Yo Ndĩni, Ngai, Kana Mbivilia no Indetheesye Ngekalaa Nĩ Mwĩanĩe?

Ũndũ Mbivilia yaasya

Ĩĩ. Mbivilia nĩ ĩvuku yaandĩkiwe tene na yĩ ũĩ mwingĩ. Nĩtonya kũũtetheesya kũkwata mosũngĩo ma makũlyo ala ma vata vyũ, na ũu ũituma wĩwʼa wĩ mwĩanĩe. Kwoona makũlyo amwe masũngĩĩtwe Mbivilianĩ.

1. Yo kwĩ Mũmbi? Mbivilia yaĩtye kana Ngai ‘oombie syĩndũ syonthe.’ (Ũvuanʼyo 4:11) Kwoou, nĩwĩsĩ maũndũ ala ma vata kwitũ nĩ kana twĩkale twĩ eanĩe na twĩ atanu.

2. Ngai nũnthĩnĩkĩaa? Mbivilia ndyonanasya kana Ngai e vaasa na andũ. Yaĩtye: “Nde kũasa na kĩla ũmwe waitũ.” (Meko ma Atũmwa 17:27) Nĩwendeeawʼa nĩ maũndũ ala maũkwataa na endaa kũũtetheesya nĩ kana maũndũ maku maĩle.—Isaia 48:17, 18; 1 Vetelo 5:7.

3. Kũmũmanya Ngai kũtonya kũndetheesya ata nĩwʼe nĩ mwĩanĩe? Ngai atũmbie twĩ na “ũkya wa ngoo,” ũla nĩ wendi mwingĩ wĩ nthĩnĩ witũ wa kwenda kũelewa kĩeleelo kya thayũ. (Mathayo 5:3) Wendi ũsu wa maũndũ ma kĩ-veva nũtumaa twenda kũmanya Mũmbi witũ, na twenda kwĩthĩwa na ngwatanĩo nake. Ngai nĩwendaa twĩkĩe kĩthito tũmũmanye, nũndũ Mbivilia yaĩtye: “Mũthengeei Ngai, nake akamũthengeea inywʼĩ.”—Yakovo 4:8.

Andũ milioni mbingĩ nĩmethĩĩte kana kwĩthĩwa na ngwatanĩo na Ngai nĩkũtumaa mewʼa me eanĩe, na matanĩa thayũ. O na kau kũmũmanya Ngai kũikũvetangĩa mathĩna, ũĩ ũla wĩ Mbivilianĩ no ũkũtetheesye

• Wĩthĩwe na mũsyĩ wĩ na ũtanu.

• Wĩkalanyʼe na mũuo na andũ ala angĩ.

• Ũmanye kũthĩnĩkĩa mathĩna ta kũkwʼa ngoo, mathĩna ma mbesa, na mowau mathũku.

Ndĩni mbingĩ ila itũmĩaa Mbivilia iyĩatĩĩaa maũndũ ala Mbivilia ĩmanyĩasya. Kĩvathũkanyʼo na ndĩni isu, ndĩni ya wʼo, ĩla ĩatĩĩaa maũndũ ala Mbivilia ĩmanyĩasya, nĩkũũtetheesya ũmũmanye Ngai.