Yesũ Nĩwamanyĩisye Kĩsionĩ kya Velea Aendete Yutia

Yesũ aĩ ekalĩte vandũ vetawa Velea ‘mũingo wa Yolotani.’ (Yoana 10:40) Ĩtina wa ũu nĩwaendie ngalĩko ya ĩtheo elekele Yelusaleme.

Ĩvinda yĩu Yesũ ndaĩ weka. Aendanĩtye na amanyĩwʼa make, o vamwe na “ĩkomano ĩnene” na aumĩthya ma koti na eki ma naĩ. (Luka 14:25; 15:1) O namo Avalisi na aandĩki, ala maneeneaa naĩ maũndũ ala Yesũ waneenaa na kwĩka, maĩ o vo. Maĩ na maũndũ maingĩ ma kũsũanĩa ĩtina wa kwĩwʼa ngelekanyʼo ya Yesũ ĩũlũ wa yĩla ĩlondu yaĩ yau, ũla mwana waaĩte, na ũla mũndũ mũthwii na Lasalo.—Luka 15:2; 16:14.

Nĩvatonyeka ũkethĩa Yesũ no wasũanĩĩte maũndũ mana ma kũmũvũthĩĩsya ala maneenawa nĩ avĩnganĩsya make, na kwoou nĩwatwie kũneena na amanyĩwʼa make. Awetie maũndũ amwe wamanyĩĩtye e Kalilii.

Kwa ngelekanyʼo Yesũ aisye: “Molulutĩkyo mailea kwĩthĩwa vo. Ĩndĩ kyeva nĩ kwa ũla kwĩsĩla kwake mokaa! . . . Ĩsũvĩei inywʼĩ ene. Ethĩwa mwana-a-asa waku nĩweeka naĩ, mũkanyʼe, na eelila, mũekee. O na akũvĩtĩsya mavinda mũonza kwa mũthenya na ayũka kũla ũĩ mavinda mũonza na aikwĩa, ‘Nĩneelila,’ no nginya ũmũekee.” (Luka 17:1-4) Ndeto isu Yesũ wawetie mũthya nitonya kwĩthĩwa syalilikanilye Vetelo ĩkũlyo yĩla wakũlĩtye ĩũlũ wa kũekea mavinda mũonza.—Mathayo 18:21.

Mo amanyĩwʼa maĩ matonya kwĩka ũndũ Yesũ wamatavisye? Amanyĩwʼa mamwĩie Yesũ atĩĩ: “Twongeleele mũĩkĩĩo.” Nake amea: “Ta kethĩwa mwĩ na mũĩkĩĩo wĩana mbeũ ya kalatali, no mwĩe kĩtae kĩĩ, ‘Kũka vau ũthi ũkavandwe ũkanganĩ!’ na kĩimwĩwʼa.” (Luka 17:5, 6) Ũu wĩonanyʼa kana o na mũĩkĩĩo mũnini no wĩanĩsye maũndũ manene.

Yesũ nĩwaendeeie kũmamayĩsya ĩũlũ wa vata wa kwĩthĩwa na wĩnyivyo na kwĩthĩwa na woni waĩlĩte. Eeie atũmwa make atĩĩ: “Nũũ katĩ wenyu e na ngombo ĩkũĩma na mũlaũ kana ĩkũĩthya, ũtonya kũmĩtavya yauma mũũndanĩ, ‘Ũka vaa mĩtũkĩ wĩkale mesanĩ ũye’? Vandũ va ũu, amĩtavya atĩĩ: ‘Nzeũvĩsye lĩu wa wĩoo, na ũyĩkĩa ngũa sya wĩa ũnthũkũme nginya nĩmine kũya na kũnywʼa, na ĩtina wa ũu no wĩkale nthĩ ũye na ũinywʼa.’ Na o na kũtwʼĩka ngombo ĩsu nĩyatethya wĩa ũla yanengwa, we ndemĩtũngĩa mũvea, kana no eke ũu? O ta ũu, yĩla mwatethya wĩa wʼonthe ũla mũnengetwe, asyai: ‘Twĩ ngombo ite vata. Tweeka o kĩla twĩĩaĩle kwĩka.’”—Luka 17:7-10.

Athũkũmi onthe ma Ngai maĩlĩte kũelewa vata wa kwiaa maũndũ ma kĩ-veva mbee. O na ĩngĩ kĩla ũmwe aĩlĩte kũlilikana kana nĩ kĩanda kya mwanya kũmũthaitha Ngai e ũmwe wa andũ ma nyũmba yake.

Nĩvatonyeka ũkethĩa ĩvinda yĩu nĩwʼo mũndũ ũla watũmĩtwe nĩ Meli na Matha kũla kwĩ Yesũ wavikie. Meli na Matha maĩ eĩtu-a-inyia ma Lasalo na mekalaa Vethania ya Yutia. Mũndũ ũsu watũmĩtwe aisye: “Mwĩaĩi, sisya! mũndũ ũla ũmwendete nĩ mũwau.”—Yoana 11:1-3.

O na kau Yesũ nĩwamanyie kana mũnyanyae Lasalo aĩ mũwau mũno, we ndaaemeewa nĩ kyeva. Vandũ va ũu aisye: “Mũminũkĩlyo wa ũwau ũsu ti kĩkwʼũ, ĩndĩ ũwau ũsu wĩthĩiwe nĩ kana Ngai ataĩwe, na nĩ kana Mwana wa Ngai o nake ataĩwe.” Ekalile vau vandũ va mĩthenya ĩlĩ na ĩndĩ eea amanyĩwʼa make atĩĩ: “Tũsyokei Yutia.” Namo amanyĩwʼa make mambĩĩa kũlea makĩmwĩa: “Lavai, o mĩtũkĩ andũ ma Yutia nĩmanendaa kũũkimanga na mavia, yu we wĩenda tũsyoke kwʼo?”—Yoana 11:4, 7, 8.

Nake Yesũ amasũngĩa: “Mũthenya wĩthĩawa na masaa 12, kana ti wʼo? Ethĩwa mũndũ o na wĩva aendaa mũthenya, ndatulawʼa nĩ kĩndũ, nũndũ nĩwonaa kyeni kya nthĩ ĩno. Ĩndĩ ethĩwa mũndũ o na wĩva aendaa ũtukũ, nũtulawʼa, nũndũ nde na kyeni nthĩnĩ wake.” (Yoana 11:9, 10) Yesũ nũtonya kwĩthĩwa oonanasya kana ĩvinda yĩla Ngai wanyuvĩte ya ũtavanyʼa wake yĩyaĩ ĩthelu. Kwoou yaĩ no nginya Yesũ atũmĩe nesa ĩvinda ĩkuvĩ yĩla yatiele.

1Yesũ asyokie asya: “Lasalo mũnyanyae witũ nũkomete, ĩndĩ nĩngũthi kũu ngamũamũkye.” Na nũndũ amanyĩwʼa make nĩmatonya kwĩthĩwa masũanĩaa kana Lasalo ekĩte kũthũmũa na kana nũkwĩwʼa nesa, mamwĩa: “Mwĩaĩi, ethĩwa nũkomete nũkwĩwʼa nesa.” Nĩvo Yesũ wamatavisye ũtheinĩ, amea: “Lasalo nĩ mũkwʼũ . . . Ĩndĩ ekai tũthi vala ũĩ.”—Yoana 11:11-15.

Nũndũ Thoma asũanĩaa Yesũ athi Yutia nũtonya kũaĩwa kwʼo, na nĩwendaa kũmũkwata mbau, eeie amanyĩwʼa ala angĩ atĩĩ: “O naitũ tũthi, nĩ kana tũkakwʼe vamwe nake.”—Yoana 11:16.