Tũmĩaa Ũĩ Kũvanga Maũndũ Maku Tene

Ngelekanyʼo ĩla Yesũ waĩ anamina kũnengane ĩũlũ wa ũla mwana waĩ mwau no nginya yĩthĩwe yaĩ ya kwendeesya mũno kwa aumĩthya ma koti, aandĩki, na Avalisi ala mamwĩthukĩĩsye nũndũ nĩmamanyie kana Ngai nũekeaa eki ma naĩ ala meelila. (Luka 15:1-7, 11) Ĩtina wa kũnengane ngelekanyʼo ĩsu Yesũ nĩwambĩĩie kũneena na amanyĩwʼa make. Nĩwamaeleisye ngelekanyʼo ĩngĩ ĩũlũ wa mũndũ ũmwe waĩ mũthwii ũla wamanyie kana mũũngamĩi wa nyũmba yake nĩwĩkĩte maũndũ mataĩle.

Ngelekanyʼonĩ ĩsu nĩwaeleisye kana mũũngamĩi ũsu nĩwasikatiwe nũndũ wa kwananga syĩndũ sya vwana wake. Nũndũ wa ũu, mũũngamĩi ũsu nĩwataviwʼe nĩ vwana wake kana nũkũvutwa wĩanĩ. Nĩvo ĩndĩ mũũngamĩi ũsu wasũanĩie ũũ: “Yu nĩĩka ata, nũndũ vwana wakwa nũkũmbumya wĩanĩ wa ũũngamĩi? Na ndi na vinya wa kũsimba, na nĩngwĩwʼa nthoni kũthi ndivoya syĩndũ?” O aendeee kũvanga ũndũ ũkwĩka aisye atĩĩ: “Nĩnamanya ũndũ ngwĩka, nĩ kana naumwʼa wĩanĩ wa ũũngamĩi, andũ manthokye mĩsyĩ kwoo.” Na ĩndĩ eeta kĩla mũndũ wataĩtwe nĩ vwana wake, aimũkũlya atĩĩ: “We ũtaĩtwe kyaũ nĩ vwana wakwa?”—Luka 16:3-5.

Wa mbee amũsũngĩie amwĩa: “Ithimo ĩana sya mauta ma mũthata.” Kĩthimo kĩu kĩanene na lita 2,200 sya mauta. Nĩvatonyeka ũkethĩa mũndũ ũsu wataĩtwe aĩ na mũũnda mũnene wa mĩthata kana akethĩwa aĩ mũkũni wa viasala mũnene wa mauta. Mũũngamĩi ũsu amwĩie: “Osa valũa ũla ũandĩkĩtwe kĩla ũtaĩtwe na ũyĩkala nthĩ ũandĩke na mĩtũkĩ 50.”—Luka 16:6.

Mũũngamĩi ũsu asyokie amũkũlya ũngĩ atĩĩ: “Naku we ũtaĩtwe kyaũ?” Ũsu nake asya, “Ithimo nene ĩana sya nganũ.” Na ĩndĩ amwĩa, “Osa valũa ũla ũandĩkĩtwe kĩla ũtaĩtwe na ũiandĩka 80.” Kwoou nĩwamũolile ithimo 20.—Luka 16:7.

Nũndũ mũndũ ũsu nowe waũngamĩe maũndũ ala makonetye mbesa sya vwana wake no twasye aĩ na ũkũmũ wa kũola ithimo ila vwana wake wataĩte andũ asu. Mũũngamĩi ũsu nĩwambĩĩisye ũnyanya na andũ ala wamaolile kĩla mataĩtwe nũndũ nĩweesĩ no mamũtethye mũno ĩtina wa kũvutwa.

Vwana wake nĩwesie kũmanya kĩla kyaendeeie. O na kũtwʼĩka maũndũ ala mũũngamĩi ũsu weekie maĩ matonya kũmũetee wasyo, vwana wake nĩwendeeiwʼe nĩ kĩla weekie o na nĩwamũkathie nũndũ “o na vala ndaĩ mũlũngalu,” mũũngamĩi ũsu “nĩweekie maũndũ kwa ũĩ.” Yesũ ongelile kwasya: “Ana ma ĩvinda yĩĩ nĩmatũmĩaa ũĩ kwelekela andũ ma nzyawa yoo kwĩ ana ma kyeni.”—Luka 16:8.

Ngelekanyʼonĩ ĩsu Yesũ ndoonanasya kana nĩwendeeiwʼe nĩ maũndũ ala mũũngamĩi ũsu weekie kana nĩwakwataa mbau viasala wa ũvenani. Kwoou amanyĩasya kyaũ? Eekĩie amanyĩwʼa make vinya kwa kũmea atĩĩ: “Ĩmanthĩei anyanya mũitũmĩa ũthwii ũte wa ũlũngalu, nĩ kana yĩla wĩthela, mamũthokye mawĩkalonĩ moo ma tene na tene.” (Luka 16:9) Ngelekanyʼo ĩsu ĩmanyĩasya kana mũndũ nĩwaĩle kwĩthĩwa ene mbee na aitũmĩaa ũĩ. Athũkũmi ma Ngai, kana “ana ma kyeni,” nĩmaĩle kũtũmĩa syĩndũ ila me nasyo kwa ũĩ masũanĩĩte thayũ wa tene na tene wa ĩvinda yũkĩte.

No Yeova Ngai na Mwana wake matonya kũthokya mũndũ Ũsumbĩnĩ wa ĩtu kana kũmũthokya nthĩnĩ wa Nthĩ Nzaũ ungu wa Ũsumbĩ ũsu. Nĩtwaĩle kwĩkĩa kĩthito twĩthĩwe na ũnyanya namo kwa kũtũmĩa ũthwii kana syĩndũ sya kĩ-mwĩĩ ila twĩ nasyo tũkwate mbau maũndũ ma Ũsumbĩ. Tweeka ũu, tũikethĩwa na nzika kana maũndũ maitũ makethĩwa me maseo ĩvinda yũkĩte yĩla thaavu, vetha, na mothwii angĩ makathela.

O na ĩngĩ Yesũ nĩwaisye kana ala methĩawa me aĩkĩĩku maisũvĩa ũthwii kana syĩndũ sya kĩ-mwĩĩ makeethĩwa me aĩkĩĩku maũndũnĩ angĩ manene na ma vata. Nĩkyo kĩtumi Yesũ waisye: “Ethĩwa mũi aĩkĩĩku maũndũnĩ makonetye ũthwii ũte wa ũlũngalu, nũũ ũla ũkamũnenga ũthwii ũla wa wʼo [ta maũndũ ma Ũsumbĩ]?”—Luka 16:11.

Yesũ oonasya amanyĩwʼa make kana ve maũndũ maingĩ maaĩle kwĩanĩsya ethĩwa nĩmekwenda kũthokwʼa “mawĩkalonĩ moo ma tene na tene.” Mũndũ ndesa kũtwʼĩka mũthũkũmi wa wʼo wa Ngai na ĩvindanĩ o yĩu ayĩthĩwa e ngombo ya ũthwii ũte wa ũlũngalu. Yesũ aminĩĩie atĩĩ: “Vaiĩ mũthũkũmi ũtonya kwĩthĩwa e ngombo ya mavwana elĩ, nũndũ akamũmena ũmwe na aimwenda ũla ũngĩ, kana akalũmanyʼa na ũmwe na aimũmena ũla ũngĩ. Mũitonya kwĩthĩwa mwĩ ngombo sya Ngai na sya Ũthwii.”—Luka 16:9, 13.