaa mboya sitũ ta wathi. Aisye: “Na mũkĩvoya mũikatindĩe ndeto.” (Mathayo 6:7) Twenda Ngai ethukĩĩsye mboya sitũ, twaĩle kũvoyaa ũndũ wĩtĩkĩlaa. Nĩ kana twĩke ũu twaĩle kũmanya kwenda kwa Ngai na tũyĩka kwĩanana nakwʼo. Ĩandĩko ya 1 Yoana 5:​14 yĩeleetye kana: “Ethĩwa tũkavoya ũndũ kwĩanana na kwenda kwake [Ngai], nũtwĩwʼaa.”

Soma Savuli 65:2; Yoana 14:​6, 14; na 1 Yoana 3:​22.

How Can I Find Happiness in Life?

NĨKĨ ANDŨ MAKŨLASYA ĨKŨLYO YĨU?: Andũ aingĩ maĩkĩĩaa kana mbesa, nguma, kana wanake nitonya kũmaetee ũtanu. Nĩkyo kĩtumi mamanthaa syĩndũ isu, ĩndĩ mailea kwĩsa kũkwata ũtanu.

KĨLA MBIVILIA ĨMANYĨASYA: Yesũ nĩwoonanisye kĩla kĩtumaa tũkwata ũtanu yĩla waisye: “Nĩ aathime [“mena ũtanu,” NW] ala me na ũkya wa ngoo.” (Mathayo 5:3) Tũtonya kũkwata ũtanu wa wʼo tweeyumya kwĩanĩsya wendi witũ ũla mũnene vyũ wa kĩveva wa kũmanya ũla wʼo ĩũlũ wa Ngai na kĩeleelo kyake kwitũ. Wʼo ũsu wĩ Mbivilianĩ. Kũmanya wʼo kũtonya kũtũtethya kũvathũkanyʼa maũndũ ala ma vata na ala mate ma vata. Kwĩtĩkĩla wʼo ũla wĩ Mbivilianĩ ũtũtongoesye maũtwinĩ na mekonĩ maitũ nĩkũtonya kũtuma twĩkala thayũ wĩ na kĩeleelo.​—⁠Luka 11:28.

Soma Nthimo 3:​5, 6, 13-​18 na 1 Timotheo 6:​9, 10.

Asu nĩ mosũngĩo makuvĩ ma Mbivilia ma ala makũlyo thanthatũ. Nũkwenda kũmanya mbeange? Ethĩwa wĩ ũmwe wa ala mena “ũkya wa ngoo” no wĩthĩwe ũyenda kũmanya mbeange. Nowĩthĩwe ũyĩkũlya makũlyo angĩ ta: ‘Ethĩwa Ngai nũtũthĩnĩkĩaa nĩkĩ wĩtĩkĩlĩtye ũthũku mwingĩ na mathĩna maendee? Ndonya kwaĩlya mwĩkalĩlye wa mũsyĩ wakwa ata?’ Mbivilia nĩnenganĩte mosũngĩo matoetye ma makũlyo aa na angĩ maingĩ.

Ĩndĩ ũmũnthĩ andũ aingĩ mayendete kũmanya nesa ũndũ Mbivilia yaĩtye. Monaa ta ĩvuku ĩnene mũno na mavinda angĩ yĩ vinya kũelewa. We nowende kũtetheewʼa kũkwata mosũngĩo kuma Mbivilianĩ? Ngũsĩ sya Yeova nitonya kũũteetheesya na nzĩa ilĩ.

Ĩvuku yĩtawa Mbivilia Yo Ĩmanyĩasya Ata? yĩandĩkĩtwe nĩ kana yĩtetheesye andũ ala mate na mwanya mwingĩ mesomee mosũngĩo ma Mbivilia ĩũlũ wa makũlyo ma vata. Nzĩa ĩngĩ nĩ mũvango wa kwĩmanyĩsya Mbivilia mũsyĩ kwaku. Ũmwe wa Ngũsĩ sya Yeova ũtonya kũmanyĩsya Mbivilia no oke kwaku kana vandũ vangĩ mwĩwʼanĩte, o ĩvinda ĩvũthũ kĩla kyumwa, na mũyĩmanyĩsya ĩmwe vate ndĩvi. Andũ milioni mbingĩ nthĩ yonthe nĩmatethekete nũndũ wa mũvango ũsu. Aingĩ nĩmavikĩĩe kwasya: “Nĩnĩkwatĩte ũla wʼo!”

Vaiĩ ũthwii ũthonokete kũmanya wʼo ũla wĩ Mbivilianĩ. Wʼo ũla wĩ Mbivilianĩ nũtũthaasya kumana na maũndũ ma maimũ, ũthokoanu wa akili, na wʼĩa. Nũtũnengae wĩkwatyo, kĩeleelo, na ũtanu. Yesũ aisye: “Mũkamanya ũla wʼo, na ũla wʼo ũkamũthasya.”​—⁠Yoana 8:​32.