Nĩmaandĩkie Ĩũlũ wa Yesũ

Nĩwene aũme aa me visanĩ?— Masyĩtwa moo nĩ Mathayo, Maliko, Luka, Yoana, Vetelo, Yakovo, Yuta, na Vaulo. Aũme aa onthe maĩ thayũ ĩvinda ya Yesũ, na nĩmaandĩkie ĩũlũ wake. Eka twĩmanyĩsye ĩũlũ wamo.

Atatũ katĩ wamo maĩ atũme ala matavanasya na Yesũ. Nĩwĩsĩ asu atatũ maĩ aaũ?— Nĩ Mathayo, Yoana, na Vetelo. Mũtũmwa Mathayo na Yoana nĩmeesĩ Yesũ nesa, na kĩla ũmwe woo nĩwaandĩkie ĩvuku yĩeleetye ĩũlũ wake. O na ĩngĩ mũtũmwa Yoana nĩwaandĩkie ĩvuku yĩtawa Ũvuanʼyo. Amina kũandĩka ĩvuku yĩu nĩwasyokie aandĩka Valũa wa Mbee wa Yoana, Valũa wa Kelĩ wa Yoana, na Valũa wa Katatũ wa Yoana. Nake mũtũmwa Vetelo nĩwaandĩkie valũa ilĩ syĩ Mbivilianĩ. Valũa isu nĩ: Valũa wa Mbee wa Vetelo na Valũa wa Kelĩ wa Vetelo. Nthĩnĩ wa valũa wake wa kelĩ, Vetelo nĩwaandĩkie ĩũlũ wa ĩvinda yĩla Yeova waneenie e ĩtunĩ na asya ũũ ĩũlũ wa Yesũ: “Ũũ nĩwe Mwana wakwa mwendwa, ũla nendeeawʼa nĩwe.”

O namo aũme ala angĩ me vu visanĩ nĩmatũmanyĩasya ĩũlũ wa Yesũ nthĩnĩ wa mavuku ala maandĩkie. Ũmwe woo nĩ Maliko. Nĩvatonyeka akethĩwa aĩ vo ĩla Yesũ wakwatiwe, o na nĩvatonyeka akethĩwa oonie ũndũ kweethĩiwe. Ũla ũngĩ nĩ Luka. Luka aĩ ndakĩtalĩ na nĩvatonyeka akethĩwa atwʼĩkie Mũklĩsto ĩtina wa kĩkwʼũ kya Yesũ.

Aandĩki ala angĩ wene vu visanĩ masyaanĩwʼe na Yesũ, ĩndĩ Yesũ nĩwe waĩ mũkũũ. Nĩwĩsĩ masyĩtwa moo?— Meetawa Yakovo na Yuta. Mwambĩĩonĩ mayamũĩkĩĩaa Yesũ. O na moonaa ta waĩ na ndũũka. Ĩndĩ, ĩtina nĩmesie kũmũĩkĩĩa na matwʼĩka Aklĩsto.

Vaulo nĩwe tũũneenea wa mũthya katĩ wa aandĩki ala me vu visanĩ. Mbee wa atanamba kũtwʼĩka Mũklĩsto, Vaulo eetawa Saulo. Nĩwamenete Aklĩsto na nĩwamathĩnasya mũno. Nĩwĩsĩ kĩla kyatumie Vaulo avĩndũka na kũtwʼĩka Mũklĩsto?— Mũthenya ũmwe e nzĩanĩ, nĩweewie wasya kuma ĩtunĩ ũineena nake. Wasya ũsu waĩ wa Yesũ! Amũkũlilye Vaulo atĩĩ: ‘Nĩkĩ ũũmathĩnyʼa aatĩĩi makwa?’ Kuma ĩvinda yĩu Vaulo nĩwavĩndũkie na atwʼĩka Mũklĩsto. Vaulo aandĩkie mavuku 14 nthĩnĩ wa Mbivilia, kwambĩĩa ĩvuku ya Alomi kũvika ya Aevelania.

Nĩtũsomaa Mbivilia kĩla mũthenya, kana ti wʼo?—Twasoma Mbivilia kĩla mũthenya nĩtwĩmanyĩasya maũndũ maingĩ ĩũlũ wa Yesũ. We nũkwenda kwĩmanyĩsya maũndũ maingĩ ĩũlũ wa Yesũ?—