Yoana Mũvatisi Nĩwooaiwe Mũthenya wa Kũtanĩa Kũsyawa kwa Elote

Atũmwa ma Yesũ o maendeee na kũtavanyʼa kĩsionĩ kya Kalilii, Yoana mũvatisi, ũla watavisye andũ ĩũlũ wa kũka kwa Yesũ, ndaĩ na ũthasyo wa kũtavanyʼa. Yoana eethĩĩtwe e mwove kwa ĩvinda ya vakuvĩ myaka ĩlĩ.

Yoana nĩwamũtavĩtye ũtheinĩ Mũsumbĩ Elote Andiva kana nĩ ũthũku kwosa kĩveti kya mwana-a-ĩthe Vilivu, kĩla kyeetawa Elotia, kĩthĩwe kyake. Elote nĩwaekanĩte na kĩveti kyake kya mbee nĩ kana atwae Elotia. O na kau Elote aasya nũatĩĩaa Mĩao ya Mose, ũndũ ũla weekie waĩ kĩvathũkanyʼo nayo nũndũ mĩao ĩsu yoonanĩtye kana mũndũ kwosa kĩveti kyeene ti ũndũ waĩle na nĩkwĩka ũlaalai. Nũndũ wa ũkanyʼo ũsu Yoana wamũnengie, Elote nĩwaumisye mwĩao Yoana ekwʼe yela, na nĩvatonyeka Elotia akethĩwa nowe wamũkũlĩtye eke ũu.

Elote ndeesĩ ũndũ ũtonya kwĩkana na Yoana nũndũ andũ ‘mamwonaa ta mwathani.’ (Mathayo 14:5) Ĩndĩ Elotia nĩweesĩ ũndũ ũkwenda kwĩkana na Yoana. “Nĩwamwĩwʼĩaa [Yoana] woo ngoonĩ,” na nĩwamanthaa ũndũ ũtonya kũmũaa. (Maliko 6:19) Ĩtina wa ĩvinda, mwanya nĩwaumĩlile wa kũmũaa Yoana.

Ĩvinda ĩnini Vasaka ya mwaka wa 32 ĩtanavika, Elote nĩwavangie kũtanĩa mũthenya wake wa kũsyawa. Andũ anene onthe ma Elote na anene ma ita, vamwe na andũ me nguma mũno ma Kalilii nĩmoombanie kwondũ wa mboka ĩsu. Ĩvindanĩ yĩu, Salome, mwĩĩtu ũla wasyaĩtwe nĩ Elotia na mũũme wake Vilivu, nĩwookie kũsũngĩa aeni. Andũ asu nĩmendeeiwʼe mũno nĩ ũndũ mwĩĩtu ũsu wasũngie.

Nĩkwĩthĩwa o nake Elote nĩwendeeiwʼe nĩ ũndũ Salome wasũngie, amwĩie atĩĩ: “Mbĩtye kĩla ũkwenda, na nĩngũũnenga.” O na nĩwamwĩvĩtĩe amwĩa: “Kĩndũ o na kĩva kĩla ũũmbĩtya nĩngũũnenga, o na ethĩwa nĩ nusu ya ũsumbĩ wakwa.” Salome atanamba kũsũngĩa mũsumbĩ, ambie kumaala na athi kũkũlya inyia wake: “Naĩle kũmwĩtya kyaũ?”—Maliko 6:22-24.

Mwanya ũla Elotia wamanthaa mũno nĩwaumĩlile! Ate kwananga ĩvinda asũngĩie mwĩĩtu wake amwĩa: “Mũtwe wa Yoana Mũvatisi.” Salome nĩwasyokie na mĩtũkĩ vala ve Elote na amwĩa: “Nĩenda ũnenge oyu mũtwe wa Yoana Mũvatisi wĩ ĩsaaninĩ.”—Maliko 6:24, 25.

Ũndũ ũsu nĩwaũmĩisye Elote mũno, ĩndĩ vai ũndũ waĩ eka nũndũ aeni make nĩmeewie aimwĩvĩtĩa Salome. Aĩ no nginya eanĩsye ũndũ wathanie nĩ kana ndakeyĩkĩĩthye nthoni, o na ethĩwa kwĩka ũu kwesaa kũtuma oaa mũndũ ũte na ĩvĩtyo. Kwoou, Elote nĩwatũmie mũsungi yela akeke kĩla mwĩĩtu wa Elotia wakũlĩtye. Ĩtina wa ndatĩka nini mũsungi nĩwasyokie akuĩte mũtwe wa Yoana wĩ ĩsaaninĩ. Nĩwanengie Salome mũtwe ũsu, nake Salome amũtwaĩa inyia wake.

Yĩla amanyĩwʼa ma Yoana meewie kĩla kyeethĩiwe, nĩmaendie moosa mwĩĩ wa Yoana na maũthika. Na ĩndĩ mathi kũmũtavya Yesũ ũndũ ũsu.

Ĩtina, yĩla Elote weewie ũvoo wa kana Yesũ nũkũvosya andũ na kumya ndaimoni, nĩwathĩnĩkie mũno. Endaa kũmanya kana mũndũ ũsu ũkwĩka maũndũ asu nĩwĩthĩwa ne Yoana Mũvatisi ‘ũthayũũkiwʼe.’ (Luka 9:7) Kwoou, Elote Andiva nĩwendaa mũno kũmwona Yesũ. Ti kwĩthĩwa endaa kwĩwʼa Yesũ aitavanyʼa, vandũ va ũu Elote endaa kwona Yesũ nĩ kana aĩkĩĩthye kana maũndũ ala wasũanĩaa maĩ ma wʼo kana ti ma wʼo.