Ngai E Na Kĩeleelo Kyaũ Kwondũ Witũ?

ĨLA wasoma makaseti, wasisya televiseni, kana weethukĩĩsya letiũ, nĩwonaa na ũkewʼa ũvoo mwingĩ wa ũtũli wa mĩao, kaũ, na ũngʼendu. O naku mwene no wĩthĩwe ũithĩna nũndũ wa ũwau, kana kũkwʼĩĩwa nĩ mũndũ wendete.

Ĩkũlye atĩĩ:

• Yo Ngai endaa nyie na mũsyĩ wakwa twĩthĩwe na mathĩna ta asu?

• Ndonya ũkwata ũtethyo va wa kũmĩanĩsya na mathĩna?

• Ve ĩvinda kũkethĩwa na mũuo?

Mbivilia nĩtũnengete mosũngĩo maseo ma makũlyo asu.

MBIVILIA ĨMANYĨASYA KANA NGAI AKEEKA MAŨNDŨ MA ŨSENGYʼA ĨŨLŨ WA NTHĨ.

• Andũ maikewʼaa woo, maikakũaa, kana kũkwʼa.—Ũvuanʼyo 21:4

• ‘Mũndũ ũthuaa akatũlĩla ta ndaatai nũme.’—Isaia 35:6

• ‘Metho ma ililinda makasalukwʼa.’—Isaia 35:5

• Akwʼũ makathayũũkwʼa.—Yoana 5:28, 29

• Vai mũndũ ũkawaa. —Isaia 33:24

• Kĩla mũndũ ĩũlũ wa nthĩ akeethĩwa na lĩu wĩanĩtye. —Savuli 72:16

  

TETHEKA KUMANA NA KĨLA MBIVILIA ĨMANYĨASYA

Nĩ laisi kũsũanĩa kana maũndũ ala wasoma no ndoto itakeanĩa. Ĩndĩ Ngai nĩwathanĩte kwĩka moalyũku asu ĩũlũ wa nthĩ o mĩtũkĩ, na Mbivilia nĩeleetye ũndũ ũkeka ũu.

Mbivilia yĩ na maũndũ angĩ maingĩ. Nĩtũtavasya kĩla twaĩle kũmanya nĩ kana twĩthĩwe na ũtanu wa wʼo na tũitanĩa thayũ. Kwasũanĩa ĩũlũ wa maũndũ ala matumaa wĩmakĩa. Amwe ma maũndũ asu nĩ ta mathĩna ma mbesa, mathĩna ma mũsyĩ, mowau, kana kũkwʼĩĩwa nĩ mũndũ wendete. Mbivilia nĩtonya kũũtetheesya ũmĩanĩsye na mathĩna asu, na nĩtonya kũũkiakisya kwa kũkwonyʼa mosũngĩo ma makũlyo ta aa:

• Nĩkĩ tũthĩnaa?

• Tũtonya kũmĩanĩsya na mathĩna ata?

• Mĩsyĩ yitũ no yĩthĩwe na ũtanu?

• Kwĩthĩawa ata ĩla andũ makwʼa?

• Tũkamona ĩngĩ endwa maitũ ala makwie?

• Nĩ kyaũ kĩtonya kũtũĩkĩĩthya kana Ngai akeeka kyonthe kĩla wathanĩte?

Kwĩmanyĩsya ĩvuku yĩĩ kwĩonanyʼa kana nũkwenda kũmanya kĩla Mbivilia ĩmanyĩasya. Ĩvuku yĩĩ nĩyĩũkũtethya. Yĩ na ilungu na makũlyo matonya ũkũtetheesya ũelewe Mbivilia nesa. Andũ milioni mbingĩ nĩmatanĩĩte kwĩmanyĩsya Mbivilia na Ngũsĩ sya Yeova. Twĩĩkwatya o naku nũũtanĩa. Ngai nakũathime ĩla ũendeee kũmanya kĩla Mbivilia ĩmanyĩasya!