Yesũ Nĩwatetheeisye Atũmwa Matavanyʼe na Ũkũmbaũ o na Mavĩngwa

Yesũ aitũma atũmwa make me ikundi thanthatũ sya andũ elĩ elĩ, nĩwamanengie motao maseo ĩũlũ wa ũndũ makatethasya wĩa wa kũtavanyʼa. Ĩndĩ ndaamatavya maũndũ asu tũ. Nĩwasyokie amakanyʼa ĩũlũ wa andũ ala matonya kũmavĩnga me ũtavanyʼanĩ. Ameie atĩĩ: “Sisyai! nĩngũmũtũma ta malondu katĩ wa nzũi; . . . Ĩsũvĩanei na andũ, nũndũ makamũnengane kotinĩ na makamũvũĩa masinakokenĩ moo. Na mũkatwawa mbee wa makavana na asumbĩ kwondũ wakwa.”—Mathayo 10:16-18.

Nĩvatonyeka aatĩĩi ma Yesũ makethĩwa mesaa kũvĩngwa mũno, ĩndĩ Yesũ amekĩie vinya kwa kũmea atĩĩ: “Mamũtwaa kũu, mũikavũavũane ĩũlũ wa ũndũ mwĩneena kana kĩla mwĩneena, nũndũ kĩla mwĩneena mũkanengwa saanĩ o ũsu, nũndũ ti o inywʼĩ mwĩĩthĩwa mũineena, ĩndĩ nĩ veva wa Ĩthe wenyu ũla wĩ ĩtunĩ wĩĩthĩwa ũineena kwĩsĩla inywʼĩ.” Yesũ aendeeie kũmea-ĩ: “Mũndũ akanengane mwana-a-inyia oawe, na ĩthe mwana wake, na syana ikamokĩlĩla asyai masyo na kũmoaĩthya. Na mũkamenwa nĩ andũ onthe kwondũ wa ĩsyĩtwa yakwa, ĩndĩ ũla ũkomĩĩsya kũvika mũthya, ũsu akatangĩĩwa.”—Mathayo 10:19-22.

Nũndũ wĩa wa kũtavanyʼa nĩ wa vata mũno, Yesũ nĩwakindĩlĩĩile kana amanyĩwʼa make maĩle kwĩthĩwa me oĩ nĩ kana maendeee kwĩthĩwa na ũthasyo wa kũtethya wĩa ũsu. Aisye atĩĩ: “Mamũthĩnyʼa ndũanĩ ĩmwe, kĩai mũthi ĩngĩ; nũndũ nĩ wʼo nĩngũmwĩa kana mũikakomanyʼa nongi ndũa syonthe sya Isilaeli Mwana wa mũndũ atavikĩte.”—Mathayo 10:23.

Ndeto ila Yesũ watavisye atũmwa make 12 syaĩ sya kwĩkĩa vinya mũno! Maũndũ ala wamatavisye mekae me ũtavanyʼanĩ, na mokanyʼo ala wamanengie ĩũlũ wa wĩa woo maĩ ma vata vyũ. Nĩ ũndũ wa kwendeesya kũmanya kana ndeto isu no syakonetye ala mesaa kũendeea na wĩa wa kũtavanyʼa ĩtina wa Yesũ kũkwʼa na kũthayũũka. Ũndũ ũsu wonanĩtwʼe nesa ndetonĩ ila watavisye amanyĩwʼa make kana ‘makamenwa nĩ andũ onthe,’ ĩndĩ ti o andũ ala atũmwa matũmiwe makatavye ũvoo ĩvindanĩ yĩu. Na ũndũ ũngĩ nĩ kana vai vandũ tũsomaa Mbivilianĩ tũkona atũmwa maitwawa mbee wa makavana na asumbĩ ĩvindanĩ yĩu ĩnini matavanisye Kalilii, kana tũkasoma vandũ manenganiwe nĩ andũ ma mĩsyĩ yoo moawe.

Kwa wʼo, Yesũ aneenaa ĩũlũ wa maũndũ makekĩka ĩvinda yũkĩte yĩla watavasya atũmwa ndeto isu. Kwasũanĩa ndeto ila watavisye amanyĩwʼa make yĩla wameie kana maikakomanyʼa nongi ndũa syonthe “Mwana wa mũndũ atavikĩte.” Ndeto isu syoonanasya kana amanyĩwʼa maikamina wĩa wa kũtavanyʼa ĩũlũ wa Ũsumbĩ wa Ngai, Yesũ Klĩsto, ũla yu nĩ Mũsumbĩ, atokĩte ta mũsili wa Ngai.

Atũmwa mayaaĩle kũsengʼa mavĩngwa me wĩanĩ woo wa kũtavanyʼa nĩkwĩthĩwa Yesũ ameie atĩĩ: “Mũmanyĩwʼa ti mũnene kwĩ mũmanyĩsya wake, o na ngombo ti nene kwĩ vwana wayo.” Ndeto isu sya Yesũ syaĩ sya wʼo ki. We mwene nĩwaneeneiwe naĩ na avĩngwa nũndũ wa kũtavanyʼa ũvoo mũseo wa Ũsumbĩ, na nowʼo kwesaa kwĩthĩwa kũilyĩ kwa amanyĩwʼa make. Ĩndĩ o na ũu wĩ o vo, Yesũ ameie atĩĩ: “Mũikamakĩe ala moaaa mwĩĩ ĩndĩ maitonya kũaa thayũ; vandũ va ũu, mũkĩei ũla ũtonya kwananga thayũ o vamwe na mwĩĩ Ngienanĩ.”—Mathayo 10:24, 28.

Yesũ aĩ ngelekanyʼo nzeo ũndũnĩ ũsu. Ate na wia, nĩwoomĩĩisye kũkwʼa kĩkwʼũ kĩ woo vandũ va kwĩtĩkĩlya andũ matume ethĩwa ate mũĩkĩĩku kwa mwene vinya wʼonthe, Yeova. No Ngai Mwene Vinya Wʼonthe ũtonya kwananga “thayũ” wa mũndũ (wĩkwatyo wake wa kwĩthĩwa thayũ ĩvinda yũkĩte) kana ũtonya kũthayũũkya mũndũ atanĩe kwĩkala tene na tene. No nginya ũndũ ũsu wĩthĩwe weekĩie atũmwa vinya mũno!

Yesũ nĩwasyokie aelesya ũndũ aatĩĩi make methĩawa me andũ ma vata methonĩ ma Ngai. Aisye atĩĩ: “Tũsũni twĩlĩ tũitesawa ĩsendi o yĩmwe? Ĩndĩ vaiĩ kamwe katwʼo kakavalũka nthĩ Ĩthe wenyu atesĩ. . . . Kwoou mũikethĩwe na wia; mwĩ ma vata mũno kwĩ tũsũni twingĩ.”—Mathayo 10:29, 31.

Ũvoo ũla amanyĩwʼa matavanasya nĩwesaa kũaanyʼa andũ ma mũsyĩ, amwe mawĩtĩkĩle na angĩ maiũlea. Ũu nĩwʼo nũndũ Yesũ aisye: “Mũikasũanĩe kana nookie kũete mũuo kũũ nthĩ.” Kwa wʼo, no nginya mũndũ ethĩwe na ũkũmbaũ nĩ kana ende ũwʼo wa Mbivilia o na ethĩwa andũ angĩ ma mũsyĩ maiwendete. Nĩkyo kĩtumi Yesũ waisye atĩĩ: “Mũndũ o na wĩva ũla wendaa ĩthe kana inyia kwĩ nyie ndambaĩle; na mũndũ o na wĩva ũla wendaa mwana kana mwĩĩtu wake kwĩ nyie ndambaĩle.”—Mathayo 10:34, 37.

Ĩndĩ andũ amwe maĩ metĩkĩle ũvoo ũla amanyĩwʼa matavanasya. Yesũ aisye: “Mũndũ o na wĩva ũla ũnengae ũmwe wa aa anini kĩkombe kya kĩwʼũ kĩthithu anywʼe nũndũ ũsu nĩ mũmanyĩwʼa, nĩmũtavya wʼo kana ndakasya ĩtuvi yake nongi.”—Mathayo 10:42.

Atũmwa nĩmoombanĩtwʼe nesa nĩ Yesũ kwa kũmanyĩwʼa ũndũ meũthi kũneena na andũ ũtavanyʼanĩ, na kũnengwa motao na kwĩkĩwa vinya, na kwoou nĩmaendie mesĩle “kĩsionĩ na motũinĩ, maitavanyʼa ũvoo mũseo na kũvosya andũ kĩla vandũ.”—Luka 9:6.