Yo Mbivilia no Yĩndetheesye Ngethĩwa na Mũsyĩ wĩ na Ũtanu?

Ũndũ Mbivilia yaasya

Ĩĩ. Vaa ve motao maseo kuma Mbivilianĩ ala matetheesye aũme na aka aingĩ kwĩthĩwa na mĩsyĩ yĩ na ũtanu:

1. Andĩkĩthya mũtwaano waku. Kũandĩkĩthya mũtwaano kũtumaa andũ mekala meyumĩtye mate kwĩsilya kwĩsa kũtaanĩsya. Na ũsu nĩwʼo mũsingi wa mũsyĩ wĩ na ũtanu.​—Mathayo 19:4-6.

2. Ĩthĩwa na wendo na ũyonanyʼa ndaĩa. Ũu nĩkwasya kana waĩlĩte kũmwĩka ũla mũtwaanĩte o ũndũ ũkwenda we akwĩke.​—Mathayo 7:12; Aeveso 5:25, 33.

3. Ndũkatũmĩe ndeto nthũku. Neena na ũuu o na ĩla ũla mũtwaanĩte nake waneena kana weeka ũndũ ũtonya kũkũũmĩsya. (Aeveso 4:31, 32) Ĩandĩko ya Nthimo 15:1 yaĩtye atĩĩ: “Ũsũngĩo mwololo nũthyũũaa ũthilĩku; ĩndĩ ndeto mbai nĩyũkĩlasya ũthatu.”

4. Ĩthĩwa wĩ mũĩkĩĩku kwa ũla mũtwaanĩte nake. Waĩle kũmanyana kĩ-mwĩĩ na kwonyʼa wendo o ũla mũtwaanĩte nake e weka. (Mathayo 5:28) Mbivilia yaĩtye: “Mũtwaano nũtaĩwe nĩ andũ onthe, na ũkomo wĩthĩwe ũte mũvukye.”​—Aevelania 13:4.

5. Ĩthĩwa na wendo ĩla ũũmanyĩsya syana syaku. Ndũkananyʼe syana syaku kana kũikũthũkĩa.​—Nthimo 29:15; Akolosai 3:21.