Ngai Nĩwe Mũnyanya Mũseo Kũthonoka Onthe Ala Ũtonya Kwĩsa Kwĩthĩwa Nao

Vaiĩ ũseo ũthonokete kwĩthĩwa wĩ mũnyanya wa Ngai. Ngai akaũmanyĩsya ũndũ ũtonya kũtana na kũkwata ũsũvĩo; akaũthasya wume nthĩnĩ wa mĩĩkĩĩo mingĩ ĩtaĩle na imanyĩo mbingĩ iũmĩasya andũ. Akeethukĩĩsya mboya syaku. Akaũtethya ũtanĩe kwĩthĩwa na mũuo wa nthĩnĩ na wĩkwatyo mũlũmu. (Savuli 71:5; 73:28) Ngai akaũtwʼĩĩka mavinda ma thĩna. (Savuli 18:18) Na Ngai nũkumĩasya mũthĩnzĩo wake wa thayũ ũtathela.—Alomi 6:23.

O ũndũ ũkaendeea kũthengeea vakuvĩ na Ngai, nowʼo ũkaendeea kũthengeea vakũvĩ na anyanya ma Ngai. O nao makeethĩwa anyanyau. Kwa wʼo, makeethĩwa ta ana-a-au na eĩtu-a-au. Makatanĩa kũũmanyĩsya ĩũlũ wa Ngai, na makaũtethya na kũkwĩkĩa vinya wa ngoo.

Ithyĩ tũyĩanene na Ngai. Yĩla ũendeee kũmantha ũnyanya wa Ngai, no nginya ũmanye ũndũ ũmwe wa vata. Ũnyanya na Ngai ti ũnyanya katĩ wa andũ meanene. Ngai nũtũthonokete vaasa kwa ũkũũ na ũĩ, na e vinya mwingĩ kũtũthonoka. Nĩwe Mũsumbĩki witũ mwaĩlu. Kwoou ethĩwa nĩtũkwenda kwĩthĩwa anyanyae, no nginya tũmwĩwʼe na kwĩka ũndũ ũtwĩaa twĩke. Ũu ũkatũuna mavinda onthe.—Isaia 48:18.