Ĩsomo ya 13

Ũtonya Kũkwata Ndĩni Ya Wʼo Ata?

Atĩĩ, nĩ ndĩni syonthe syendeeasya Ngai, kana no ĩmwe yoka? (1)

Nĩkĩ kwĩ ndĩni mbingĩ mũno ila syaasya aĩ nĩ sya Kĩklĩsto? (2)

Ũtonya ata kũmanya Aklĩsto ma wʼo? (3-7)

1. Yesũ ambĩĩie ndĩni ĩmwe ya wʼo ya Kĩklĩsto. Kwoou ũmũnthĩ no nginya kwĩthĩwe kwĩ nguthu kana kĩkundi o kĩmwe kya athaithi ma Yeova Ngai. (Yoana 4:23, 24; Aeveso 4:4, 5) Mbivilia ĩmanyĩasya kana no andũ anini me lelũnĩ ũla mũtheke welekele thayũnĩ.—Mathayo 7:13, 14.

2. Mbivilia yawetie mbeange kana ĩtina wa kĩkwʼũ kya atũmwa, momanyĩsyo me mavĩtyo na imanyĩo ite sya Kĩklĩsto nĩsyesaa kũlika kavola-kavola nthĩnĩ wa yũmbano ya Kĩklĩsto. Andũũme nĩmesaa kũkusya etĩkĩli mamaatĩĩe mo vandũ va kũatĩĩa Klĩsto. (Mathayo 7:15, 21-23; Meko 20:29, 30) Nĩkyo kĩtumi twonaa ndĩni mbingĩ mũno syĩ kĩvathukanʼyo ila syaasya aĩ nĩ sya Kĩklĩsto. Tũtonya ata kũmanya Aklĩsto ma wʼo?

3. Ũvano ũla wonekanaa mũno kũthonoka movano onthe ma Aklĩsto ma wʼo nĩ kwĩthĩwa me wendo wa wʼo katĩ woo ene. (Yoana 13:34, 35) Maimanyĩawʼa kwĩsilya kana mo nĩ aseango kwĩ andũ ma ngo ila ingĩ kana ma langi sya ikonde ila ingĩ. O na maimanyĩawʼa kũmena andũ kuma nthĩ ila ingĩ. (Meko 10:34, 35) Kwoou mayĩthĩawa na kĩanda makaũnĩ. Aklĩsto ma wʼo mekanaa maũndũ ta ana-a-asa na eĩtu-a-ia.—1 Yoana 4:20, 21.

4. Ũvano ũngĩ wa ndĩni ya wʼo nĩ kwĩthĩwa akwatanĩi mayo me ndaĩa nene kwa Mbivilia. Mamĩtĩkĩlaa ta Ndeto ya Ngai na nĩmaĩkĩĩaa ũndũ yaĩtye. (Yoana 17:17; 2 Timotheo 3:16, 17) Makuaa Ndeto ya Ngai kwĩthĩwa yĩ ya vata kwĩ mesilya kana imanyĩo sya kĩmũndũ. (Mathayo 15:1-3, 7-9) Nĩmatataa kwĩkalya mathayũ moo ma kĩla mũthenya kwĩanana nondũ Mbivilia ĩwetete. Kwoou maitavanasya ũndũ ũmwe na mayĩka kĩvathũkanʼyo na ũu.—Tito 1:15, 16.

5. Ĩngĩ ndĩni ya wʼo no nginya yĩthĩwe na kĩkĩo kwa syĩtwa ya Ngai. (Mathayo 6:9) Yesũ nĩwatumie syĩtwa ya Ngai, Yeova, yĩmanyĩka kwa andũ ala angĩ. Aklĩsto ma wʼo no nginya meke o ta ũu. (Yoana 17:6, 26; Alomi 10:13, 14) Nĩ aaũ ndũanĩ yenyu matavasya ala angĩ ĩũlũ wa syĩtwa ya Ngai?

6. No nginya Aklĩsto ma wʼo matavanʼye Ũsumbĩ wa Ngai. Yesũ nĩweekie ũu. Mavinda onthe aneenie ũvoo wa Ũsumbĩ ũsu. (Luka 8:1) Eeaĩe amanyĩwʼa make matavanʼye ũtũmani o ũsu nthĩ yonthe. (Mathayo 24:14; 28:19, 20) Aklĩsto ma wʼo maĩkĩĩaa kana no Ũsumbĩ wa Ngai wʼoka ũkaetee nthĩ ĩno mũuo na ũsũvĩo wa wʼo.—Savuli 146:3-5.

7. Amanyĩwʼa ma Yesũ no nginya methĩwe ti kĩlungu kya nthĩ ĩno nthũku. (Yoana 17:16) Mayĩlikasya nthĩnĩ wa moteti ma nthĩ na ngananĩo ikonetye mĩtũĩle ya kĩmũndũ. Nĩmevathanaa na mũendele, imanyĩo, na myelekelo ĩla yĩkaa andũ naĩ ĩatĩĩawa nĩ andũ kwa wingĩ ĩũlũ wa nthĩ. (Yakovo 1:27; 4:4) Atĩĩ, we nũtonya kũmanya kĩkundi kya kĩndĩni ndũanĩ yenyu kĩla kĩ na movano asu ma Ũklĩsto wa wʼo?

[Visa Ithanguni ya 27]

Aklĩsto ma wʼo nĩmendene, nĩmataĩaa Mbivilia, na nĩmatavanasya Ũsumbĩ wa Ngai