Ĩsomo ya 14

Ũndũ Ngũsĩ sya Yeova Itusawa Ũseũvyo

Nĩ ĩndĩĩ Ngũsĩ sya Yeova syeethĩiwe na mwambĩlĩlyo wasyo wa matukũnĩ aa? (1)

Mawũmbano ma Ngũsĩ sya Yeova matongoeawʼa ata? (2)

Motũmĩi ma mbesa makwatĩkanaa ata? (3)

Nũũ ũtongoeasya ala angĩ nthĩnĩ wa kĩla yũmbano? (4)

Nĩ mawũmbano meva manenange mekawa kĩla mwaka? (5)

Nĩ wĩa mwaũ ũtethawʼa kũla kwĩ kĩkalo kyoo kĩnene na ovisi syoo sya mbonge? (6)

1. Ngũsĩ sya Yeova syeethĩiwe na mwambĩlĩlyo wasyo wa matukũnĩ aa myaka ya 1870. Vau mbeenĩ, meetawa Amanyĩwʼa ma Mbivilia. Ĩndĩ mwaka wa 1931 nĩmoosie syĩtwa ya Kĩmaandĩko, Ngũsĩ sya Yeova. (Isaia 43:10) Kuma myambĩlĩlyo mĩnini ũseũvyo ũsu nĩwĩanĩte ũkatwʼĩka milioni sya Ngũsĩ, ila iũtethya wĩa mwingĩ iitavanʼya nthĩnĩ wa nthĩ mbee wa 230.

2. Maingĩ ma mombano ma Ngũsĩ sya Yeova methĩawa na mawũmbano mavinda atatũ kĩla kyumwa. Nũũthokwʼa ũkethĩwe nthĩnĩ wa ũmwe katĩ wa mawũmbano asu. (Aevelania 10:24, 25) Mbivilia nĩyo mũsingi wa maũndũ ala mamanyĩawʼa. Mawũmbano mavingũawa na kũvingwa na mboya. “Mbathi sya kĩveva” o nasyo nĩsinawa kuma ngoonĩ mawũmbanonĩ maingĩ. (Aeveso 5:18, 19, NW) Kũlika nĩ mana, na vaiĩ maelo metawʼa.—Mathayo 10:8.

3. Mombano maingĩ methĩawa na mawũmbano nthĩnĩ wa Nyũmba ya Ũsumbĩ. Nyũmba isu mavinda maingĩ syĩthĩawa syĩ myako ĩte mĩseũvĩlye mingĩ na yakawa nĩ eyumya Ngũsĩ. Ndũkona mĩvwʼanano o na yĩva, ngelanʼyo, kana syĩndũ ta isu ku Nyũmba ya Ũsumbĩ. Motũmĩi ma mbesa maĩvĩawa ni mĩvothi ya kwĩyendea. Kwa ala mekwenda kumya mũvothi, kwĩ ĩsandũkũ ya mĩvothi.—2 Akolintho 9:7.

4. Nthĩnĩ wa kĩla yũmbano, kwĩ atumĩa, kana asyaĩĩsya. Matongoeasya nthĩnĩ wa kũmanyĩsya yũmbanonĩ. (1 Timotheo 3:1-7; 5:17) Matetheeawʼa nĩ atethya ma ũthũkũmi. (1 Timotheo 3:8-10, 12, 13, NW) Andũũme aa mainengawa ndaĩa ya kũmatũlya ĩũlũ wa yũmbano yĩla yĩngĩ. (2 Akolintho 1:24) Mayĩtawa masyĩtwa manene ma mwanya. (Mathayo 23:8-10) Mayĩkĩaa ngũa kĩvathũkanʼyo na andũ ala angĩ. O na mayĩĩvawa kwondũ wa wĩa woo. Atumĩa masyaĩĩasya mavata ma kĩveva ma yũmbano kwa ngoo ya kwenda. Nĩmatonya kumya ũkiakisyo na ũtongoesyo mavindanĩ ma thĩna.—Yakovo 5:14-16; 1 Vetelo 5:2, 3.

5. Ngũsĩ sya Yeova o na nĩsyĩthĩawa na mbũmbanĩko kana mombanĩko manene kĩla mwaka. Mavinda asu mombano maingĩ nĩmokaa vandũ vamwe kwondũ wa ĩvango ya mwanya ya ũmanyĩsyo wa Mbivilia. Ũvatiso wa amanyĩwʼa eũ nĩ kĩlungu kĩtatĩaa kya kĩla ĩvango ya wũmbanĩko kana yũmbanĩko.—Mathayo 3:13-17; 28:19, 20.

6. Kĩkalo kĩnene kya nthĩ yonthe kya Ngũsĩ sya Yeova kĩ New York. Kũu nĩkwʼo kwĩ Nzama ya Kũũngamĩa, kĩkundi kya katĩ kya atumĩa me na ũmanyĩo wa maũndũ ala masyaĩĩasya yũmbano ya waamu wa nthĩ yonthe. O na kwĩ ovisi sya mbonge mbee wa 100 kũthyũlũlũka nthĩ yonthe. Kũndũ kũu, eyumya nĩmatethasya kũkũna kyava mavuku ma Mbivilia na kũmatũma kũla maĩle ũthi. O na wonelelyo nĩwumawʼa kũkonanʼya na ũseũvyo mũseo wa wĩa wa kũtavanʼya. Nĩkĩ we ũtavanga ndembea ya kũthi kwona ovisi ya ũvonge ũla wĩ vakuvĩ mũno naku?