Ĩngʼoi ya Mbalaamu Nĩyaneenie

Aisilaeli nĩmekalĩte weũnĩ vakuvĩ myaka 40. Me kũu nĩmasindĩte ndũa mbingĩ na syaĩ na vinya mwingĩ. Na ĩndĩ nĩmambie kambi kĩsionĩ kya Moavi kĩla kĩ ngalĩko ya wumĩlonĩ wa syũa ya Ũsĩ wa Yolotani. Ĩvindanĩ yĩu maĩ vakuvĩ kũlika Nthĩ ya Watho. Mũsumbĩ wa Moavi, ũla weetawa Mbalaka, aĩ na wia nũndũ oonaa ta ũkũvenwa nthĩ yake. Kwoou nĩwatũmanie mũndũ weetawa Mbalaamu athi Moavi nĩ kana akaumanĩe Aisilaeli.

Ĩndĩ Yeova eeie Mbalaamu atĩĩ: ‘Ndũkaumanĩe Aisilaeli.’ Kwoou Mbalaamu ndaathi. Ĩndĩ Mũsumbĩ Mbalaka nĩwamwĩtie ĩvinda ya kelĩ na amwatha kũmũnenga kyonthe kĩla ũkũmwĩtya. O na ũu wĩ o vo, Mbalaamu nĩwaleile. Ĩtina wa ũu Ngai eeie Mbalaamu atĩĩ: ‘No ũthi ĩndĩ ũkaneena o kĩla ngaũtavya.’

Kwoou Mbalaamu nĩwoosie ĩngʼoi yake na athi Moavi, ĩla yaĩ ngalĩko ya ĩtheo. Nĩwavangĩte kũumanĩa Aisilaeli o na kau Yeova nĩwamũvatĩte. E nzĩanĩ, mũlaĩka wa Yeova nĩwamumĩlĩĩle mavinda atatũ. Mbalaamu ndoonaa mũlaĩka ũsu, ĩndĩ ĩngʼoi yake nĩyamwonaa. Yĩla ĩngʼoi yoonie mũlaĩka ĩvinda ya mbee, nĩyeelelũkile yalika kĩthekanĩ. Na ĩndĩ yĩla ĩngʼoi yĩu yoonie mũlaĩka ĩngĩ, nĩyaendie vakuvĩ na ũkũta na yathianyʼa kũũ kwa Mbalaamu ũkũtanĩ ũsu. Mũthya ĩngʼoi yĩu yesie kũtindia nzĩanĩ katĩ. Ĩvinda yonthe yĩla ĩngʼoi yĩu yeekaa maũndũ asu, Mbalaamu ayĩkũnaa na ndata ĩla wakwete.

Yĩla Mbalaamu wakũnie ĩngʼoi ĩvinda ya katatũ, Yeova nĩwatumie yĩneena. Yamũkũlilye Mbalaamu atĩĩ: ‘Nĩkĩ ũtindĩie kũngũna?’ Nake Mbalaamu ayĩsũngĩa: ‘Wĩona nĩ mũtumanu mũno. Keka nĩ na ũvyũ ndiema ũkũaa.’ Nayo ĩngʼoi yĩu yamwĩa atĩĩ: ‘Nĩthĩĩtwe ndiũkua kwa myaka mingĩ. Ve mũthenya ũmwe naakwĩka ũu?’

Yeova nĩwesie kũtuma Mbalaamu ona mũlaĩka ũsu. Mũlaĩka ũsu amwĩie atĩĩ: ‘Yeova nũnakũvatie kũumanĩa Aisilaeli.’ Nake Mbalaamu amũsũngĩa: ‘Nĩnĩvĩtisye. Nĩngũsyoka mũsyĩ.’ Nake mũlaĩka amwĩa: ‘No ũthi Moavi, ĩndĩ wĩthi kũneena o kĩla Yeova ũkũũtavya.’

We Mbalaamu ve kĩndũ weemanyĩisye kumana na maũndũ asu? Aiee. Yĩla waendie Moavi, nĩwatatie mavinda atatũ kũumanĩa Aisilaeli, ĩndĩ mavinda asu onthe Yeova atumaa amaathima vandũ va kũmaumanĩa. Ĩtina wa ĩvinda, Aisilaeli nĩmavithũkĩie Moavi, na Mbalaamu ooawa. We wĩona Mbalaamu ta wĩthĩwa akwatiwe nĩ mathĩna asu onthe keka nĩweethukĩĩisye kĩla Yeova wamũtavĩtye?