Nĩ Andũ Onthe Ala Meyĩtaa “Aklĩsto” Methĩawa Me Aklĩsto ma Wʼo

ŨMŨNTHĨ kwĩ Aklĩsto meana ata? Ĩvuku yĩmwe yĩtawa Atlas of Global Christianity, yoonanisye kana mwaka wa 2010 kwaĩ na Aklĩsto vakuvĩ mbilioni 2.3 ĩũlũ wa nthĩ yonthe. O na ĩngĩ yasyokie yoonanyʼa kana Aklĩsto asu onthe maendaa makanisanĩ me kĩvathũkanyʼo mbee wa 41,000, na kĩla yĩmwe yĩmanyĩasya kĩvathũkanyʼo na yĩla yĩngĩ, na maatĩĩaa mĩao yĩ kĩvathũkanyʼo ya mwĩkalĩle. Ivathũkanyʼo isu syonthe sya ndĩni sya “Kĩklĩsto” nitumĩte amwe molanĩlwʼa o kana makatũlĩka ngoo. Nĩmatonya kwĩkũlya, ‘Yo onthe ala meyĩtaa Aklĩsto nĩ Aklĩsto ma wʼo?’

Kwaekai tũkunĩkĩle ũndũ ũũ kwa nzĩa yĩ kĩvathũkanyʼo. Mũndũ wĩ kyalonĩ nĩwendekaa avika mũvakanĩ aĩkĩĩthye kana we nĩ mwĩkali wa nthĩ ĩla wumĩte. O na ĩngĩ, nĩwendekaa onanyʼe syĩndũ itonya kwonanyʼa we nũũ. Syĩndũ isu nĩ ta kĩvandĩ, kana passport. O ta ũu, Mũklĩsto wa wʼo nĩwaĩle kwĩka maũndũ maingangĩ ala mekũĩkĩĩthya kana we nĩ Mũklĩsto wa wʼo, eka o kwasya we nũmũĩkĩĩaa Yesũ. Ve kĩndũ kĩngĩ kyendekaa kya kĩkũĩkĩĩthya ũndũ ũsu. Kĩndũ kĩu nĩ kyaũ?

Ndeto “Mũklĩsto” yambĩĩie kũtũmĩka ĩvinda ĩkuvĩ ĩtina wa mwaka wa 44 ĩtina wa Klĩsto. Mũandĩki wa Mbivilia Luka aisye atĩĩ: “Kũu Andiokia nĩkwʼo amanyĩwʼa, matongoewʼe nĩ Ngai, mambĩĩie kwĩtwa Aklĩsto.” (Meko ma Atũmwa 11:26) Kwoou ala meetawa Aklĩsto maĩ amanyĩwʼa ma Klĩsto. Nĩ kyaũ kĩtumaa mũndũ ethĩwa e mũmanyĩwʼa wa Yesũ Klĩsto? Ĩvuku The New International Dictionary of New Testament Theology yaĩtye atĩĩ: “Mũndũ enda kwĩthĩwa mũmanyĩwʼa wa Yesũ aĩle kwĩyumya vyũ na ngoo yonthe . . . thayũnĩ wake wʼonthe.” Kwoou, Mũklĩsto wa wʼo nĩ ũla ũatĩĩaa momanyĩsyo na mĩao ya Yesũ o na kwekala ata, nũndũ nĩwe wambĩĩisye Ũklĩsto.

Nĩ ũndũ ũtonyeka kwona andũ ta asu katĩ wa andũ aingĩ ala meyĩtaa Aklĩsto ũmũnthĩ? Yesũ aisye nĩ kyaũ kĩkatuma andũ mamanya aatĩĩi make ma wʼo? Nĩtũũkũthokya wone ũndũ Mbivilia ĩsũngĩĩte makũlyo asu. Ilungunĩ ila iatĩĩe, nĩtũkwĩmanyĩsya maũndũ atano Yesũ wawetie ala maĩ matetheesye andũ kũmanya aatĩĩi make ma wʼo. Nĩtũkwona ũndũ Aklĩsto ma ĩvinda ya atũmwa moonanisye maũndũ asu. Na tũisyoka twone naaũ ũmũnthĩ meanĩĩtye maũndũ asu, katĩ wa andũ aingĩ ala maasyaa kana mo nĩ Aklĩsto.