Mwanake wa Mwĩĩtu Wasyaanĩwʼe na Vaulo Ndaĩ na Wia

Eka twĩmanyĩsye ĩũlũ wa mwanake watangĩĩie thayũ wa mũndũ wasyaanĩwʼe na inyia wake. Mũndũ ũsu wasyaanĩwʼe na inyia wa mwanake ũsu eetawa mũtũmwa Vaulo. Mwanake ũsu ndawetetwe ĩsyĩtwa yake, ĩndĩ nĩtwĩsĩ nĩweekie ũndũ woonanisye kana ndaĩ na wia. Nũkwenda kũmanya ũndũ weekie?—

Vaulo aĩ mwove ku Yelusaleme. Oovetwe nũndũ wa kũtavanyʼa ĩũlũ wa Yesũ. Andũ amwe nĩmamũmenete Vaulo, na kwoou mavanga mũvango mũthũku. Maisye: ‘Ekai tũmũkũlye mũnene wa asikalĩ atũme asikalĩ make mamũtwae Vaulo kotinĩ. Ithyĩ twĩĩvitha nzĩanĩ, na ĩla Vaulo ũkwĩsĩla vau, tũimũaa!’

Mwanake wa mwĩĩtu wasyaanĩwʼe na Vaulo nĩweewie ĩũlũ wa mũvango ũsu. Eekie ata? Aendie vala Vaulo woovetwe na amũtavya. Vaulo eewʼa ũndũ ũsu oou, nĩwamũtũmie mwanake ũsu athi akamũtavye mũnene wa asikalĩ ĩũlũ wa mũvango ũsu mũthũku. Wĩona waĩ ũndũ wĩ laisi kwa mwanake ũsu kũneena na mũnene wa asikalĩ?— Aiee, nũndũ mũnene ũsu wa asikalĩ aĩ mũndũ wanengetwe ndaĩa. Ĩndĩ, mwanake ũsu ndaĩ na wia, na nĩwaneenie na mũnene ũsu wa asikalĩ.

Mũnene ũsu nĩweesĩ nesa ũndũ waĩle kwĩka. Atũmie asikalĩ vakuvĩ 500 mamũsũvĩe Vaulo! Ameie mamũtwae Vaulo Kaisalea ũtukũ ũsu. Andũ asu athũku nĩmamũaie Vaulo?— Aiee, nĩmaemiwe nĩ kwĩka ũu! Mũvango woo mũthũku watheleile o vau.

Ũtonya kwĩmanyĩsya kyaũ kumana na ngewa ĩno?— O naku no wĩthĩwe ũte na wia ta mwanake ũsu. Tũyaĩle kwĩthĩwa na wia ĩla tũũtavya andũ angĩ ĩũlũ wa Yeova. Ũkaendeea kũtavanyʼa ĩũlũ wa Yeova ũteũkĩa?— Weeka ũu, nũtonya kũtangĩĩa thayũ wa mũndũ.