Ĩsandũkũ ya Ĩkũlyo

◼ Tũtonya kũtetheesya ata amanyĩwʼa maitũ ma Mbivilia mavatiswe na maitwʼĩka amanyĩwʼa ma Yesũ Klĩsto?

Nzĩa nzeo ya kwĩka ũu nĩ (1) kũmanyĩsya amanyĩwʼa ma Mbivilia ũteũtĩĩa na kũmatetheesya meke maendeeo, (2) kũthuthya amanyĩwʼa maku ma Mbivilia maendae maũmbano onthe na mayumasya maelesyo, na (3) kũmatetheesya mamanye kũtavanyʼa nesa matwʼĩka atavanyʼa.

Yesũ Klĩsto nĩwanengie aatĩĩi make wĩa wa kũtwʼĩkĩthya amanyĩwʼa, kũmavatisa, na kũmamanyĩsya makwatae maũndũ onthe ala wameaĩe. Yesũ oonanisye kana wĩa ũsu wa kũtavanyʼa waĩle kwĩthĩwa ũendeee o na ũmũnthĩ. Aisye: “Na sisyai, nyie nĩ vamwe nenyu mĩthenya yonthe, kũvika wĩanĩu wa ĩvinda yĩĩ.”—Mt. 28:19, 20.

Mũmanyĩwʼa nĩ mũndũ ũla wĩtĩkĩlaa kĩla wamanyĩwʼa na aitavya angĩ maũndũ ala weemanyĩsya. Kwoou, nĩ kana mũndũ avatiswe, aĩlĩte kwĩthĩwa esĩ momanyĩsyo ma mũsingi ma Mbivilia na akaalyũla mwĩkalĩle wake wosane na myolooto ya Yeova. O na ĩngĩ, aĩlĩte kwĩthĩwa esĩ kĩlungu kya ũseũvyo wa Yeova kya kũũ nthĩ, na akamanya kana Yesũ Klĩsto atũmĩaa “ngombo yĩ na kĩthito na mbũĩ” kũtũtongoesya. (Mt. 24:45-47; Meko 1:8) Atavanyʼa asu eũ nĩmatavanasya na kĩthito o ta atavanyʼa ala angĩ nũndũ nĩmesĩ kavinda kala katiele nĩ kanini. (Luka 8:1; Mt. 24:14) Ĩla mavatiswa, amanyĩwʼa asu monanasya kana nĩmeyumĩtye kũmũthũkũma Yeova Ngai na ngoo yonthe.—Sianĩsya na Savuli 40:8.

Twaĩlĩte kũmanya kana tũtetheeasya ala tũkwĩmanyĩsya namo matwʼĩke amanyĩwʼa ma Yesũ ĩndĩ ti amanyĩwʼa maitũ. Ethĩwa tũitonya kũtetheesya mũmanyĩwʼa wa Mbivilia eke maendeeo nũndũ wa kwĩthĩwa tũi na mwanya mũseo, tũi na vinya wa mwĩĩ kana ũtonyi wa kũelewa, kana nũndũ wa itumi ingĩ, twaĩlĩte kũelesya atumĩa ma kĩkundi. Atumĩa nĩmatonya kwĩka mĩvango nĩ kana mũndũ ũsu atetheewʼe kwĩka maendeeo kwosana na ndeto sya Vaulo ĩandĩkonĩ ya 1 Akolintho 3:5-9.

Mũmanyĩwʼa wa Mbivilia aĩlĩte kũmanyĩwʼa nginya amine mavuku Mbivilia Yo Ĩmanyĩasya Ata? na “Ĩyĩkalyei Ene Wendonĩ wa Ngai,” o na ethĩwa nĩwavatiswa. Ethĩwa mũi na mavuku asu kĩthyomonĩ kya mũmanyĩwʼa waku, no mũtũmĩe mavuku angĩ ala matonya kũmũtetheesya akwate momanyĩsyo ma mũsingi ma Mbivilia, na matonya kũmũtetheesya aelewe maũndũ ala Yeova wendaa andũ meanĩsye.