We Ngai Nũũ?

Andũ aingĩ maasya kana nĩmamũĩkĩĩaa Ngai. Ĩndĩ ũkamakũlya Ngai nũũ, masũngĩa mosũngĩo me kĩvathũkanyʼo. Amwe maasya kana Ngai nĩ mũsili mũthũku na wendete kũsilĩla andũ nũndũ wa meko moo mathũku. Andũ angĩ maasya kana Ngai nĩwendete andũ na nũmaekeaa o na meeka maũndũ mathũkĩte ata. Namo angĩ maĩkĩĩaa kana Ngai e vaasa mũno na ndatwendete. Nũndũ wa mawoni asu me kĩvathũkanyʼo, andũ aingĩ nĩmatonya kũsũanĩa kana vaitonyeka kũmanya Ngai nũũ.

Yo ve vata wa kũmũmanya Ngai? Ĩĩ ve vata. Kũmũmanya Ngai nesa no kũtume tũmanya nĩkĩ twĩ thayũ na ũu ũituma twĩkala thayũ mũseo. (Meko ma Atũmwa 17:26-28) O ũndũ waendeea kũmũthengeea Ngai nowʼo nake ũendeeaa kũkwenda na kũũtetheesya. (Yakovo 4:8) O na ĩngĩ, kwĩthĩwa na ũmanyi wa wʼo ĩũlũ wa Ngai no kũtume wĩsa kũkwata thayũ ũtathela.​—Yoana 17:3.

Ũndũ ũtonya kũmũmanya Ngai. Kwa ngelekanyʼo, kwasũanĩa ĩũlũ wa mũndũ wĩsĩ nesa, ta mũndũ mwĩ ndũũ vyũ. Mwatumie ndũũ ata? Nĩvatonyeka ũkethĩwa wamanyie ĩsyĩtwa yake, ndaĩa syake, maũndũ ala wendete na ala ũtendete, o vamwe na maũndũ ala wĩkĩte na ala ũvangĩte kwĩka, na maũndũ angĩ maingĩ. Kũmũmanya nesa nĩkwʼo kwatumie mwĩthĩwa na ndũũ ngamu.

O naitũ no tũmũmanye Ngai twamanya mosũngĩo ma maũndũ aa maatĩĩe:

• NGAI ETAWA ATA?

• WE NGAI AILYĨ ATA?

• NĨ MAŨNDŨ MEVA NGAI WĨKĨTE?

• NĨ MAŨNDŨ MEVA NGAI ŨKEKA ĨVINDA YŨKĨTE?

• KŨMŨMANYA NGAI KŨTONYA KŨŨTETHYA ATA?

Ĩkaseti yĩĩ nĩyĩũkũtetheesya ũkwate mosũngĩo ma makũlyo asu. Ilungu ila iatĩĩe nĩsiũkũtetheesya ũmanye Ngai nũũ, na ũmanye ũndũ ũkatetheka weethĩwa na ngwatanĩo nzeo nake.