MOSŨNGĨO MA MAKŨLYO MA MBIVILIA

Kwa w’o Yesũ nĩwathayũũkisye andũ?

Mbivilia yonanĩtye nesa vyũ kana Yesũ nĩwathayũũkisye andũ. Maũndũ asu Yesũ weekie ti mbano, nĩ maũndũ meekĩkie kũndũ kwĩsĩkĩe na mavinda mesĩkĩe nesa. Kwa ngelekany’o, mwaka wa 31, ve nguthu ya andũ yaumie na Yesũ Kavelinaumi maendete ndũa ya Naini. Ĩla mavikie kũu nĩmakomanie na nguthu ĩngĩ ya andũ. No ũĩkĩĩe ũvoo ĩũlũ wa ũthayũũkyo ũla weekĩkie kũu nũndũ ũandĩkĩtwe Ndetonĩ ya Ngai, Mbivilia, na nũndũ andũ asu onthe nĩmoonie ũthayũũkyo ũsu.—Soma Luka 7:11-15.

O na ĩngĩ Yesũ nĩwathayũũkisye mũnyanyae wake Lasalo, ũla waminĩte mĩthenya ĩna e mũkw’ũ. No ũĩkĩĩe ũndũ ũsu Yesũ weekie nũndũ andũ aingĩ nĩmawonie ũyĩkĩka.—Soma Yoana 11:39-45.

Nĩkĩ Yesũ wathayũũkisye andũ?

Yesũ athayũũkisye andũ nũndũ aĩ na tei. O na ĩngĩ eekie ũu onany’e kana Ĩthe wake, ũla nĩwe Mũmbi wa thayũ, nĩwamũnengete ũtonyi wa kũkĩlya kĩkw’ũ vinya.—Soma Yoana 5:21, 28, 29.

Nũndũ Yesũ nĩwathayũũkisye andũ, twĩ na mũĩkĩĩo kana maũndũ ala ũtwathĩte ĩũlũ wa ĩvinda yũkĩte makeanĩa. Akathayũũkya andũ aingĩ vyũ. Amwe katĩ wa ala makathayũũkw’a nĩ andũ mate alũngalu ala mataakwata ũmanyi ĩũlũ wa Ngai ũla wa w’o. Makanengwa mwanya wa kwĩmanyĩsya ĩũlũ wa Yeova Ngai na kũmwenda.—Soma Meko ma Atũmwa 24:15.