Ĩsandũkũ ya Ĩkũlyo

◼ Tũtonya kwĩka ata nĩ kana tũsũvĩe Nyũmba yitũ ya Ũsumbĩ, na kwĩsũvĩa ĩla twĩ maũmbanonĩ?

Nĩkwĩthĩwa tũilyĩ mĩthenyanĩ ya mũminũkĩlyo, twaĩle kũtũmĩa ũĩ ĩla tũkwĩka mĩvango ya kũsũvĩa Nyũmba yitũ ya Ũsumbĩ. O ũndũ twĩkaa nĩ kana tũsũvĩe nyũmba sitũ, twaĩle kwĩka oou nĩ kana tũsũvĩe Nyũmba sitũ sya Ũsumbĩ. Atumĩa ma kĩkundi nĩmo me na kĩanda kya kũĩkĩĩthya kana Nyũmba ya Ũsumbĩ nĩ nzũvĩe nesa. Ve vata wa kwĩka ũu nũndũ nĩtwĩwʼĩte livoti mbingĩ sya ingʼei itũlĩte na ikoya syĩndũ Nyũmbanĩ sya Ũsumbĩ.

Ũndũ ũmwe wa vata ũla twaĩle kwĩka nĩ kũtia twavinga mĩomo, mĩvea, na ndĩlĩsya syonthe kĩla ĩvinda ĩtina wa kũtũmĩa Nyũmba ya Ũsumbĩ. Vaĩlĩte kwĩthĩawa ve ana-a-asa ma kwĩkwatwʼa ala makatethasya wĩa ũsu kĩla ĩvinda Nyũmba ya Ũsumbĩ yatũmĩwa. Vaĩle kwĩthĩwa vailyĩ ũu o na ĩla Nyũmba ya Ũsumbĩ yĩkwĩkĩwa maũndũ angĩ ta alũsi kana ĩla kwĩ na ũtheu wa nyũmba ĩsu.

Ethĩwa Nyũmba ya Ũsumbĩ yĩ na vandũ va kwia ngalĩ, nũseo taa ikakwatwʼa masaa ala maĩlĩte. Kwĩka ũu nĩũtetheesya syĩndũ iikoywe ngalĩnĩ na kũituma ana-a-asa na eĩtu-a-asa methĩwa me asũvĩĩku ĩla maumaalĩte. Ikundi imwe nĩsyonete wĩ ũndũ ũseo kwĩthĩwa na athokanyʼa mekumanĩsya kũsunga nza wa Nyũmba ya Ũsumbĩ nĩ kana masisye syĩndũ iikoywe ngalĩnĩ.

Ikundi imwe nĩsyonaa ve vata wa kũvinga mĩomo maũmbano maendeee. Ikundinĩ ta isu, athokanyʼa ma kwĩkwatwʼa maĩle kwĩthĩwa mũomonĩ kĩla ĩvinda nĩ kana wĩthĩwe nĩmene ala meũlika Nyũmbanĩ ya Ũsumbĩ. Nzama ya atumĩa yaĩlĩte kũamũa ũndũ vaĩlĩte kwĩkwa kwosana na mĩao ya kĩsio kyenyu ĩũlũ wa kũndũ kwa kũmbanĩa. Ethĩwa atumĩa ma kĩkundi nĩmatwʼa kana mũomo wa kũlika Nyũmbanĩ ya Ũsumbĩ ũkavingawa, kĩkundi kyaĩlĩte kũtavwʼa ĩũlũ wa mũvango ũsu.

Ve vata wa ala me ũmbanonĩ mewʼe me eanĩe na wa kũsiĩĩa mĩio ĩla yĩ Nyũmbanĩ ya Ũsumbĩ ndĩkoywe kana yanangwe. Kwoou atumĩa ma kĩkundi maĩle kũmanya ũndũ kĩsio kyoo kĩilyĩ, na mayĩka ũndũ mekwona vaĩle nĩ kana masũvĩe Nyũmba ya Ũsumbĩ na ala me maũmbanonĩ.