Nĩvethĩwa Thĩna Wĩa Waku Ũkaema Kwoneka Nĩ Angĩ?

ĨLA Mbesaleli na Ooliavu maĩ Misili, nĩmamanyĩĩte kwona myako ĩyakwa. Me ngombo kũu moombĩthĩtw’e mavali maingĩ ũkethĩa o na mayenda kũlilikana ũ wĩa. Ĩndĩ ũseo kyu kyaĩ kyavĩtũkie. Kĩla kyaĩ mbee woo yu nĩ wĩa mũnene ũla manengiwe mwakonĩ wa yĩla ĩeema, na wĩa ũsu wesie kũtuma matw’ĩka mavundi ma syĩndũ sya vata mũno. (Kuma 31:1-11) Ĩndĩ o na maseũvĩtye syĩndũ iseũvĩte ũu, no anini mũno mesaa kwona imwe sya syĩndũ isu. Kyu nĩkyesaa kũtuma makw’a ngoo? Nĩ vaĩ thĩna wĩa woo ũemete kwoneka nĩ andũ aingĩ? Nĩvethĩwa thĩna wĩa waku ũkaema kwoneka nĩ angĩ?

WĨA MŨSEO VYŨ ĨNDĨ WOONEKIE NO AVŨTHŨ

Syĩndũ imwe syaseũvĩtw’e sya vau ĩeemanĩ syaĩ sya thooa mũnene mũno. Kwa ngelekany’o, sũanĩa ala akeluvi ma thaavu maĩ ĩũlũ wa yĩla ĩsandũkũ ya ũtianĩo. Mũtũmwa Vaulo aisye maĩ na “ũtheu mũtisu.” (Aevl. 9:5) Kwasũanĩa ũndũ maanakavĩte maseũvĩtw’e na thaavu mũtue!—Kuma 37:7-9.

Syĩndũ ila syaseũvĩtw’e nĩ Mbesaleli na Ooliavu ikesa kwoneka ũmũnthĩ, syĩthĩwa syaĩlĩte kwiwa kula kwiawa syĩndũ sya tene ila sya thooa mũnene mũno nĩ kana ikonekaa nĩ andũ na makaitanĩa mũno. Ĩndĩ wĩona ta ve andũ aingĩ moonie ũseo wasyo ĩla Mbesaleli na Ooliavu maminie kũiseũvya? Ala akeluvi maiĩtwe vala Vandũ Vatheu Mbee, na kwoou moonekaa nĩ mũthembi mũnene e weka ĩla wesa kũlika vau Mũthenya wa Wĩw’anĩthyo wavika, naw’o mũthenya ũsu weethĩawa o ĩmwe kwa mwaka. (Aevl. 9:6, 7) Nũndũ wa kĩtumi kyu, no andũ anini mũno maaona akeluvi asu.

ĨKALAA WĨ MWĨANĨE O NA WAEMA KŨKATHWA NĨ ANDŨ AINGĨ

Keka nue Mbesaleli na Ooliavu na ũithũkũma na kĩthito ũseũvye syĩndũ iseũvĩte ũu, wĩw’a ata wesa kũmanya kana syoonekie nĩ andũ anini vyũ? Matukũ aa andũ mamanyaa nĩmeeka nesa ĩla makathwa nĩ andũ angĩ. Kĩu nĩ takyo kĩthimi kya kũsisya wĩa woo ũseũvĩte ata. Ĩndĩ athũkũmi ma Yeova mayĩilyĩ ũu. O ta Mbesaleli na Ooliavu, nĩtwĩanĩawa ĩla tweeka kwenda kwa Yeova na twamanya kana nĩweetĩkĩla kĩla tweeka.

Ĩvinda yĩla Yesũ waĩ kũũ nthĩ atongoi ma ndĩni nĩmavoyaa nĩ kana mendeesye andũ. Ĩndĩ Yesũ amanyĩisye andũ kana maĩle kũvoyaa kuma ngoonĩ mateteele makathwe nĩ ala methukĩĩsye. Ũseo wa kwĩka ũu nĩ wĩva? Mbivilia yaĩtye: “Ĩthe waku ũla wonaa kĩmbithĩnĩ akakũĩva.” (Mt. 6:5, 6) Kwoou ũndũ ũla wa vata ti ũndũ andũ meũsũanĩa ĩũlũ wa mboya sitũ, ĩndĩ nĩ ũndũ Yeova ũsyonaa. Woni wake nĩw’o ũtumaa mboya sitũ syĩthĩwa syĩ sya vata. O na ĩla tũkwĩka kĩndũ o na kĩva ũthũkũminĩ wake, woni wake now’o wa vata. Ũthũkũmi witũ ndũtw’ĩkaa nĩ mũseo atĩ nũndũ andũ aingĩ nĩmatũkatha, ĩndĩ nũndũ nĩwamwendeesya Yeova, “ũla wonaa kĩmbithĩnĩ.”

Ĩla ĩeema yathelile, kwaendie ata? Mbivilia yaĩtye kana mũumbĩ ‘nĩwavw’ĩkie yĩla ĩeema ya kũmbanĩa, na ũtheu mũtisu wa Yeova wausũa ũla wĩkalo.’ (Kuma 40:34) Ũndũ ũsu woonanisye nesa vyũ kana Yeova nĩweetĩkĩlile wĩa wa Mbesaleli na Ooliavu. We wĩsũanĩa ta meewie ata ĩla Yeova woonanisye nĩweetĩkĩla wĩa woo? O na kau masyĩtwa moo mayaavanĩĩwa syĩndũnĩ ila maseũvisye, no nginya methĩwe matanie mũno ĩla mamanyie kana Ngai nĩwaathimie kĩthito kyoo. (Nth. 10:22) Ĩtina wa myaka kauta, no nginya methĩwe matanaa mũno ngoonĩ moona kana syĩndũ ila maseũvisye no syaendeee kũtũmĩwa ũthaithinĩ wa w’o. Ĩla Mbesaleli na Ooliavu makathayũũkw’a, makatana mũno kũmanya kana yĩla ĩeema nĩyaendeeie kũtũmĩwa kũmũthaitha Yeova kwa myaka ta 500!

Kĩkundinĩ kya andũ ma Yeova ũmũnthĩ, ve andũ matethasya mawĩa me kĩvathũkany’o, ta kũseũvya sinema sya tũtuni, kũsola mavisa, kũseũvya mbathi, kũkũna visa, na kũalyũla. Masyĩtwa ma ala matethasya mawĩa asu maitangaasawa. Kwa nzĩa ĩsu no twasye kana vai mũndũ wonaa wĩa ũla matethasya. Ũu now’o vailyĩ ikundinĩ mbee wa 110,000 nthĩ yonthe. Wĩa mwingĩ ũla ũtethaw’a ikundinĩ isu ndwonekaa. Kwa ngelekany’o, we nũũ wonaa mwana-a-asa ũla wĩkaa ĩsavu ya kĩkundi aitethya wĩa wake mũthya wa mwei? Nũũ ũla wonaa mũandĩki wa kĩkundi aiseũvya livoti ya ũtavany’a ya kĩkundi kyonthe? Na nũũ ũla wonaa mwana-a-asa kana mwĩĩtu-a-asa aitũngĩĩa kũla kwanangĩku Nyũmbanĩ ya Ũsumbĩ?

Mbesaleli na Ooliavu maikw’a mayaĩ na ikombe kana mĩthĩnzĩo ĩngĩ ta ĩsu matonya kwĩyona nayo nũndũ wa wĩa mũseo mũno ũla matethetye. Ĩndĩ nũndũ Yeova nĩweetĩkĩlĩte wĩa woo, kĩu nĩkyo kyaĩ kya vata kwĩ mũthĩnzĩo o na wĩva. Tũi na nzika kana Yeova nĩwoonie wĩa woo. Ekai ĩndĩ tũatĩĩe ngelekany’o yoo kwa kũtethasya wĩa na ngenda na twĩnyivĩtye.