Ũndũ wa Ũkwata Ndĩni ĩla ya Wʼo

Ethĩwa nũkwenda kwĩthĩwa mũnyanya wa Ngai, no nginya ũmanyĩe kũatĩĩa ndĩni ĩla Ngai wĩtĩkĩlaa. Yesũ aisye “athaithi ala ma wʼo” makamũthaitha Ngai kwĩanana na “wʼo.” (Yoana 4:23, 24) Kwĩ nzĩa o ĩmwe yoka ya kũthaitha Ngai. (Aeveso 4:4-6) Ndĩni ya wʼo ĩtongoeasya andũ kwelekela thayũ ũtathela, na ndĩni ya ũvũngũ ĩmatongoeasya kwelekela wanangĩko.—Mathayo 7:13, 14.

Ũtonya kũmanya ndĩni ya wʼo kwa kũsũva andũ ala mamĩatĩĩaa na meko. Nũndũ Yeova nĩ mũseo, athaithi make ma wʼo no nginya methĩwe andũ aseo. O tondũ mũsungwa mũseo ũsyaaa masungwa maseo vyũ, nowʼo ndĩni ya wʼo ĩsyaaa andũ aseo vyũ.—Mathayo 7:15-20.

Anyanya ma Yeova me ndaĩa nene kwa Mbivilia. Mo nĩmesĩ kana Mbivilia yumĩte kwa Ngai. Nĩmetĩkĩlĩthasya ndeto syayo itongoesye mathayũ moo, imanenge ũsũngĩo wa mathĩna moo, na kũmatethya memanyĩsye ĩũlũ wa Ngai. (2 Timotheo 3:16) Mo nĩmatataa kũatĩĩa na meko ũndũ matavanasya.

Anyanya ma Yeova nĩmonanasya wendo ene kwa ene. Yesũ nĩwoonanisye wendo kwa andũ kwa kũmamanyĩsya ĩũlũ wa Ngai, kwa kũvosya ala maĩ awau. Ala maatĩĩaa ndĩni ya wʼo na meko o na nĩmonasya andũ ala angĩ wendo. Ũndũ ũmwe na Yesũ, mo maimondaa andũ ngya kana ma mũvaĩ wĩ kĩvathũkanʼyo na woo. Yesũ aisye kana andũ makamanya amanyĩwʼa make kwa wendo ũla monanasya ene kwa ene.—Yoana 13:35.

Anyanya ma Ngai nĩmataĩaa syĩtwa ya Ngai, Yeova. Atĩĩ, mũndũ akalea kũtũmĩa syĩtwa yaku, mũndũ ũsu no ethĩwe mũnyanya wĩ mũamba wa vakuvĩ naku? Aiee! Yĩla twĩ na mũnyanya, nĩtũtũmĩaa syĩtwa yake na kũneena maũndũ maseo ĩũlũ wa mũnyanya ũsu kwa andũ angĩ. Nowʼo ala mekwenda kwĩthĩwa anyanya ma Ngai maĩlĩtwe nĩ kũtũmĩa syĩtwa yake na kũneena ĩũlũ wake kwa andũ ala angĩ. Yeova eenda ithyĩ twĩke ũu.—Mathayo 6:9; Alomi 10:13, 14.

Tondũ Yesũ weekie, anyanya ma Ngai nĩmamanyĩasya andũ ĩũlũ wa Ũsumbĩ wa Ngai. Ũsumbĩ wa Ngai nĩ ĩla silikalĩ ya ĩtunĩ ĩkatwʼĩkĩthya nthĩ valatiso. Anyanya ma Ngai nĩmatavasya andũ ala angĩ ũvoo ũũ mũseo wa Ũsumbĩ wa Ngai nĩ kenda o nao maũmanye.—Mathayo 24:14.

Ngũsĩ sya Yeova nitataa kwĩthĩwa anyanya ma Ngai. Mo nĩmataĩaa Mbivilia na nĩmendene. O na nĩmatũmĩaa syĩtwa ya Ngai na kũyĩtaĩa, na nĩmamanyĩasya andũ ala angĩ ĩũlũ wa Ũsumbĩ wa Ngai. Ngũsĩ sya Yeova niatĩĩa ndĩni ĩla ya wʼo na meko ĩũlũ wa nthĩ yonthe ũmũnthĩ.