Yĩla Ũkwĩwʼa Ũtekwenda Kwĩkala Thayũ

Mũndũ mũka wĩtawa Adriana kuma nthĩ ya Brazil aĩtye: “Neewʼaa nĩ na mawĩmakĩo maingĩ nginya ngenda kũkwʼa.”

WAAĨWʼA wĩ na thĩna mwingĩ nginya ũkenda kũkwʼa? Ethĩwa nĩweewie ũu, no ũelewe ũndũ Adriana weewʼaa. Adriana aĩ na mawĩmakĩo maingĩ, kyeva, na ndaĩ na wĩkwatyo. Na nũndũ wa ũu, nĩweethĩiwe na ũwau mũthũku wa kwĩkalaa akwʼĩte ngoo kĩla ĩvinda.

O na ĩngĩ, kwasũanĩa ĩũlũ wa mũndũũme wĩtawa Kaoru kuma Japan ũla wasũvĩaa asyai make akũũ na mataĩ meyĩka ũndũ. Kaoru aĩtye-ĩ: “Ĩvindanĩ yĩu, neewʼaa nĩ mũvinyĩĩe mũno nĩ wĩa. O na ĩtina wa ĩvinda, nĩnambĩĩie kũemwa nĩ kũya na kwaĩwa vyũ nĩ too. Nambĩĩie kũsũanĩa kana ngakwʼa no nĩthyũmũe kuma mathĩnanĩ asu.”

Mũndũũme wĩtawa Ojebode kuma Nigeria aĩtye, “Kĩla ĩvinda, neewʼaa nĩ na kyeva kingĩ nginya ngambĩĩa kũĩa, na kwoou nĩnamanthaa ũndũ ndonya kũkwʼa.” Ũndũ wa kwendeesya nĩ kana Ojebode, Kaoru, na Adriana mayaaĩyũaa. Ĩndĩ kĩla mwaka andũ ngili maana maingĩ nĩmeyũaaa.

VALA ŨTONYA KŨKWATA ŨTETHYO

Andũ aingĩ ala meyũaaa nĩ aũme, na aingĩ moo methĩawa mayĩwʼa nthoni sya kũkũlya matetheewʼe. Yesũ aisye kana andũ ala awau nĩmo mendaa ndakĩtalĩ. (Luka 5:31) Kwoou, ethĩwa nũkwĩwʼa ũkwʼĩte ngoo nginya ũkethĩa wĩenda kwĩyũaa, ndũkewʼe nthoni sya kũkũlya ũtetheewʼe. Yĩla andũ aingĩ me na ũwau wa kũkwʼa ngoo mathi sivitalĩ, nĩmatetheeawʼa makewʼa nesa na mayĩendeea kũmĩĩsya. Ojebode, Kaoru, na Adriana nĩmaendie sivitalĩ na matetheewʼa, na yu maendeee nesa.

Ndakĩtalĩ no itũmĩe ndawa kana ikaneena na mũwau kĩeleelo kĩ kũmũtetheesya avĩndũe mosũanĩo make. O na no itũmĩe nzĩa isu syelĩ kũiita mũwau ũsu ũkwʼĩte ngoo. Ala awau nĩmendaa kwĩwʼĩwa tei na kũtetheewʼa o kavola kwa kavola nĩ andũ ma mũsyĩ na anyanya. Mũnyanya ũla mũseo vyũ nĩ Yeova Ngai, nake atetheeasya andũ kwa nzĩa ĩla nzeo vyũ. Atũmĩaa Ndeto yake Mbivilia.

YO VE ĨVINDA THĨNA ŨSU ŨKATHELA VYŨ?

Mavinda maingĩ andũ ala methĩawa na ũwau wa kũkwʼa ngoo nĩmendaa kũiitwa kwa ĩvinda yĩasa. Nĩmaĩle kwĩmanyĩsya ũndũ matonya kũmĩĩsya thĩna kwa kwĩka moalyũku ala maĩle. Ĩndĩ ethĩwa wĩ na ũwau wa kũkwʼa ngoo, no wĩthĩwe na wĩkwatyo wa ĩvinda yũkĩte ĩseo o tondũ Ojebode wĩthĩawa na wĩkwatyo. Aĩtye atĩĩ: “Nĩnĩthĩawa neteele kwona ĩandĩko ya Isaia 33:24 yĩyĩanĩa. Ĩandĩko yĩu yathanĩte ĩũlũ wa ĩvinda yĩla vate mũndũ ũkasya, ‘Nyie nĩ mũwau.’” O ta Ojebode, osa vinya kumana na watho wa Ngai wa “nthĩ nzaũ,” vala “woo” ũtakethĩwa vo ĩngĩ. (Ũvuanʼyo 21:1, 4) Wathani ũsu weanĩa, vaiĩ mũndũ ũkasyoka kwĩthĩwa na mathĩna ma kĩlĩko kana woo ngoonĩ. Mathĩna asu makathela vyũ. Mawĩmakĩo onthe ala wĩ namo “matikalilikanwa, o na matikalika kĩlilikanonĩ” ĩngĩ.—Isaia 65:17.

Maandĩko Matonya Kũũtetheesya

Ngai nũeleawa ũndũ ũkwĩwʼa.

“Nyie, Yeova Ngai waku, ngakũkwata kwʼoko kwaku kwa aũme, ngĩkwĩa, Ndũkakĩe; ngakũtethya.”—Isaia 41:13.

Yeova nũeleawa ũndũ tũkwĩwʼa nesa mũno kwĩ mũndũ ũngĩ o na wĩva na nĩwendaa kũtũtethya.

Sũanĩaa mũno ĩũlũ wa Ndeto ya Ngai.

“[Eliya] eevoyea akwʼe, na asya, . . . ame Yeova, osa thayũ wakwa.”—1 Asumbĩ 19:4.

Ojebode aĩtye atĩĩ: “Kũvindĩĩsya Ndeto ya Ngai nĩkwandetheeisye, na namanya kana ve ĩvinda mwathani Eliya weewʼaa o takwa.”

Ĩmanyĩsye kuma ngelekanyʼonĩ syĩ Mbivilianĩ.

Yesũ eeie Vetelo atĩĩ: “Nĩnĩvoyete na kĩthingʼĩĩsyo kwondũ waku nĩ kana mũĩkĩĩo waku ndũkaleele.”—Luka 22:32.

Yĩla Vetelo wamũkaĩie Yesũ mavinda atatũ, nĩweewie aũmĩa mũno nginya aĩa kĩĩo kĩ woo. Ũla mũndũũme tũwetie wĩtawa Kaoru aĩtye: “Kũvindĩĩsya ĩũlũ wa ũndũ Yesũ weekie ĩtina wa Vetelo kũmũkaĩa nĩkwandetheeisye kũmanya kana Yeova na Yesũ nĩmathĩnĩkaa ĩũlũ wa ũndũ Vetelo weewʼaa. Ũndũ ũsu nĩwambĩkĩie vinya mũno.”

Mawĩmakĩo onthe ala wĩ namo “matikalilikanwa, o na matikalika kĩlilikanonĩ” ĩngĩ.—Isaia 65:17