Atamu na Eva Nĩmaleile Kũmwĩwʼa Ngai

Mũthenya ũmwe Eva e vandũ e weka nĩwoonie nzoka ĩimũneenyʼa. Yamũkũlilye: ‘Nĩ wʼo kana Ngai nũmũvatĩte kũya matunda ma mĩtĩ yonthe?’ Nake Eva amĩsũngĩa atĩĩ: ‘No tũye matunda ma mĩtĩ yonthe ate o ma mũtĩ o ũmwe. Na kĩtumi nũndũ tũkatata kũya matunda ma mũtĩ ũsu no tũkwʼe.’ Ĩndĩ nzoka yasyoka yamwĩa atĩĩ: ‘Mũikwʼa. O na mwaya matunda ma mũtĩ ũsu mwĩĩkala ta Ngai.’ Yo nzoka ĩsu yaneenaa wʼo? Aiee, ũsu waĩ ũvũngũ. Ĩndĩ Eva nĩwaĩkĩĩie ndeto isu. O ũndũ waendeeie kũsyaĩĩsya ĩtunda yĩu nowʼo waendeeie kũyenda. Na nũndũ wa ũu, atwʼa aya na atwaĩa Atamu. Atamu nĩweesĩ kana malea kũmwĩwʼa Ngai nĩmeũkwʼa. Ĩndĩ o esĩ ũu o nake ayĩya.

Mũthenya ũsu ĩ ya mawĩoo Yeova nĩwaneenie na Atamu na Eva. Amakũlilye nĩkĩ mekie kĩla wamavatĩte. Amakũlya, Atamu aisye nĩ Eva ũtumie mavĩtya, nake Eva asya nĩ nzoka. Ĩvĩtyo yĩu nĩyatumie Yeova amalũngya mũũndanĩ wa Eteni. Na nĩ kana amasiĩĩe maikaasyoke vo, nĩwaiie alaĩka na ũvyũ wa mwaki weethyũũaa ngalĩ syonthe nzĩanĩ ya kũlika mũũndanĩ ũsu.

Yeova aisye kana ũla wakengie Eva o nake akasilĩlwa. Ndeto ila nzoka yatavisye Eva iyaĩ syayo. O na Yeova ndoombĩte nzoka syĩ na ũtonyi wa kũneena. Ve mũlaĩka mũthũku ũla watumie nzoka ĩsu ĩneena. Mũlaĩka ũsu atũmĩie nzoka kũneena na Eva nĩ kana amũkenge evithanĩtye. Mũlaĩka ũsu etawa Satani ũla Ndevili. Ĩvindanĩ yũkĩte Yeova akaananga Satani nĩ kana aeke kũkenga andũ meke maũndũ mathũku.