KYONGO KYA ĨTHANGŨ YA MBEE | WE SATANI E KW’O?
We Satani e Kw’o?
“Neanĩie nthĩ ya El Salvador. Ĩla navĩtya, inyia wakwa ambĩaa, ‘Ndevili nĩwũkĩte kũkwosa!’ Nakwa ndimũsũngĩa, ‘Eka oke!’ Naĩkĩĩaa Ngai ĩndĩ ti Satani.”—ROGELIO.
We nũkwĩtĩkĩlana na kamwana kau ketawa Rogelio? Nĩ woni wĩva katĩ wa mawoni aa me vaa ĩtheo ũkwona waĩle?
Satani nde kw’o, ĩndĩ we no ũthũku wĩ nthĩnĩ witũ.
Satani e kw’o, ĩndĩ ndendaa kwasya andũ.
Satani nĩ kyũmbe kĩ vinya kya veva kĩla kĩtumaa andũ meka maũndũ mathũku.
Andũ aingĩ nĩmethĩawa na mawoni ta asu. Nĩvatonyeka ũkethĩa kĩla woni ũĩkĩĩawa nĩ andũ milioni mbingĩ. Ĩndĩ ĩkũlyo nĩ, Ve vata wa kũmanya nĩ woni wĩva ũla waĩlĩte? Ethĩwa Satani nde kw’o ala mamũkĩaa nĩmaĩte. Ethĩwa Satani e kw’o na ndendaa kwasya andũ, aingĩ mesiĩanĩaa nake kana kũmũkĩa o mana. Ĩndĩ ethĩwa Satani nĩ mũkengani, nĩ mũthũku vyũ kwĩ ũndũ andũ aingĩ masũanĩaa.
Ekai twĩmanyĩsye ũndũ Maandĩko Matheu masũngĩaa makũlyo aa: Satani nũũ kana nĩ kyaũ? We nĩ ũthũku wĩ nthĩnĩ witũ kana nĩ kyũmbe kya veva? Ethĩwa we nĩ kyũmbe, we nĩwaĩle kwĩsũvĩana nake? Ethĩwa ũu nĩ w’o, we ũtonya kwĩsũvĩa ata?