Ndeto sya Mwambĩĩo

Ĩvuku Maandĩko Matonya Kwaĩlya Mwĩkalĩle wa Mũklĩsto nĩyĩũkũtetheesya wĩthĩe nĩ laisi kwaku kũkwata maandĩko Mbivilianĩ na ngewa itonya kũũtetheesya ũmĩanĩsye na mawetu ala ũtonya kũkomana namo thayũnĩ. O na ĩngĩ, ĩvukunĩ yĩĩ nũũkwata ũvoo mwingĩ ũtonya kũũtetheesya wĩkĩe angĩ vinya na ũimatetheesya meke motwi meũmũtaĩa Yeova. Kĩla ũkekaa no kũmantha kyongo kĩla ũkwenda, na ĩndĩ ũisisya makũlyo vamwe na maelesyo makuvĩ ma ngewa syĩ Mbivilianĩ ala me ungu wa kyongo kĩu. (Sisya ĩsandũkũ yĩ na kyongo “Ũndũ Ũtonya Kũtũmĩa Ĩvuku Yĩĩ.”) Weeka ũu, ũkakwataa myolooto ĩtonya kũũtongoesya, ũtao ũtonya kũũtethya, na ũkiakisyo ũla Ngai ũtũnengae atũmĩĩte Ndeto yake Mbivilia. O na ĩngĩ, ũkeethĩwa ũtonya kũkwata maũndũ ma vata ũtonya kũtũmĩa kũthangaasya angĩ, kũmatetheesya yĩla me na thĩna, kũmanenga ũtao mũseo, na kũmekĩa vinya.

Ũndũ Ũtonya Kũtũmĩa Ĩvuku Yĩĩ

Nĩ kana ũkwate kyongo kĩla ũkwenda na mĩtũkĩ, syongo syĩ kĩvathũkanyʼo ila syĩ nthĩnĩ wa ĩvuku Maandĩko Matonya Kwaĩlya Mwĩkalĩle wa Mũklĩsto, ivangĩtwe iatĩanĩe kwosana na nthoo ĩla yĩ mwambĩĩonĩ wa kĩla kyongo. O na ĩngĩ, syongo isu niaanĩtwʼe nthĩnĩ wa ilungu mũonza kwosana na kĩla iũneenea. Ilungu isu nĩ Mawetu, Mwĩkalĩle, Kĩkundi kya Kĩklĩsto, Maũndũ Ala Twĩkaa Kĩla Mũthenya, Mũsyĩ, Ngwatanĩo Yitũ na Yeova, na Nguma Sitũ. Syongo mbingĩ ũkasyĩthĩaa nthĩnĩ wa kĩlungu kĩmwe katĩ wa isu. Ũitũmĩa ĩvuku yĩla yĩ simũnĩ, ũkatinaa kĩlungu kĩla ũkwenda nĩ kenda syongo ila syĩ ungu wakyo ivingũke. Ĩndĩ ethĩwa ndwĩsĩ nesa kyongo kĩla ũkwenda kĩ ungu wa kĩlungu kĩva, no ũthi vala vonanĩtye Syongo Syonthe na ĩndĩ ũimantha kĩla ũkwenda. Ungu wa kĩla kyongo, ũkeethĩaa syongo ingĩ nini iandĩkĩtwe na langi mũkwatu. Syongo imwe nini nĩ makũlyo na ingĩ nĩ maelesyo. Yĩla ũũsoma maandĩko ala maandĩkĩtwe na langi mũkwatu ĩtheo wa syongo isu nini, sũanĩa na ũivindĩĩsya ũndũ makwete mbau maelesyo kana makasũngĩa makũlyo ala me syongonĩ isu nini. Kũndũ kũmwe ũkeethĩaa kyongo kĩmwe kĩaanĩtwʼe nthĩnĩ wa tũlungu tũnini twa kũũtetheesya kũmantha na mĩtũkĩ kĩla ũkwenda. Mavinda amwe ũkeethĩaa ndeto “O na ĩngĩ sisya” iatĩĩwe nĩ mĩsoa kauta. Mĩsoa ĩsu nĩwetete maũndũ angĩ makonanĩtye na kyongo kĩla kĩũneenewa. Ungu wa syongo mbingĩ, ũkeethĩaa vawetetwe “Ngewa syĩ Mbivilianĩ itonya kũũtethya.” Nthĩnĩ wa kĩla ngewa, ũkeethĩaa ĩandĩko yĩatĩĩwe nĩ maelesyo monanĩtye ũndũ ũla mũnene ũkwĩmanyĩsya. Ũisoma ĩandĩko, tũmĩa maelesyo ala monanĩtwʼe kũũtetheesya kũsũanĩa.

Ĩvuku yĩĩ yĩiwetete maandĩko onthe ala makonanĩtye na kĩla kyongo. Ĩndĩ nĩyĩũkũtetheesya mũno kwĩka ũkunĩkĩli. (Nth 2:1-6) Nĩ kana wĩmanyĩsye mũnango, tũmĩa maandĩko ala maeleetye mũnango mĩsoa ĩla ũũsoma na ũvoo wa kwongeleela ũla wĩ Mbivilianĩ ya Ũalyũlo wa Nthĩ Nzaũ wa Maandĩko Matheu. O na ĩngĩ no ũtũmĩe Ĩvuku ya Kwĩka Ũkunĩkĩli ya Ngũsĩ sya Yeova kana Fahirisi nĩ kana wĩmanyĩsye mũnango ĩũlũ wa ĩandĩko ĩna na ũndũ ũtonya kũyĩtũmĩa. Watwʼa kwĩka ũkunĩkĩli, ĩkĩĩthya kana wĩsoma ũvoo ũla wĩla kũtumbĩthwʼa nĩ kana wĩthĩwe na ũmanyi ũla wa mĩtũkĩ ĩũlũ wa Maandĩko.

Eka ĩvuku Maandĩko Matonya Kwaĩlya Mwĩkalĩle wa Mũklĩsto yĩũtetheesye kũkwata ũĩ, ũmanyi, na ũielewa nesa maũndũ ala me Maandĩkonĩ Matheu. O ũndũ ũkũendeea kũtũmĩa ĩvuku yĩĩ, nowʼo ũkũendeea kũĩkĩĩa vyũ kana “ndeto ya Ngai yĩ thayũ na yĩ ũtonyi.”—Avl 4:12.