Ĩsandũkũ ya Ĩkũlyo

◼ Nũũ ũla waĩle kũkwatanĩthya andũ mũtwaanonĩ kana kumya ũvoo wa mathiko?

Ĩkaseti ya Mũsyaĩĩsya ya Kĩsũngũ ya 01/12/1975, yaeleisye kana nthĩnĩ wa ikundi sya Kĩklĩsto no atumĩa na atetheesya ma ikundi matonya kwĩwa nĩ “athũkũmi anyuve” kwosana na ũndũ andũ matũmĩaa na maeleawa ndeto ĩsu. Ethĩwa mwĩao wa nthĩ yenyu, kana mwĩao wa kĩsio kyenyu wĩtĩkĩlasya mĩtwaano ĩkwatanĩthwʼe nĩ mũthũkũmi (ethĩwe “e na valũa,” nĩ “mũandĩkĩthye,” kana nĩ “mũnyuve”), no ana-a-asa ala matonya kwĩwa nĩ “anyuve” kwosana na Maandĩko (atumĩa kana atetheesya ma kĩkundi) makakwatanĩthasya mĩtwaano. (Vai vata wa kũkũlĩĩlya naaũ matwĩe makwatanĩthasya mĩtwaano.)

Nĩ ũndũ wa vata kũmanya mĩao ya kwenyu ũndũnĩ ũsu na kũmĩatĩĩa. Mwĩkũlwʼa mũikaandĩkĩe ovisi wa ũvonge ĩũlũ wa ũndũ ũsu nũndũ ovisi ndwĩ na mĩao yonthe ĩla ĩkonetye maũndũ ma mũtwaano.

Ethĩwa ala mekwenda kũtwaana meenda ũvoo wa mũtwaano umwʼe nĩ mwana-a-asa wĩ na mwĩkalĩle mũseo (na ti mũtumĩa kana mũtetheesya wa kĩkundi), mĩvango yaĩle kwĩkwa nĩ kana mwana-a-asa ũsu aumye ũvoo wa mũtwaano, na ĩndĩ amina mũtumĩa kana mũtetheesya wa kĩkundi ũla wĩtĩkĩlĩthĩtwʼe nĩ mĩao aimakwatanĩthya. Kũkwatanĩthya ala meũtwaana nĩkwʼo kũtumaa mũtwaano woo wĩtĩkĩlĩka.

Nzama ya ũthũkũmi ya kĩkundi nĩyo yaĩle kũnenga ala mekwenda kũtwaana mwanya wa kũtũmĩa Nyũmba ya Ũsumbĩ. (Sisya Ĩsandũkũ ya Ĩkũlyo nthĩnĩ wa Ũthũkũmi wa Ũsumbĩ wa Kĩsũngũ wa Mwei wa 6, 1975.)

Kumya ũvoo wa mathiko nĩ ũndũ wĩ kĩvathũkanyʼo na kũkwatanĩthya mũtwaano. Vai mwĩao wonanĩtye nũũ waĩle kũmya ũvoo wa mathiko. Mavinda maingĩ ala makwʼĩĩwe nĩmo matonya kũnyuva mwana-a-asa wĩ na mwĩkalĩle mũseo aumye ũvoo wa mathiko. Nĩmo maĩle kwĩnyuvĩa na maivanga nake. Ũla manyuva ti lasima akethĩwa e “mũthũkũmi mũnyuve,” kana, kwosana na Maandĩko, akethĩwa e mũtumĩa kana mũtetheesya wa kĩkundi.