KYONGO KYA ĨTHANGŨ YA MBEE | WE SATANI E KW’O?
Yo Nĩtwaĩle Kũkĩa Satani?
Ve nzeve ĩmwe yĩ sumu ĩtamanyĩkaa mĩtũkĩ ĩla yanyaĩĩka vandũ. Nzeve ĩsu ndĩ mũuke na ndĩ langi, na nũndũ wa ũu, no yũae mũndũ ateũmanya. Nĩvatonyeka ũkethĩa nusu ya andũ ala makusaa nũndũ wa sumu ĩũlũ wa nthĩ yonthe moaawa nĩ nzeve ĩsu. Nzeve ĩsu yĩtawa carbon monoxide. Ĩndĩ vai vata wa kũtelema. Ve nzĩa ĩla ũtonya kũtũmĩa ũkamanya ethĩwa nzeve ĩsu yĩ vo na ũimanya ũndũ ũtonya kwĩsiĩanĩa nayo. Andũ aingĩ nĩmethĩawa na syĩndũ itonya kũmamanyĩthya ethĩwa nzeve ĩsu yĩ vo, na mamina kũmanya mayosa ĩtambya mĩtũkĩ.
Satani ndonekaa, ndamanyĩkaa mĩtũkĩ, na nĩ mũthũku vyũ o tondũ nzeve ĩsu yĩtawa carbon monoxide yĩthĩawa yĩilyĩ. Ĩndĩ Ngai nũtũtetheeasya ũndũnĩ ũsu. Watũmĩa mĩthĩnzĩo ĩĩ Ngai ũtũnengete, ndũkakĩa Satani.
Ũtonyi wa kwĩnyuvĩa. Ĩandĩko ya Yakovo 4:7 yĩtũtavĩtye ũũ: “Mũsiĩĩei ndevili, nake akamũkĩa.” O na kau Satani e vinya, ndesa kũũlasimĩthya wĩke ũndũ ũte kwenda. Nĩwaĩle kwĩnyuvĩa. Ĩandĩko ya 1 Vetelo 5:9 yaĩtye atĩĩ: “Mũsiĩĩei [Ndevili] mũlũmite mũĩkĩĩonĩ wenyu.” Lilikana kana Satani aekanie na Yesũ ĩtina wa Yesũ kũleana vyũ na matatwa make atatũ. (Mathayo 4:11) O naku no ũtw’e kũleana na maũndũ ala Satani wendaa wĩke.
Ũnyanya na Ngai. Ĩandĩko ya Yakovo 4:8 yĩtũthangaasya ‘tũmũthengeee Ngai.’ Yeova nĩwendaa wĩthĩwe na ngwatanĩo nzeo nake. Ũtonya kwĩka ũu ata? Nzĩa ĩla nzeo ya kwambĩĩa kwĩka ũu nĩ kwĩmanyĩsya ĩũlũ wake Mbivilianĩ. (Yoana 17:3) Maũndũ ala ũkemanyĩasya ĩũlũ wa Yeova makatuma ũmwenda, naw’o wendo ũsu ũituma wĩka kwenda kwake. (1 Yoana 5:3) Waendeea kũmũthengeea Ĩthe waku wa ĩtunĩ, nake akeeka ata? Yakovo aendeee kwasya, ‘nake akakũthengeea.’
Ngai nũtwathĩte kana akatũsũvĩaa. Ĩandĩko ya Nthimo 18:10 yaĩtye ũũ: “Syĩtwa ya Yeova nĩ mwako mũtũlu wa mũnyoolo, ũla mũlũngalu akĩĩaa vo, na nde na mũisyo.” Vate nzika ũu ti kwasya kana ĩsyĩtwa ya Ngai nĩ mũthemba wa mbingo. Ĩndĩ ũu nĩ kwasya kana ala manengete ndaĩa ĩsyĩtwa ya Ngai no mamwĩkaĩle ĩvinda o na yĩva amasũvĩe.
Ngelekany’o nzeo. Ĩandĩko ya Meko ma Atũmwa 19:19 yaĩtye ũũ: “Na andũ aingĩ ala meekaa maũndũ ma ũwe maete mavuku moo na moomban’ya vamwe, na mamavĩvĩsya mbee wa andũ onthe; na matala thooa wamo na meethĩa nĩ ilungu sya vetha ngili mĩongo ĩtano.”a Aklĩsto asu nĩmaanangie syĩndũ syonthe ila syakonanĩtye na ũwe o na kau syaĩ sya mbesa mbingĩ. Ngelekany’o ĩsu nĩtonya kũtũtethya mũno ũmũnthĩ. Nĩkĩ? Nũndũ nthĩ ĩno yusũĩte ũoi na ũwe. O na syĩndũ sya ũwe na meko ala makonetye ũwe na monekaa mate mathũku nĩmatonya kũtuma mũndũ athĩnw’a nĩ ndaimoni. Kwoou waĩlĩte kwĩkĩa kĩthito wĩvetangane na syĩndũ ta isu o na kweethĩwa kũilyĩ ata.—Kũtũngĩlĩlwa Kwa Mĩao 18:10-12.
Rogelio, ũla ũwetetwe kĩlungunĩ kya mbee, atavikĩtye myaka 50 ndaĩkĩĩaa kana kwĩ Ndevili. Ĩndĩ nĩwasũanĩie ĩngĩ ĩũlũ wa woni wake. Nĩkĩ weekie ũu? Aĩtye ũũ: “Kwa ĩvinda ya mbee nĩnamanthie Mbivilia.” Aendeee kwasya: “Ũmanyi kuma Maandĩkonĩ nĩwandĩkĩĩthisye kana Ndevili e kw’o. Ũmanyi ũsu nũnzũvĩaa ndikakwatw’e nĩwe.”
“Ũmanyi kuma Maandĩkonĩ nĩwandĩkĩĩthisye kana Ndevili e kw’o. Ũmanyi ũsu nũnzũvĩaa ndikakwatw’e nĩwe’’
We no wende kwĩsa kwona mũthenya ũla Satani ũtakethĩwa e kw’o? Nũtonya kwĩsa kũwona. Maandĩko nĩmathanĩte ĩũlũ wa ĩvinda yĩla Ndevili, ũla ũkengete andũ aingĩ, ‘ũkekw’a ĩianĩ ya mwaki na mũvĩlĩtĩ.’ (Ũvuan’yo 20:10) Vate nzika mwaki na mũvĩlĩtĩ iyĩsa kũvĩvya kyũmbe kya veva. Kwoou ĩia ya mwaki no nginya yĩthĩwe ĩyonany’a kwanangwa tene na tene.Satani akaanangwa vyũ. Yĩu yĩkethĩwa ĩvinda ya ũtanu ta kĩ kwa ala mamwendete Ngai!
Ĩvindanĩ yĩĩ, endeea kũtata ũndũ ũtonya wĩmanyĩsye ĩũlũ wa Yeova na nzĩa syake.b Tata kũkũna visa wĩ thayũ ĩvinda yĩla Satani ũtakethĩwa kw’o!
a Ethĩwa kĩlungu kĩmwe kya vetha kyaĩ ndinalĩ ĩla yatũmĩawa Lomi, mbesa isu syonthe syeanene na mũsaala wa mũthenya ũmwe wa athũkũmi 50,000. Isu nĩ mbesa mbingĩ mũno!
b Nĩ kana ũkwate ũvoo mwingangĩ ĩũlũ wa Satani na woni wa Ngai ĩũlũ wa ũwe, sisya kĩlungu kya 10 kya ĩvuku Mbivilia Yo Ĩmanyĩasya Ata? Kũlya Ngũsĩ sya Yeova ikũnenge yĩmwe kana ũyĩsome Kĩsesenĩ kya www.jw.org/kam.