Nĩkĩ Ngai Woombie Mũndũ?

Ũndũ Mbivilia yaasya

Ĩkũlyo ĩũlũ wa nĩkĩ Ngai woombie mũndũ no yĩkũlwʼe kwa nzĩa syĩ kĩvathũkanyʼo ta, Nĩkĩ twĩ vaa? kana Wʼo thayũ wakwa wĩ na kĩeleelo? Mbivilia yonanĩtye kana kĩeleelo kitũ ĩla twĩ thayũ nĩ kwaka ũnyanya witũ vamwe na Ngai. Kwasũanĩa maũndũ aa ma vata na ma wʼo ala Mbivilia ĩvuanĩtye.

• Ngai nĩwe watũmbie. Mbivilia yaĩtye: “[Ngai] nĩwe ũla watũmbie.” Ũu nĩkwonanyʼa kana ti ithyĩ tweeyũmbie.​—Savuli 100:3; Ũvuanʼyo 4:11.

• Yeova oombie kĩla kĩndũ vamwe naitũ e na kĩeleelo kĩseo.​—Isaia 45:18.

• Yeova atũmbĩte twĩ na “nzaa na waũni wa ũlũngalu,” ũla nĩ vamwe na mea ma kwenda kũmanya nĩkĩ watũmbie. (Mathayo 5:6) Endaa twĩanĩsye wendi ũsu.​—Savuli 145:16.

• Twĩanĩasya nzaa na waũni wa ũlũngalu kwĩsĩla kwaka ũnyanya witũ na Ngai. O na kau andũ amwe no mone kwĩthĩwa na ũnyanya na Ngai ne ũndũ ũtatonyeka, Mbivilia ĩtwĩkĩĩte vinya kwa kũtwĩa atĩĩ: “Mũthengeei Ngai, nake akamũthengeea inywʼĩ.”​—Yakovo 4:8; 2:23.

• Nĩ kana twĩthĩwe anyanya ma Ngai , no nginya twĩkale kwosana na kĩeleelo kyake kũtwelekela. Mbivilia nĩwetete kĩeleelo kĩu ĩandĩkonĩ ya Mũtavanʼya 12:13 yĩla yaĩtye: “Kĩa Ngai, na kwata mĩao yake; nũndũ twoombiwe kwondũ wa kĩtumi kĩu.”​—Good News Translation.

• Ĩvindanĩ yũkĩte, tũkatanĩa vyũ kĩeleelo kya Ngai kya kũtũmba, ĩla ũkaveta mathĩna onthe na ainenga anyanya make, ala mamũthaithaa, thayũ wa tene na tene.​—Savuli 37:10, 11.